ເສດຖະກິດພາກເອກະຊົນພວມປະກອບສ່ວນເຂົ້າໃນການເຕີບໂຕລວມຂອງພື້ນຖານເສດຖະກິດ ເມື່ອປະກອບ GDP ໄດ້ເກືອບ 40% ແລະ ແມ່ນພາກສ່ວນສຳຄັນໃນການສ້າງໂຄງປະກອບການລົງທຶນ. ເສດຖະກິດພາກເອກະຊົນແມ່ນພາກສ່ວນໃຫຍ່ກວ່າໝູ່ໃນຍອດຈຳນວນເງິນລົງທຶນ ແລະ ການເສຍອາກອນ, ມອບເຂົ້າງົບປະມານໄດ້ເພີ່ມຂຶ້ນຕາມແຕ່ລະປີ. ໃນປີ 2015, ກຸ່ມເສດຖະກິດພາກເອກະຊົນໄດ້ປະກອບ GDP ຫຼາຍກວ່າທົບ 3 ເທົ່າເມື່ອທຽບໃສ່ປີ 2010. ນີ້ແມ່ນກຳລັງຕົ້ນຕໍສ້າງວຽກເຮັດງານທຳໃຫ້ຄົນງານ ແລະ ປະກອບສ່ວນແກ້ໄຂບັນດາບັນຫາສັງຄົມ… ຍ້ອນເຫດນັ້ນ, ກອງປະຊຸມໃຫຍ່ຄັ້ງທີ 12 ຂອງພັກກອມມູນິດຫວຽດນາມ ໄດ້ຢືນຢັນການສ້າງພື້ນຖານເສດຖະກິດການຕະຫຼາດຕາມທິດສັງຄົມນິຍົມ ແລະ ເສດຖະກິດພາກເອກະຊົນ ແມ່ນກຳລັງໜູນສຳຄັນຂອງພື້ນຖານເສດຖະກິດ, ບັນດາພາກສ່ວນເສດຖະກິດມີຄວາມສະເໝີພາບ, ມີການຮ່ວມມື ແລະ ແກ່ງແຍ້ງກັນຕາມກົດໝາຍ. ທ່ານຮອງສາດສະດາຈານ, ປະລິຍາເອກ ດ່ວານມິງຕ໋ວນ, ຮອງຫົວໜ້າບັນນາທິການໃຫຍ່ຮັບຜິດຊອບວາລະສານກອມມູນິດ ຖືວ່າ.
“ປະຈຸບັນ, ບັນດາທັດສະນະຂອງພັກ ທີ່ກອງປະຊຸມໃຫຍ່ຄັ້ງທີ 12 ໄດ້ກຳນົດຢ່າງຈະແຈ້ງບັນດາຂັ້ນຕອນ, ທິດທາງ ເພື່ອສາມາດມເສີມຂະຫຍາຍເສດຖະກິດພາກເອກະຊົນໃຫ້ດີກວ່າ. ຕົວຢ່າງຄື: ການຮັບປະກັນສິດສະເໝີພາບລະຫວ່າງບັນດາພາກສ່ວນເສດຖະກິດຢ່າງແທ້ຈິງ. ຍ້ອນເຫດນັ້ນ, ເສດຖະກິດພາກເອກະຊົນມີເງື່ອນໄຂສຳພັດກັບບັນດາແຫຼ່ງກຳລັງ, ນັບທັງແຫຼ່ງກຳລັງທາງດ້ານທີ່ດິນ, ສິນເຊື່ອ, ນັບທັງການສຳພັດກັບແຫຼ່ງກຳລັງຂອງພາກລັດ. ບັນດານະໂຍບາຍກ່ຽວກັບການຮ່ວມມືພາກລັດ - ເອກະຊົນ ກໍ່ຮັບປະກັນໃຫ້ພາກເອກະຊົນສາມາດພ້ອມກັບພາກລັດຮ່ວມມືນຳກັນ, ຂຸດຄົ້ນທີ່ດິນທີ່ຍັງເຫຼືອໃນປະຈຸບັນເພື່ອຮັບປະກັນເສດຖະກິດພາກເອກະຊົນພັດທະນາ”.
ເຖິງຢ່າງໃດກໍ່ຕາມ, ປະຈຸບັນ ວິສາຫະກິດພາກເອກະຊົນເກືອບທັງໝົດຍັງມີຂອບຂະໜາດນ້ອຍຢູ່, ຂາດລັກສະນະຮ່ວມສຳພັນ, ຄວາມສາມາດຮັບມືກັບບັນດາຄວາມສ່ຽງຕ່ຳ, ມີວິສາຫະກິດຫຼາຍແຫ່ງຕ້ອງຍຸບເລີກ, ຢຸດຕິການເຄື່ອນໄຫວ. ຍິ່ງກວ່ານັ້ນ, ສິດເສລີໃນການດຳເນີນທຸລະກິດຍັງບໍ່ທັນໄດ້ຮັບການເສີມຂະຫຍາຍ, ສະພາບແວດລ້ອມແຫ່ງການລົງທຶນດຳເນີນທຸລະກິດຍັງບໍ່ທັນສະດວກສະບາຍ ແລະ ລັກສະນະການແກ່ງແຍ້ງຍັງຕ່ຳ. ທ່ານ ເຈີນກິມຈຸງ, ຮອງຫົວໜ້າສະຖາບັນຄຸ້ມຄອງເສດຖະກິດສູນກາງ ຖືວ່າ: ຕ້ອງຮັບປະກັນລັກສະນະແກ່ງແຍ້ງຢ່າງປອດໄສ, ສະເໝີພາບລະຫວ່າງບັນດາວິສາຫະກິດ ເພື່ອໃຫ້ກຸ່ມວິສາຫະກິດພາກເອກະຊົນພັດທະນາກວ່າອີກ.
“ເພື່ອໃຫ້ເສດຖະກິດພາກເອກະຊົນກາຍເປັນກຳລັງໜູນໃນການພັດທະນາ ຄວນປັບປຸງກົນໄກການຕະຫຼາດໃຫ້ສົມບູນແບບ, ນີ້ແມ່ນຈຸດທີ່ເປັນພື້ນຖານທີ່ສຸດໃນໄລຍະຈະມາເຖິງ ແລະ ນີ້ແມ່ນເນື້ອແທ້ຂອງການເຕີບໂຕ. ເພີ່ມລັກສະນະກະຈ່າງແຈ້ງ, ປ່ຽນໃໝ່ບົດບາດການຄຸ້ມຄອງຂອງລັດ ໂດຍພື້ນຖານ, ຮັບປະກັນເສດຖະກິດມະຫາພາກເປັນປົກກະຕິ ແລະ ກວດກາຄືນການລົບລ້າງບັນດາບັນຫາທີ່ກ່ຽວຂ້ອງເຖິງການຍົກສູງປະສິດທິຜົນການລົງທຶນ. ສືບຕໍ່ປະຕິຮູບວິສາຫະກິດສຳລັບບັນດາວິສາຫະກິດຂະໜາດນ້ອຍ, ຂະໜາດກາງ ແລະ ວິສາຫະກິດຂະໜາດໃຫຍ່, ເພີ່ມທະວີຄວາມເປັນເອກະພາບກ່ຽວກັບດ້ານກົດໝາຍ”.
ເພື່ອເສີມຂະຫຍາຍບົດບາດເປັນກຳລັງໜູນຂອງເສດຖະກິດພາກເອກະຊົນໃນພື້ນຖານເສດຖະກິດຂອງປະເທດຊາດ, ລັດຖະບານຫວຽດນາມ ໄດ້ປະຕິບັດບັນດາມາດຕະການແກ້ໄຂຢ່າງຄົບຊຸດ ນັບທັງຝ່າຍວິສາຫະກິດພາກເອກະຊົນ ແລະ ບັນດາອົງການຄຸ້ມຄອງລັດ. ຕາມນັ້ນແລ້ວ, ບັນດາວິສາຫະກິດໄດ້ກຳນົດທ່າແຮງໃນການແກ່ງແຍ້ງ, ຈຸດດີ, ຈຸດອ່ອນຂອງຕົນຢ່າງຈະແຈ້ງ, ສຸມໃສ່ລົງທຶນເຂົ້າບັນດາຂົງເຂດດຳເນີນທຸລະກິດຕົ້ນຕໍ່; ຍົກສູງກຳລັງຄວາມສາມາດໃນການຄຸ້ມຄອງວິສາຫະກິດ. ທ່ານນາງ ຟ້າມທິທູຮັ່ງ, ເລຂາທິການໃຫຍ່ຫ້ອງການການຄ້າ ແລະ ອຸດສາຫະກຳຫວຽດນາມ (VCCI) ຖືວ່າ.
“VCCI ພວມເຕົ້າໂຮມບັນດາຄວາມຫຍຸ້ງຍາກ, ຂໍ້ຕິດຂັດຂອງວິສາຫະກິດເພື່ອສະເໜີຕໍ່ລັດຖະບານ. ດ້ວຍເລື່ອງປະກາດໃຊ້ມະຕິກ່ຽວກັບການໜູນຊ່ວຍ ແລະ ພັດທະນາວິສາຫະກິດຮອດປີ 2020 ຂອງລັດຖະບານ, ນອກນັ້ນ VCCI ຍັງໄດ້ສ້າງໂຄງການເຄື່ອນໄຫວຈັດຕັ້ງການຜັນຂະຫຍາຍບັນດາມາດຕະການແກ້ໄຂເພື່ອໜູນຊ່ວຍບັນດາວິສາຫະກິດຂຶ້ນກັບພາກເອກະຊົນ ພ້ອມທັງເຂົ້າຮ່ວມວຽກງານສ້າງ, ໜູນຊ່ວຍວິສາຫະກິດຂະໜາດກາງ ແລະ ນ້ອຍ ຈາກນັ້ນສ້າງຫຼາຍແຫຼ່ງກຳລັງຕື່ມອີກເພື່ອໜູນຊ່ວຍພາກພື້ນເອກະຊົນໃຫ້ຫຼາຍກວ່າອີກ.”
ຍາມໃດລັດຖະບານຫວຽດນາມ ກໍຖືວິສາຫະກິດທີ່ມີເງິນລົງທຶນໂດຍກົງຈາກຕ່າງປະເທດ (FDI) ແລະ ບັນດາວິສາຫະກິດພາຍໃນປະເທດແມ່ນປະຊາຄົມວິສາຫະກິດຫວຽດນາມ ທີ່ສະໜິດຕິດພັນ, ຮ່ວມມືຢ່າງມີປະສິດທິຜົນໃນພື້ນຖານເສດຖະກິດແຫ່ງຊາດເປັນເອກະພາບ. ລັດຖະທຳມະມູນປີ 2013 ຂອງຫວຽດນາມ ໄດ້ຖືວິສາຫະກິດ FDI ແມ່ນພາກສ່ວນເສດຖະກິດພັດທະນາຂອງຫວຽດນາມ. ຍ້ອນເຫດນັ້ນ, ເມື່ອກ່າວຄຳເຫັນທີ່ເວທີປາໄສວິສາຫະກິດຫວຽດນາມ ເຊິ່ງຫາກໍດຳເນີນໃນໄລຍະຜ່ານມາ, ທ່ານນາຍົກລັດຖະມົນຕີ ຫງວຽນຊວນຟຸກ ໄດ້ຢືນຢັນວ່າ: ຫວຽດນາມ ສືບຕໍ່ສ້າງລະບອບເສດຖະກິດການຕະຫຼາດ, ນະໂຍບາຍດ້ານກົດໝາຍ, ການປະຕິຮູບດ້ານບໍລິການໃຫ້ສົມບູບແບບ, ສ້າງສະພາບແວດລ້ອມແຫ່ງການລົງທຶນດຳເນີນທຸລະກິດຢ່າງສະດວກສະບາຍ, ຍົກສູງກຳລັງຄວາມສາມາດແກ່ງແຍ້ງແຫ່ງຊາດ, ສ້າງທຸກເງື່ອນໄຂຢ່າງສະດວກເພື່ອໃຫ້ພາກສ່ວນເສດຖະກິດເອກະຊົນພັດທະນາຢ່າງແຮງ. ພິເສດແມ່ນເພີ່ມທະວີການຮ່ວມມືຕ່າງຝ່າຍຕ່າງມີຜົນປະໂຫຍດ, ພ້ອມກັນພັດທະນາລະຫວ່າງພາກສ່ວນເສດຖະກິດພາກເອກະຊົນຢູ່ພາຍໃນປະເທດ ແລະ ພາກ FDI ໃນພື້ນຖານເສດຖະກິດແຫ່ງຊາດ.
“ສຳລັບຝ່າຍວິສາຫະກິດ FDI, ລັດຖະບານປາດຖະໜາຢາກມີຄວາມຢືດໝັ້ນໃນການຮ່ວມມືລົງທຶນ, ສ້າງຄວາມໄວ້ເນື້ອເຊື່ອໃຈຕໍ່ການປະຕິຮູບຂອງຫວຽດນາມ, ຍູ້ແຮງການຖ່າຍຖອດເຕັກໂນໂລຊີທີ່ກ້າວໜ້າ, ບຳລຸງສ້າງຊັບພະຍາກອນ, ແບ່ງປັນບົດຮຽນໃນການບໍລິຫານ, ມີຄວາມຮັບຜິດຊອບຕໍ່ສັງຄົມ, ຮ່ວມແຮງຮ່ວມໃຈພ້ອມກັບຫວຽດນາມ ປົກປັກຮັກສາຊັບພະຍາກອນທຳມະຊາດ, ລັກສະນະໝັ້ນຄົງຂອງສິ່ງແວດລ້ອມ ແລະ ຄວາມປອດໄສຂອງສະພາບແວດລ້ອມແຫ່ງການດຳລົງຊີວິດໃຫ້ແກ່ຫວຽດນາມ”.
ໃນຍຸດທະສາດພັດທະນາເສດຖະກິດສັງຄົມໄລຍະ 2016 – 2020, ຫວຽດນາມ ໄດ້ກຳນົດສ້າງທຸກເງື່ອນໄຂສະດວກເພື່ອພັດທະນາວິສາຫະກິດຫວຽດນາມ ຢ່າງແຮງ, ໂດຍສະເພາະແມ່ນວິສາຫະກິດພາກເອກະຊົນ, ສ້າງກຳລັງໜູນເພື່ອຍົກສູງກຳລັງແກ່ງແຍ້ງ ແລະ ລັກສະນະເປັນເຈົ້າຕົນເອງຂອງພື້ນຖານເສດຖະກິດ. ລັດຖະບານຫວຽດນາມ ຈະມານະພະຍາຍາມເຄື່ອນໄຫວເພື່ອໃຫ້ປະຊາຄົມວິສາຫະກິດຫວຽດນາມ ອາດສາມາດຮ່ວມມືຕິດພັນນຳກັນ, ພ້ອມກັນຮ່ວມມືເຕີບໃຫຍ່ໃນພື້ນຖານເສດຖະກິດແຫ່ງຊາດຫວຽດນາມ ແລະ ບືນຕົວອອກສູ່ໂລກສຳເລັດຜົນ.