ប្រធានរដ្ឋវៀតណាម លោក Nguyen Xuan Phuc (ពេលនោះជានាយករដ្ឋមន្រ្តី) ថ្លែងមតិនៅពិធីបើកសម្ពោធរោងចក្រផលិតរថយន្ត Vinfast នាថ្ងៃទី ១៤ ខែមិថុនា ឆ្នាំ២០១៩។ (រូបថត៖  nhandan.vn)

ថ្លែងមតិនៅពិធីបើកសម្ពោធរោងចក្រផលិតរថយន្ត Vinfast នាថ្ងៃទី ១៤ ខែមិថុនា ឆ្នាំ២០១៩ ប្រធានរដ្ឋវៀតណាម លោក Nguyen Xuan Phuc (ពេលនោះជានាយករដ្ឋមន្រ្តី) បានវាយតម្លៃខ្ពស់ចំពោះក្រុមហ៊ុន ដែលបានពន្លឿនគម្រោង ហើយបញ្ចប់លឿនជាង ៣ ខែបើប្រៀបធៀបនឹងផែនការដំបូង ដោយបង្ហាញពីបំណងប្រាថ្នាដ៏ខ្លាំងក្លា របស់អ្នកដែលរួមកម្លាំងកាយចិត្ត  បង្កើតឡើងអព្ភូតហេតុថ្មីនៃឧស្សាហកម្មរថយន្តវៀតណាមក៏ដូចជាពិភពលោក៖ “មានមតិមួយចំនួន ដែលសង្ស័យអំពីគោលបំណងពិតរបស់ក្រុមហ៊ុន Vinfast ក៏ដូចជាការព្រួយបារម្ភជាច្រើន អំពីហានិភ័យនិងការសាកល្បងដែលក្រុមហ៊ុន Vinfast ត្រូវប្រឈមមុខ ខណៈពេលដែល ហ៊ានចាប់យកឧស្សាហកម្មដែលពិភពលោកមានប្រវត្តិនៃការអភិវឌ្ឍន៍ជាង ១០០ ឆ្នាំមកហើយ ដែលជាឧស្សាហកម្មមួយដែលមានកាប្រកួតប្រជែងដ៏ខ្លាំងក្លា។ ឧស្សាហកម្មមួយដែលវៀតណាមបានខិតខំប្រឹងប្រែងអស់ជាច្រើនទសវត្សមកហើយ ប៉ុន្តែមិនទាន់ទទួលបាន "ផ្លែផ្កា" ឡើយ។ ការបង្កើតរោងចក្ររថយន្ត Vinfast នៅថ្ងៃនេះ បានរួមចំណែកក្នុងការលុបចោលនូវការសង្ស័យមួយចំនួននោះ។”

ជាមួយតួនាទីសំខាន់របស់ Vinfast ចំពោះឧស្សាហកម្មរថយន្តក្នុងស្រុក និងខឿនសេដ្ឋកិច្ច លោកនាយករដ្ឋមន្រ្តីបានស្នើថា៖ ជាមួយនឹងទីផ្សារមានប្រជាជនជិត ១០០លាននាក់ វណ្ណៈកណ្តាលទើបលេចចេញបានកើនឡើងយ៉ាងឆាប់រហ័ស ប៉ុន្តែអត្រាម្ចាស់កម្មសិទ្ធិរថយន្តនៅតែមានទាបណាស់ ត្រឹមតែ ២១គ្រឿង/១០០០នាក់ បើប្រៀបធៀបទៅនឹងសហរដ្ឋអាមេរិកដែលមាន ៧៩០ គ្រឿង / ១០០០ នាក់ ឬប្រទេសថៃមានកម្រិត ២០៤ គ្រឿង / ១០០០នាក់៖ “យើងមិនត្រឹមតែចាត់ទុកនេះគឺជាទីផ្សារធំ ពោរពេញទៅដោយសក្តានុពលប៉ុណ្ណោះទេ ប៉ុន្តែក៏ជាប្រភពធនធានដ៏សំខាន់សម្រាប់ការអភិវឌ្ឍប្រកបដោយចីរភាព និងសមត្ថភាពបង្កើនល្បឿនរបស់ Vinfast ផងដែរ ។ ហេតុអ្វីដែលយើងមិនអាចរួមគ្នាផលិតរថយន្ត១គ្រឿងដែលគំនិតនិងបច្ចេកវិទ្យារទូទៅរបស់វា ត្រូវបានចែករំលែកនិងពេញនិយមជាង ១០០ឆ្នាំមកហើយ។ Vinfast គឺជាកន្លែងដែលកំពុងប្រមូលផ្តុំមនុស្សឆ្នើម ប៉ុន្តែប្រសិនបើចេះរួមបញ្ចូលកម្លាំងរបស់ប្រជាជនជិត ១០០លាននាក់ កម្លាំងចលករនោះនឹងកាន់តែធំជាងនេះទៅទៀត។ សមិទ្ធផលបច្ចេកវិទ្យា ៤.០ បានជួយតភ្ជាប់នូវ បញ្ញាសម្មារតីរបស់យើងជាមួយគ្នា។ ក្រុមហ៊ុន Vinfast នឹងទទួលបានកម្លាំង ការគាំទ្រ និងការរួមចំណែករបស់ប្រជាជនវៀតណាម នៅពេលដែលផលប្រយោជន៍របស់ Vinfast ផ្សារផ្ជាប់យ៉ាងរឹងមាំជាមួយផលប្រយោជន៍របស់អតិថិជន និងដើម្បីផលប្រយោជន៍របស់វៀតណាម។”

ជាអគ្គនាយកសកលនៃក្រុមហ៊ុន Vinfast លោកស្រី Le Thi Thu Thuy និងអភិបាលរដ្ឋ North Carolina លោក Roy Cooper ក្នុងពិធីចុះហត្ថលេខា Mou ស្តីពីគម្រោងសាងសង់រោងចក្រ Vinfast នៅសហរដ្ឋអាមេរិកក្នុងខែមីនា ឆ្នាំ ២០២២។ (រូបភាព៖ nhandan.vn)

មិនត្រឹមតែទីផ្សារក្នុងស្រុកប៉ុណ្ណោះទេ នៅថ្ងៃទី ១២ ខែកក្កដាឆ្នាំ ២០២១ VinFast បានដាក់ឲ្យដំណើរការនូវសាខានៅសហរដ្ឋអាមេរិក កាណាដា បារាំង អាល្លឺម៉ង់និងហូឡង់ ត្រៀមខ្លួនសម្រាប់ការចាប់ផ្តើមនៅទីផ្សារអន្តរជាតិផងដែរ។ នៅចុងខែមីនាឆ្នាំ ២០២២ VinFast និងរដ្ឋបាលរដ្ឋ North Carolina សហរដ្ឋអាមេរិក បានចុះហត្ថលេខាលើអនុស្សរណៈយោគយល់គ្នាស្តីពីការសាងសង់រោងចក្រផលិតរថយន្តអគ្គិសនី និងថាមពលដំបូងរបស់ VinFast នៅទីផ្សារអាមេរិកខាងជើង។ គម្រោងការណ៍មានតម្លៃ ២ ពាន់លានដុល្លារអាមេរិក របស់ក្រុមហ៊ុនVinfast ត្រូវបានអាជ្ញាធរអាមេរិកគាំទ្រនិងស្វាគមន៍។ រដ្ឋមន្ត្រីក្រសួងថាមពល និងរដ្ឋមន្ត្រីពាណិជ្ជកម្មអាមេរិក សុទ្ធតែបានវាយតម្លៃខ្ពស់ ចំពោះគម្រោងរបស់ Vinfast ក្នុងកិច្ចខិតខំប្រឹងប្រែងកសាងខឿនសេដ្ឋកិច្ច ថាមពលស្អាត របស់រដ្ឋបាលលោកប្រធានាធិបតី Biden។ រដ្ឋមន្ត្រីក្រសួងថាមពលអាមេរិក លោកស្រី Jennifer Granholm បានឲ្យដឹងថា៖ “Vinfast គឺជាឧទាហរណ៍ថ្មីបំផុតអំពីការដែលក្រុមហ៊ុននានារួមចំណែកដល់ការខិតខំប្រឹងប្រែង កសាងខឿនសេដ្ឋកិច្ចថាមពលស្អាតរបស់លោកប្រធានាធិបតី Biden តាមរយៈការវិនិយោគដ៏ធំធេងរបស់ពួកគេ។ ប្រាកដណាស់ថា Vinfast នឹងមិនមែនជាក្រុមហ៊ុនចុងក្រោយដែលចូលរួមក្នុងកិច្ចខិតខំប្រឹងប្រែងនេះទេ។ ជាថ្មីម្ដងទៀត ខ្ញុំសុំថ្លែងអំណរគុណដល់ Vinfast ដែលបានជ្រើសរើស ធ្វើការវិនិយោគនៅសហរដ្ឋអាមេរិក ដោយជួលពលករនៅសហរដ្ឋអាមេរិក និងជួយយើងខ្ញុំ ឯករាជ្យជាងក្នុងវិស័យថាមពល។”

ឯកអគ្គរដ្ឋទូតវៀតណាមប្រចាំនៅសហរដ្ឋអាមេរិក លោក Nguyen Quoc Dung បានឲ្យដឹងថា រហូតមកដល់ពេលនេះមានគម្រោងការណ៍ជាង ៧០គម្រោង ដោយមានដើមទុនប្រមាណ ៣០០លានដុល្លារ របស់សហគ្រាសវៀតណាមដែលវិនិយោគនៅអាមេរិក ប៉ុន្តែ នេះគឺជាលើកទីមួយហើយដែលមានគម្រោងធំបែបនេះ ដែលបានបង្កើតការងាររាប់ពាន់សម្រាប់ប្រជាជនអាមេរិក៖ “នេះគឺជាព្រឹត្តិការណ៍ពិសេស និងមានអត្ថន័យខ្លាំងណាស់ ហើយបានបញ្ជាក់ពីប្រការសំខាន់ចំនួនបី។ ទីមួយ នេះគឺជាលទ្ធផលនៃការអភិវឌ្ឍយ៉ាងឆាប់រហ័សនូវទំនាក់ទំនងរវាងវៀតណាមនិងអាមេរិក ចាប់តាំងពីពេលធ្វើប្រក្រតីភាពទំនាក់ទំនងរហូតមកដល់បច្ចុប្បន្ននេះ។ ទីពីរ បានបង្ហាញនូវភាពរឹងមាំយ៉ាងឆាប់រហ័សនិងលោតផ្លោះរបស់វៀតណាម និងសហគ្រាសវៀតណាម។ នាបច្ចុប្បន្ន វៀតណាមនិងបណ្ដាសហគ្រាសវៀតណាមមានសមត្ថភាពគ្រប់គ្រាន់ ដើម្បីឈានចូលខឿនសេដ្ឋកិច្ចអន្តរជាតិ ហើយអាចឈានទៅកាន់ទីផ្សារនៅឆ្ងាយដូចជាអាមេរិក។ ទីបីបានបង្ហាញពីអនាគតភ្លឺស្វាងនៃទំនាក់ទំនងរវាងវៀតណាមអាមេរិក។ សក្តានុពលនៃប្រទេសទាំងពីរនៅតែមានច្រើន។ ជាមួយនឹងប្រជាជនវៀតណាមជាង ២ លាននាក់ដែលកំពុងរស់នៅសហរដ្ឋអាមេរិក ហើយនិស្សិតវៀតណាមរាប់ម៉ឺននាក់ កំពុងសិក្សារៀនសុត្រនៅអាមេរិក ក៏ដូចជាការយកចិត្តទុកដាក់ ការគាំទ្រ និងការជំរុញរបស់សហគ្រាសនៃភាគីទាំងពីរបានបង្ហាញថា សក្តានុពលអភិវឌ្ឍន៍នៃទំនាក់ទំនងរវាងភាគីទាំងពីរគឺធំធេងណាស់។ ខ្ញុំជឿជាក់ថា ភាពជោគជ័យរបស់ Vinfast គឺជាការលើកទឹកចិត្តដល់សហគ្រាសវៀតណាមជាច្រើនក៏យកចិត្តទុកដាក់ដល់ទីផ្សារអាមេរិក ហើយនឹងចាប់ផ្តើមការវិនិយោគជាច្រើនថែមទៀត។”

រហូតមកដល់ពេលនេះ Vinfast បានផលិតម៉ូដែលរថយន្តចំនួន ៥ រួមមាន៖ Vinfast Fadil, Vinfast VF e34 (រថយន្តអគ្គិសនី), Vinfast Lux SA2.0, Vinfast Lux A2.0 និង Vinfast President។ បច្ចុប្បន្នរថយន្ត Vinfast គឺជាម៉ាកយានយន្តដែលពេញនិយមបំផុតនៅក្នុងទីផ្សាររថយន្តវៀតណាម៕