ແຂວງບັກຢາງຍູ້ແຮງການສົ່ງເສີມດ້ານການຄ້າໃນການຈຳໜ່າຍໝາກລີ້ນຈີ່
Thu Hang - Vinh Phong -
(vovworld) - ປະຊາຊົນແຂວງບັກຢາງ ພວມກ້າວເຂົ້າສູ່ການເກັບກ່ຽວໝາກລີ້ນຈີ່. ເພື່ອຮັບປະກັນການຈຳໜ່າຍຜະລິດຕະພັນ, ຮັບປະກັນລາຄາເປັນປົກກະຕິໃຫ້ປະຊາຊົນ, ອຳນາດການປົກຄອງທ້ອງຖິ່ນໄດ້ນຳໃຊ້ບັນດາມາດຕະການ ເພື່ອຍູ້ແຮງການສົ່ງເສີມດ້ານການຄ້າ, ໂຄສະນາເຄື່ອງໝາຍການຄ້າໝາກລີ້ນຈີ່ ບັກຢາງ, ເພື່ອມຸ່ງໄປເຖິງຄາດໝາຍຍູ້ແຮງການຈຳໜ່າຍ ໝາກລີ້ນຈີ່ ອອກສູ່ຕະຫຼາດພາຍໃນປະເທດ ແລະ ສາກົນ. ບົດຂຽນ “ແຂວງບັກຢາງ ຍູ້ແຮງການສົ່ງເສີມດ້ານການຄ້າໃນການຈຳໜ່າຍໝາກລີ້ນຈີ່” ຂອງນັກຂ່າວ VOV.
ພິທີລົງນາມສົ່ງອອກໝາກລີ້ນຈີ່
ໄປຍັງຕະຫຼາດອົດສະຕາລີ
(ພາບ: bacgiang.gov.vn)
ຕອນບ່າຍວັນທີ 23/06 ຜ່ານມາ, ມີໝາກລີ້ນຈີ່ກວ່າ 2 ໂຕນທຳອິດໄດ້ນຳເຂົ້າສູນສາຍລັງສີ ຮ່າໂນ້ຍ ເພື່ອແກ້ໄຂ ກ່ອນທີ່ຈະສົ່ງອອກໄປຍັງຕະຫຼາດອົດສະຕາລີ ດ້ວຍທາງການບິນ ແລະ ຫຼັງຈາກນັ້ນມື້ໜຶ່ງ, ບັນດາໝາກລີ້ນຈີ່ຫວຽດນາມ ໄດ້ມີໜ້າຢູ່ບັນດາຮ້ານສັບພະສິນຄ້າ ແລະ ໄປເຖິງຜູ້ບໍລິໂພກ. ປີ 2016, ເນື້ອທີ່ປູກໝາກລີ້ນຈີ່ທັງໝົດຢູ່ແຂວງບັກຢາງ ບັນລຸ 30.000 ເຮັກຕາ, ດ້ວຍປະລິມານແມ່ນ 130.000 ໂຕນ, ໃນນັ້ນເຂດຜະລິດບັນລຸມາດຖານ VietGap (ມາດຕະຖານປະຕິບັດການຜະລິດກະສິກຳທີ່ດີຢູ່ຫວຽດນາມ) ກວມເອົາ 1/3, ປະລິມານຄາດວ່າຈະບັນລຸກວ່າ 53.000 ໂຕນ, ຕອບສະໜອງມາດຕະຖານໝາກລີ້ນຈີ່ທີ່ມີຄຸນນະພາບສູງ ເພື່ອສົ່ງອອກໄປຍັງຕະຫຼາດສາກົນ. ຄາດວ່າ, ຈະມີໝາກລີ້ນຈີ່ບັກຢາງເກືອບ 1.000 ໂຕນສົ່ງໄປຂາຍຢູ່ບັນດາຕະຫຼາດຄື: ອາເມລິກາ, ອີຢູ, ອົດສະຕາລີ…
ສະເພາະຢູ່ເມືອງ ລູກຫງ້ານ, ເຊິ່ງແມ່ນເຂດປູກໝາກລີ້ນຈີ່ທີ່ມີຊື່ສຽງຂອງແຂວງ ບັກຢາງ, ໄດ້ສະໜອງ 15 ລະຫັດເຂດປູກໝາກລີ້ນຈີ່ໃຫ້ກວ່າ 200 ຄອບຄົວ ຊາວກະສິກອນດ້ວຍເນື້ອທີ່ 158 ເຮັກຕາຕາມມາດຕະຖານ Global G.A.P (Global Good Agricultural Practice - ປະຕິບັດກະສິກຳທີ່ດີໃນທົ່ວໂລກ) ດ້ວຍຄຸນນະພາບພິເສດ, ໄດ້ຮັບການປູກ ແລະ ບົວລະບັດຮັກສາ ພາຍໃຕ້ການຕິດຕາມກວດກາຢ່າງຄັ່ງຂັດກ່ຽວກັບຂັ້ນຕອນການຜະລິດຂອງບັນດາອົງການທີ່ກ່ຽວຂ້ອງ. ຄາດວ່າ, ຈະສົ່ງອອກໝາກລີ້ນຈີ່ 1.000 ໂຕນໄປຍັງບັນດາຕະຫຼາດຄື: ອາເມລິກາ, ອົດສະຕາລີ, ອີຢູ... ທ່ານ ຈຸວັນບ໋າວ, ຫົວໜ້າຫ້ອງການກະສິກຳເມືອງ ລູກຫງ້ານ, ໃຫ້ຮູ້ວ່າ: ຍ້ອນໄດ້ນຳໃຊ້ຮູບແບບຜະລິດຕາມມາດຕະຖານ VietGAP ສະນັ້ນ, ຄຸນນະພາບຂອງໝາກລີ້ນຈີ່ ຈຶ່ງໄດ້ຮັບການຍົກສູງຂຶ້ນ, ປະລິມານການສົ່ງອອກກໍໄດ້ຮັບປະກັນ.
“ປີ 2016, ເນື້ອທີ່ປູກໝາກລີ່ນຈີ່ລູກຫງ້ານ ແມ່ນກວ່າ 16.000 ເຮັກຕາ, ຄາດວ່າ, ປະລິມານການຜະລິດຈະບັນລຸປະມານ 70.000 ຫາ 75.000 ໂຕນ. ຕໍ່ໜ້າການຫຼຸດຜ່ອນຄືແນວນັ້ນ, ບັນດາອົງການວິຊາສະເພາະຂອງຫ້ອງການກະສິກຳ ໄດ້ຈັດຕັ້ງການຝຶກອົບຮົມເພື່ອຍົກສູງຄຸນນະພາບຜະລິດຕະພັນ, ຈັດຕັ້ງການປ້ອງກັນ ແລະ ຂ້າສັດຕູພືດ ເພື່ອຍົກສູງຄຸນນະພາບຂອງໝາກລີ້ນຈີ່. ຄຸນນະພາບຂອງໝາກລີ່ນຈີ່ໄດ້ຮັບການຍົກສູງຂຶ້ນ ຍ້ອນເນື້ອທີ່ປູກໝາກລີ່ນຈີ່ຕາມມາດຕະຖານ VietGap ແມ່ນ 15.500 ເຮັກຕາ, ເພີ່ມຂຶ້ນ 1.000 ກວ່າເຮັກຕາ ເມື່ອທຽບໃສ່ໄລຍະດຽວກັນຂອງປີ 2015. ”
ຈຳໜ່າຍໝາກລີ້ນຈີ່
(ພາບປະກອບ: khuyennongvn.gov.vn)
ເພື່ອສ້າງເງື່ອນໄຂສະດວກໃຫ້ຜູ້ປູກໝາກລີ້ນຈີ່, ແຂວງ ບັກຢາງ ໄດ້ກະກຽມຊັບພະຍາກອນມະນຸດ, ວັດຖຸ ແລະ ກໍ່ສ້າງສະຖານທີ່ເກັບຊື້, ຈຳໜ່າຍໝາກລີ້ນຈີ່ກວ່າ 3.000 ແຫ່ງ. ຄຽງຂ້າງນັ້ນ, ທາງແຂວງ ກໍ່ເພີ່ມທະວີການຮັບປະກັນຄວາມສະຫງົບ, ຄວາມເປັນລະບຽບຮຽບຮ້ອຍ, ຄວາມປອດໄພທາງດ້ານຄົມມະນາຄົມ, ສ້າງເງື່ອນໄຂສະດວກກ່ຽວກັບລະບຽບການໃຫ້ບັນດາວິສາຫະກິດຕ່າງປະເທດເຂົ້າຮ່ວມການຈຳໜ່າຍໝາກລີ້ນຈີ່. ເພື່ອຮັບປະກັນໃຫ້ແຫຼ່ງສະໜອງມີຄຸນນະພາບ, ມີບາງວິສາຫະກິດໄດ້ເປັນເຈົ້າການເຊັນສັນຍາເກັບຊື້ໝາກລີ້ນຈີ່ ຕາມມາດຕະການ VietGAP, Global GAP ກັບດາຄອບຄົວຜະລິດ, ສະຫະກອນ. ສະນັ້ນ, ຄາດວ່າປີ 2016, ມີ 40% ປະລິມານໝາກລີ້ນຈີ່ຂອງແຂວງບັກຢາງ ຈະໄດ້ສົ່ງອອກໄປຍັງຕະຫຼາດສາກົນ.
ທ່ານ ເຢືອງວັນທ໋າຍ, ຮອງປະທານຄະນະກຳມະການປະຊາຊົນແຂວງ ບັກຢາງ ໃຫ້ຮູ້ວ່າ: ພ້ອມກັບການຍູ້ແຮງການໂຄສະນາ, ແນະນຳຜະລິດຕະພັນ, ຮູບແບບຖົງຫຸ້ມຫໍ່, ສະແຕມສິນຄ້າເຄື່ອງໝາຍສິນຄ້າແລ້ວ, ແຂວງ ບັກຢາງຍັງສົມທົບກັບກະຊວງອຸດສາຫະກຳການຄ້າ ແລະ ບາງແຂວງ ຈັດຕັ້ງສົ່ງເສີມການຈຳໜ່າຍໝາກລີ້ນຈີ່; ຈັດຕັ້ງບັນດາລາຍການເຊື່ອມຕໍ່ການຜະລິດ, ຈຳໜ່າຍ, ສ້າງລະບົບແຈກຢາຍວິຊາການ ແລະ ມີປະສິດທິຜົນເພື່ອແນໃສ່ສ້າງລັກສະນະໝັ້ນຄົງ, ຍາວນານ ໃນການປຸງແຕ່ງ, ຈຳໜ່າຍໝາກລີ້ນຈີ່. ທ່ານ ເຢືອງວັນທ໋າຍ ໃຫ້ຮູ້ຕື່ມອີກວ່າ.
“ແຂວງບັກຢາງ ສືບຕໍ່ຍູ້ແຮງການສົ່ງເສີມດ້ານການຄ້າ. ຖອດຖອນບົດຮຽນໃນຊຸມປີຜ່ານມາ, ແຂວງ ຖືເປັນສຳຄັນບັນດາຕະຫຼາດຕາມທິດ ບໍ່ຂຶ້ນກັບຕະຫຼາດໃດ. ພິເສດແມ່ນຍູ້ແຮງການຈຳໜ່າຍຢູ່ຕະຫຼາດພາຍໃນປະເທດ. ບັກຢາງ ສົມທົບກັບຄະນະກຳມະການປະຊາຊົນນະຄອນຮ່າໂນ້ຍ, ລາວກາຍ, ລ້າງເຊີນ ເພື່ອຍູ້ແຮງການສົ່ງອອກໝາກລີ້ນຈີ່ໄປຍັງ ຈີນ, ກັບນະຄອນໂຮ່ຈິມິນ ເພື່ອສົ່ງອອກໄປຍັງພາກໃຕ້. ອາດເວົ້າໄດ້ວ່າ, ບັກຢາງ ພວມມຸ່ງໄປເຖິງຕະຫຼາດທຸກແຫ່ງ”.
ການຍູ້ແຮງການສົ່ງເສີມດ້ານການຄ້າສຳລັບບັນດາຜະລິດຕະພັນກະເສດໃຫ້ພໍ່ແມ່ປະຊາຊົນ ໄດ້ ແລະ ພວມໄດ້ຮັບຄວາມເອົາໃຈໃສ່ເປັນພິເສດຈາກແຂວງບັກຢາງ. ນີ້ແມ່ນວິທີປະຕິບັດຢ່າງແທດຈິງ ເພື່ອແນໃສ່ຊ່ວຍໃຫ້ຊາວກະສິກອນພັດທະນາຮູບແບບເສດຖະກິດເພີ່ມລາຍຮັບເທື່ອລະກ້າວ, ສ້າງຄວາມຮັ່ງມີໃນບ້ານເກີດເມືອງນອນຂອງຕົນ.
Thu Hang - Vinh Phong