(vovworld)- ຍອດວົງເງິນສົ່ງອອກຂອງ ຫວຽດນາມ ໃນໄຕມາດ 1/2012 ຄາດວ່າບັນລຸ 24,5 ຕື້ USD, ເພີ່ມຂຶ້ນເກືອບ 24% ເມື່ອທຽບໃສ່ໄລຍະດຽວກັນຂອງປີກາຍ ແລະ ໄດ້ຮັບຖືວ່າ ແມ່ນສັນຍານອັນຕັ້ງຫນ້າ ແລະເປັນຫນ້າຊ່ືນຊົມຂອງພື້ນຖານເສດຖະກິດນັບແຕ່ຕົ້ນປີມາຮອດປະຈຸບັນ. ຄາດໝາຍວາງອອກໃຫ້ແກ່ວົງເງິນສົ່ງອອກຂອງທັງປີ 2012 ແມ່ນບັນລຸ 108,8 ຕຶ້ USD, ຊຶ່ງແມ່ນລະດັບສູງສູດນັບແຕ່ກ່ອນມາຮອດປະຈຸບັນນັ້ນ ພວມມີກາລະໂອກາດ ແລະ ສິ່ງທ້າທາຍຫລາຍຢ່າງ, ໃນສະພາບເສດຖະກິດໂລກກໍຄືຢູ່ພາຍໃນປະເທດພວມປະສົບກັບຄວາມຫຍຸ້ງຍາກ, ການສົ່ງອອກຂອງວິສາຫະກິດພາຍໃນປະເທດພວມມີທ່າອ່ຽງຊັກຊ້າລົງ.
|
ເຄື່ອງຕຳແຜ່ນຕັດຫຍິບ ຫວຽດນາມ
ພາບປະກອບ:internet
|
ໄລ່ມາຮອດໝົດໄຕມາດ 1/2012, ຕຳແຜ່ນຕັດຫຍິບນຳຫນ້າໃນບັນດາຂະແຫນງສິນຄ້າສົ່ງອອກໃຫຍ່, ດ້ວຍວົງເງິນສົ່ງອອກບັນລຸ 3,2 ຕື້ USD ເພີ່ມຂຶ້ນ 15,4% ເມື່ອທຽບໃສ່ໄລຍະດຽວກັນຂອງປີກາຍ, ໂດຍບໍ່ຫົວຊາຕໍ່ບັນດາຄວາມຫຍຸ້ງຍາກ ຍ້ອນບາງຕະຫລາດສົ່ງອອກເຄື່ອງຕຳແຜ່ນຕັດຫຍິບມີທ່າອ່ຽງຫລຸດລົງເມື່ອທຽບໃສ່ໄລຍະດຽວກັນຂອງປີກາຍຄື: ຕະຫລາດ ອີຢູ ຫລຸດລົງແຕ່ 25 - 30%. ທ່ານນາງ Dang Phuong Dung ຮອງປະທານທັງເປັນເລຂາທິການໃຫຍ່ສະຫະສະມາຄົມຕຳ່ແຜ່ນຕັດຫຍິບ ຫວຽດນາມ ຖືວ່າ: ສະພາບຄວາມຫຍຸ້ງຍາກນີ້ຈະໄດ້ຮັບການປັບປຸງໃຫ້ດີກວ່າໃນໄຕມາດ 2 ແລະ ໄຕມາດ 3 ຈະມາເຖິງ ເພາະວ່າ ນີ້ແມ່ນໄລຍະເຄື່ອນໄຫວຟົດຟື້ນທີ່ສຸດຂອງຂະແຫນງຕຳແຜ່ນຕັດຫຍິບ. ມີວິສາຫະກິດຫລາຍແຫ່ງໃຫ້ຮູ້ວ່າ: ຈຳນວນໃບສັ່ງຊື້ເຄື່ອງຕຳແຜ່ນຕັດຫຍິບໃຫ້ແກ່ 2 ໄຕມາດຈະມາເຖິງ ໄດ້ເພີ່ມຂຶ້ນທັງຂອບຂະຫນາດ ແລະ ມູນຄ່າ. ສິ່ງດັ່ງກ່າວສະແດງໃຫ້ເຫັນວ່າ ໝາກຜົນການສົ່ງອອກຂອງຂະແຫນງຕຳເຜ່ນຕັດຫຍິບໃນຊຸມເດືອນຈະມາເຖິງຈະໄດ້ຮັບການປັບປຸງດີກວ່າເມື່ອທຽບກັບ 3 ເດືອນຕົ້ນປີ. ທ່ານນາງ Dang Phuong Dung ເວົ້າວ່າ:
“ຄາດໝາຍໃນປີ 2012 ສຳລັບເຄື່ອງຕຳແຜ່ນຕັດຫຍິບແມ່ນບັນລຸໃຫ້ໄດ້ແຕ່ 18 - 18,5 8 ຕື້ USD. ໃນໄຕມາດ 1 ຍັງປະສົບກັບຄວາມຫຍຸ້ງຍາກຢູ່ ແຕ່ວ່າໄຕມາດ 2 ໄດ້ມີສັນຍານດີພໍສົມຄວນ, ບັນດາວິສາຫະກິດໄດ້ມີໃບສັ່ັງຊື້ສິນຄ້າຫລາຍກວ່າ, ພິເສດ ແມ່ນຕະຫລາດອາເມລິກາ. ນອກນັ້ນ ບັນດາສັນຍາ FTA ກັບ ຍີ່ປຸ່ນ, ສເກົາຫລີ ກໍເສີມຂະຫຍາຍຄຸນປະໂຫຍດ. ການສົ່ງອອກເຄ່ືອງຕຳແຜ່ນຕັດຫຍິບໄປຍັງບາງຕະຫລາດໃຫມ່ຄື ກູບາ ກໍຮັກສາລະດັບເຕີບໂຕເປັນປົກກະຕິ.”
ຕາມຜູ້ຊ່ຽວຊານດ້ານເສດຖະກິດຫລາຍທ່ານແລ້ວ, ໃນສະພາບການຫຍຸ້ງຍາກ, ການສົ່ງອອກຂອງຫວຽດນາມ ຍັງຄົງເພີ່ມຂຶ້ນເກືອບ 24% ເມື່ອທຽບໃສ່ໄລຍະດຽວກັນຂອງປີກາຍ ນັ້ນແມ່ນສິ່ງທີ່ເປັນຫນ້າຊື່ນຊົມ ແຕ່ຍັງມີຄຳກ່າວເຕືອນກ່ຽວກັບຄວາມສາມາດ ສົ່ງອອກຂອງປີນີ້ອາດຈະປະສົບກັບຄວາມຫຍຸ້ງຍາກຢູ່. ທ່ານ Vo Tri Thanh ຮອງຫົວຫນ້າສະຖາບັນຄົ້ນຄ້າເສດຖະກິດສູນກາງ ໃຫ້ຮູ້ວ່າ: ລະດັບການເຕີບໂຕຕຳ່, ຄວາມຕ້ອງການສິນຄ້າຫລຸດລົງ, ລາຄາສິນຄ້າສົ່ງອອກ
ກໍມີທ່າອ່ຽງຫລຸດລົງ ນັ້ນແມ່ນຄວາມຫຍຸ້ງຍາກຈາກພາຍນອກທີ່ອາດຈະສົ່ງຜົນກະທົບເຖິງການສົ່ງອອກຂອງຫວຽດນາມ. ໃນຂະນະນັ້ນ ບັນດາວິສາຫະກິດພາຍໃນປະເທດ ຍັງປະສົບກັບຄວາມຫຍຸ້ງຍາກໃນການກູ້ຢືມທຶນດ້ວຍອັດຕາດອກເບ້ຍຕຳ່. ເຖິງຢ່າງໃດກໍຕາມ ຍັງມີຫລາຍປັດໄຈສະດວກສຳລັບການສົ່ງອອກສິນຄ້າໃນຊຸມເດືອນຈະມາເຖິງ.
“ໄຕມາດທີ 1, ການສົ່ງອອກສິນຄ້າຍັງຄົງບັນລຸກວ່າ 20% ກ່ຽວກັບດ້ານມູນຄ່າ ບວກກັບສັນຍານດີຂອງພື້ນຖານເສດຖະກິດໂລກ ແລະ ເສດຖະກິດຫວຽດນາມ ພ້ອມກັບບັນດາມາດຕະການຫນູນຊ່ວຍ ຊຶ່ງລັດຖະບານພວມປາດຖະຫນາຈະ
ປະຕິບັດນັ້ນ ນັກເສດຖະກິດຫລາຍທ່ານຫວັງວ່າ ເສດຖະກິດຫວຽດນາມຈະເລີ່ມຟື້ນຕົວໃນໄຕມາດນີ້ ຫລືໃນ 1,2 ເດືອນຂອງໄຕມາດຕໍ່ໄປ. ຖ້າຫາກສັງເກດຄືແນວນັ້ນ ບວກກັບປະລິມານແລະ ມູນຄ່າການສົ່ງອອກຂອງໄຕມາດ 1, ຂ້າພະເຈົ້າຄິດວ່າເລື່ອງບັນລຸຄາດໝາຍສົ່ງອອກກວ່າ 10% ແລະ ມູນຄ່າກວ່າ 100 ຕື້ USD ແມ່ນມີຄວາມເປັນໄປໄດ້”.
ຄາດໝາຍທີ່ວາງອອກໃນປີນີ້ ແມ່ນວົງເງິນການສົ່ງອອກບັນລຸ 108,8 ຕື້ USD ຊຶ່ງແມ່ນລະດັບສູງກວ່າໝູ່ນັບແຕ່ກ່ອນມາຮອດປະຈຸບັນ. ເຖິງຢ່າງໃດກໍຕາມ, ເພື່ອບັນລຸໄດ້ຄາດໝາຍນີ້ ຄວນມີຄວາມມານະພະຍາຍາມຫລາຍຢ່າງຈາກບັນດາກະຊວງ, ຂະແຫນງການ, ທ້ອງຖິ່ນ ແລະ ປະຊາຄົມວິສາຫະກິດ. ຄຽງຄູ່ກັບການເພີ່ມທະວີ ແລະ ປ່ຽນໃຫມ່ການສົ່ງເສີມດ້ານການຄ້າ, ຍູ້ແຮງບັນດາການເຄື່ອນໄຫວເຈລະຈາສອງຝ່າຍ, ຫລາຍຝ່າຍ ເພື່ອເປີດກວ້າງຕະຫລາດ ແລະ ຊຸກຍູ້ການສົ່ງອອກນັ້ນ, ການຫນູນຊ່ວຍວິສາຫະກິດໄດ້ຮັບຖືວ່າ ແມ່ນວຽກງານທີ່ຈຳເປັນໃນຂະນະນີ້ ເພາະວ່າ ຕາມຕົວເລກລະຫວ່າງ ກະຊວງອຸດສາຫະກຳ ແລະ ການຄ້າແລ້ວ, ການສົ່ງອອກຂອງວິສາຫະກິດພາຍໃນປະເທດພວມມີທ່າອ່ຽງຊັກຊ້າໄວ້, ພຽງບັນລຸເກືອບ 9 ຕື້ USD.ໃນຂະນະນັ້ນ ວິສາຫະກິດທີ່ມີເງິນລົງທຶນໂດຍກົງຈາກຕ່າງປະເທດບັນລຸວົງເງິນສົ່ງອອກກວ່າ 15 ຕື້ USD, ເພີ່ມຂຶ້ນ 43% ເມື່ອທຽບໃສ່ໄລຍະດຽວກັນຂອງປີກາຍ. ຄວາມຈິງສະແດງໃຫ້ເຫັນວ່າ ວິສາຫະກິດພາຍໃນປະເທດ ພວມປະສົບກັບຄວາມຫຍຸ້ງຍາກຫລາຍຢ່າງ ຕ້ອງມີມາດຕະການຫນູນຊ່ວຍຢ່າງທັນການ. ທ່ານ Nguyen Thanh Bien ຮອງລັດຖະມົນຕີ ກະຊວງອຸດສາຫະກຳ ການຄ້າ ຫວຽດນາມ ຖືວ່າ:
“ທຳອິດແມ່ນສຸມໃສ່ຫນູນຊ່ວຍໃຫ້ແກ່ກຸ່ມວິສາຫະກິດມີທຶນພາຍໃນປະເທດ 100%, ແກ້ໄຂບັນດາຄວາມຫຍຸ້ງຍາກເພື່ອສ້າງເງື່ອນໄຂສະດວກໃຫ້ແກ່ປະຊາຄົມວິສາຫະກິດ. ເລື່ອງຫນູນຊ່ວຍບໍ່ພຽງແຕ່ແມ່ນການຂໍລະບຽບການສະຫນອງ CO ບຸລິມະສິດເທົ່ານັ້ນ ຊ້ຳບໍ່ໜຳ ແມ່ນມີການກຳນົດທິດລົງທຶນໄລຍະຍາວໃຫ້ແກ່ການຜະລິດສິນຄ້າທີ່ມີລະດັບພາສີຕຳ່ໃນເຂດການຄ້າເສລີ ຊຶ່ງຫວຽດນາມ ເຂົ້າຮ່ວມ ແລະ ຫນູນຊ່ວຍວິສາຫະກິດ ເຮັດແນວໃດເພື່ອຍົກວົງເງິນສົ່ງອອກຂຶ້ນສູງຄືດັ່ງມະຕິຂອງລັດຖະບານໄດ້ວາງອອກ.”
ຖ້າຫາກວົງເງິນສົ່ງອອກແມ່ນ 108,8 ຕື້ USD ບວກກັບວົງເງິນນຳເຂົ້າສິນຄ້າປະມານ 117 ຕື້ USD , ວົງເງິນ ສົ່ງອອກ ແລະ ນຳເຂົ້າສິນຄ້າແມ່ນປະມານ 225 ຕື້ USD, ຫວຽດນາມ ຈະແມ່ນຫນຶ່ງໃນຈຳນວນ 5 ປະເທດນຳຫນ້າຂອງ ອາຊຽນມີວົງເງິນສົ່ງອອກ ນຳເຂົ້າສິນຄ້າກວ່າ 200 ຕື້ USD ໃນປີ 2012 ຊຶ່ງລວມມີ: ສິງກະໂປ, ອິນໂດເນເຊຍ, ໄທ, ມາເລເຊຍ ແລະ ຫວຽດນາມ./.