សកម្មភាពមួយដែលបានទាក់ទាញការយកចិត្តទុកដាក់ពីសំណាក់មិត្តអ្នកស្តាប់វ័យក្មេងនាពេលថ្មីៗនេះ គឺ Vietnam Gameverse ២០២៤ នៅទីក្រុងហូជីមិញ។ ក្នុងសំបុត្រផ្ញើមកកាន់កម្មវិធី មិត្តអ្នកស្តាប់ ឡាយ សុខឃាង មកពីខេត្តតាកែវ ប្រទេសកម្ពុជា ដែលបច្ចុប្បន្នកំពុងធ្វើការនៅទីក្រុងហូជីមិញ បានចែករំលែកថា៖ “ពេលខ្ញុំមកលេង Vietnam Gameverse ២០២៤ ខ្ញុំឃើញថា ប្រជាជនវៀតណាមលែងមានការរើសអើងចំពោះលេងហ្គេមទៀតហើយ ហើយថែមទាំងមានទស្សនៈបើកចំហយ៉ាងខ្លាំងចំពោះការអភិវឌ្ឍនៃឧស្សាហកម្មនេះ។ មិនត្រឹមតែក្មេងៗប៉ុណ្ណោះទេ ប៉ុន្តែឪពុកម្តាយជាច្រើនក៏មកជាមួយកូនៗដើម្បីចូលរួមក្នុងកម្មវិធីនេះដែរ”។

មិត្ត ឡាយ សុខឃាង និងប្រិយមិត្តជាទីមេត្រី។ Vietnam GameVerse ២០២៤ ក្រោមប្រធានបទ Beyond the game មានគោលបំណងក្លាយជាព្រឹត្តិការណ៍ហ្គេមដ៏មានកិត្យានុភាពមួយនៅក្នុងទីផ្សារទាំងក្នុងស្រុកនិងអន្តរជាតិ។ នេះជាឆ្នាំទីពីរហើយដែលត្រូវបានរៀបចំឡើង Vietnam GameVerse បានពង្រីកទំហំនិងគុណភាពរបស់ខ្លួន ជាមួយនឹងសកម្មភាពគួរឲ្យទាក់ទាញជាច្រើន ដោយប្រព្រឹត្តិទៅក្នុងរយៈពេលពីរថ្ងៃចាប់ពីថ្ងៃទី ១១-១២ ខែឧសភា នៅកីឡាដ្ឋាន Phu Tho ខណ្ឌ ១១ ទីក្រុងហូជីមិញ ដោយមានអ្នកចូលរួមជាង ៤០.០០០នាក់។ អាជីវកម្មដែលបានចូលរួមនិងអំដំណើរក្នុងកម្មវិធីក៏បានកើនឡើងបីដង ចំនួនអាជីវកម្មអន្តរជាតិដែលចូលរួមក្នុងព្រឹត្តិការណ៍នេះក៏បានកើនឡើង ៥ ដងបើធៀបនឹងឆ្នាំមុន ក្នុងនោះ រួមទាំងក្រុមហ៊ុនបច្ចេកវិទ្យាធំៗដូចជា Meta Google Apple ផងដែរ។

ក្នុងក្របខណ្ឌនៃព្រឹត្តិការណ៍នេះ ក៏បានប្រព្រឹត្តិទៅកម្មវិធីដ៏គួឲ្យទាក់ទាញជាច្រើន ដូចជាការតាំងពិព័រណ៍ហ្គេម ផលិតផលនិងសេវាកម្មនៅក្នុងឧស្សាហកម្មហ្គេម; សង្វៀនហ្គេមផ្ទាល់នៅក្នុងព្រឹត្តិការណ៍; ការប្រឡង Cosplay និងក្បួនដង្ហែរ Cosplay ផងដែរ។

ផលិតផលគ្រឿងអលង្កាដែលផលិតដោយសិប្បករនៅភូមិ Ke Mon មានភាពសម្បូរបែប ចាប់ពីកងដៃ ចិញ្ចៀន ខ្សែដៃ ខ្សែក និងក្រវិលធ្វើពីមាសឬប្រាក់។

ក្នុងសប្តាហ៍កន្លងទៅ យើងខ្ញុំក៏ទទួលបានសំបុត្រពីមិត្តអ្នកស្តាប់ ជា សុខចាន់ មកពីកម្ពុជា ដែលចង់ស្វែងយល់អំពីភូមិសិប្បកម្ម Ke Mon នៅស្រុក Phong Dien ខេត្ត Thua Thien Hue ដែលត្រូវបានចាត់ទុកថា ជាដើមកំណើតនៃមុខរបរ ជាងទងវៀតណាម។

ប្រិយមិត្តជាទីមេត្រី អតីតរាជធានី Hue មានភូមិសិប្បកម្មប្រពៃណីជាច្រើន ដែលនាំមកនូវផលិតផលគុណភាពខ្ពស់។ ក្នុងនោះ ភូមិជាងទង Ke Mon មានភាពល្បីល្បាញដោយមានផលិតផលចម្លាក់និងគ្រឿងអលង្ការធ្វើពីមាសនិងប្រាក់ ដែលបម្រើដល់តម្រូវការគ្រឿងអលង្ការនិងការតុបតែងរបស់អ្នកស្រុកនិងនាហ្មឺនមន្ត្រីក្នុងរាជធានី Hue តាំងពីចុងសតវត្សរ៍ទី១៨។ ផលិតផលគ្រឿងអលង្ការនៅ Ke Mon មានភាពល្បីល្បាញដោយសារគុណភាពល្អ បើធៀបនឹងកន្លែងផ្សេងទៀត ជាមួយនឹងបច្ចេកទេសដ៏ប៉ិនប្រសប់ ត្រូវបានធ្វើឡើងដោយសិប្បករដែលមានបទពិសោធន៍ ជំនាញខ្ពស់ និងច្នៃប្រឌិត ដែលបង្ហាញយ៉ាងច្បាស់បំផុតនៅលើគ្រឿងអលង្ការដូចជា កងដៃ ចិញ្ចៀន ខ្សែដៃ ខ្សែក និងក្រវិលធ្វើពីមាសឬប្រាក់។

ក្រោយការអភិវឌ្ឍអស់រយៈពេលជាង២០០ឆ្នាំ មុខរបរជាងទងនៅភូមិ Ke Mon នៅតែត្រូវបានរក្សាទុកដោយអ្នកភូមិជាច្រើនជំនាន់។ នៅពេលមកកាន់ Ke Mon ភ្ញៀវទេសចរអាចទស្សនាដោយផ្ទាល់ ឬចូលរួមក្នុងដំណាក់កាលផលិតគ្រឿងអលង្ការប្រពៃណីនៅទីនេះ។

មកកាន់ Na Bo ភ្ញៀវទេសចរអាចពិសោធន៍ការបោះតង់នៅលើបែអណ្តែតទឹកនៅកណ្តាលទន្លេ ទទួលទានអាហារពិសេសប្រចាំតំបន់នៅលើបែ និងជ្រមុជខ្លួននៅក្នុងទឹកទន្លេខៀវស្រងាត់។

មុននឹងបញ្ចប់នាទីប្រអប់សំបុត្រនៃសប្តាហ៍នេះ យើងខ្ញុំសូមឧទ្ទេសនាមដល់ប្រិយមិត្តអំពី កន្លែងបោះតង់នៅលើបែអណ្តែតលើទន្លេ Boi នៅភូមិ Na Bo ស្រុក Kim Boi ខេត្ត Hoa Binh។ មានចម្ងាយតិចជាង ២ ម៉ោង ជិះឡានពីរដ្ឋធានីហាណូយ ជាមួយនឹងទេសភាពធម្មជាតិដ៏ស្រស់ស្អាត Na Bo គឺជាកន្លែងបោះតង់ដ៏ល្អនៅចុងសប្តាហ៍ សម្រាប់អ្នកដែលចូលចិត្តការស្រាវជ្រាវ ស្វែងយល់ធម្មជាតិ។ នេះក៏ជាកន្លែងដែលអ្នកស្តាប់ គឹម សោភ័ណ្ឌ កម្ពុជាចង់ស្វែងយល់ផងដែរ។

មិត្ត គឹម សោភ័ណ្ឌ និងប្រ័យមិត្តជាទីមេត្រី។ ដោយត្រូវបានធម្មជាតិប្រទានអំណោយនូវទេសភាពនិងបរិស្ថានស្រស់ស្អាត ផ្នែកទន្លេ Boi នៅភូមិ Na Bo មានទឹកថ្លានិងត្រជាក់ស្រួល ហូរកាត់ជួរភ្នំថ្មកំបោរពណ៌បៃតង ទន្លេមានជម្រៅប្រហែល ១ ម៉ែត្រ បានបង្កើតជាឆ្នេរងូតទឹកទន្លេធម្មជាតិ ដែលកម្រមាន។ ទេសភាពព្រៃភ្នំស្រស់បំព្រង ជាមួយភ្នំថ្មកំបោរនៅជុំវិញ បានទាក់ទាញប្រជាជនទាំងក្នុងនិងក្រៅខេត្តមកសម្រាកលំហែកាយនៅថ្ងៃចុងសប្តាហ៍ ថតរូប check-in និងរក្សាទុករូបភាពស្អាតៗ។

មកកាន់ Na Bo ភ្ញៀវទេសចរអាចពិសោធន៍ការបោះតង់នៅលើបែអណ្តែតទឹកនៅកណ្តាលទន្លេ ទទួលទានអាហារពិសេសប្រចាំតំបន់នៅលើបែ និងជ្រមុជខ្លួននៅក្នុងទឹកទន្លេខៀវស្រងាត់។ នៅរដូវក្តៅ នៅពេលដែលទឹកទន្លេរីងស្ងួត អ្នកអាចរៀបចំតុ និងកៅអី ដើម្បីគយគន់ទេសភាពនៅកណ្តាលទន្លេ បង្កើតជាបទពិសោធន៍ដ៏គួរឱ្យចាប់អារម្មណ៍ និងប្លែកពីគេ៕