អ្នកនាង Patthida Bunchavalit

«  ជម្រាបសួរប្រិយមិត្តជាទីរាប់អាន! ថ្ងៃនេះ Admin (អ្នកគ្រប់គ្រង Fanpage) នឹងបកប្រែសារខ្លីមួយ សូមអញ្ជើញមិត្តទាំងអស់ស្តាប់ជាមួយគ្នាណា៎។ នាងខ្ញុំបានជ្រើសរើសព័ត៌មានប្រភេទនេះ ពីព្រោះនាងខ្ញុំសង្កេតឃើញថានៅប្រទេសថៃគ្មានព័ត៌មានប្រភេទនេះនៅលើកាសែតបោះពុម្ភនោះទេ។ ព័ត៌មានខ្លីនេះនឹងបង្ហាញឱ្យប្រជាជនថៃដឹងថា សម្រាប់ប្រជាជនវៀតណាម ការសិក្សារៀនសូត្រមានសារៈសំខាន់យ៉ាងណា។ ហើយព័ត៌មានខ្លីមួយនេះត្រូវបានដាក់ក្នុងរូបប្រអប់តូចមួយ។ នេះជាការជូនដំណឹងអំពីការប្រឡងការពារនិក្ខេបបទថ្នាក់បណ្ឌិតរបស់សាកលវិទ្យាល័យជាតិ ... »

ប្រិយមិត្តទើបតែស្តាប់សំឡេងខ្លីមួយអំពីការណែនាំរបស់អ្នកនាង Patthida Bunchavalit នៅលើបណ្តាញហ្វេសប៊ុក (facebook) ក្រោមចំណងជើងថា «  Talk About Vietnamese" ។ ជាមួយនឹងសក់ខ្មៅខ្លី ពាក់វ៉ែនតា រាងខ្ពស់ស្រឡះ បើមើលពីខាងក្រៅរាងកាយរបស់អ្នកនាងរូបនេះ គ្មាននរណាម្នាក់អាចគិតថា អ្នកនាង Patthida ជាជនជាតិថៃ និងចេះនិយាយភាសាវៀតណាមយ៉ាងច្បាស់លាស់ណាស់ផងដែរ។ អ្នកនាង Patthida កំពុងសិក្សាថ្នាក់បណ្ឌិតផ្នែកភាសាវៀតណាមនៅសាកលវិទ្យាល័យវិទ្យាសាស្ត្រនិងមនុស្សសាស្រ្តវៀតណាម ហើយនាបច្ចុប្បន្ននេះអ្នកនាងក៏ជាអ្នកគ្រប់គ្រងទំព័រ facebook ក្រោមចំណងជើងថា “Talk About Vietnamese" ដែលមានអ្នកតាមដានជិត ៧០០០ នាក់។ ទំព័រនេះក៏បានផ្តល់ជូននូវព័ត៌មានជាច្រើនអំពីប្រទេសវៀតណាម ទាំងភាសាថៃ និងភាសាវៀតណាមតាមរយៈរូបភាព ឬវីដេអូឃ្លីបអំពីម្ហូបវប្បធម៌ គោលដៅទេសចរណ៍ ឬជីវភាពរស់នៅប្រចាំថ្ងៃរបស់ប្រជាជនវៀតណាមផងដែរ។ ហេតុដូច្នេះទំព័រនេះបានទាក់ទាញការតាមដានដ៏ធំនិងចម្រុះពីសំណាក់សិស្សានុសិស្ស គ្រូបង្រៀន រហូតដល់ មនុស្សធ្វើការផ្សេងៗទៀត ប៉ុន្តែពួកគេទាំងអស់សុទ្ធសឹងតែមានចំណាប់អារម្មណ៍រួមដល់ប្រទេសវៀតណាមផងដែរ។ 

“ ខ្ញុំជាគ្រូបង្រៀនភាសាវៀតណាម។ ខ្ញុំបានតាមដានទំព័រ “Talk About Vietnamese"  តាំងពីច្ងៃដើមដំបូងឡើយ។ ជាពិសេសនៅក្នុងរយៈពេលកំពុងរៀនភាសាវៀតណាម។ ទំព័រនេះបានផ្តល់ព័ត៌មានល្អៗជាច្រើនអំពីភាសាវៀតណាម ហើយថែមទាំងមានរឿងជាច្រើនអំពីប្រវត្តិសាស្ត្រវៀតណាម ម្ហូបវៀត  ណាម ក៏ដូចជាគោលដៅទេសចរណ៍ជាដើម ដែលជួយខ្ញុំអាចហ្វឹកហាត់និងរៀនភាសាវៀតណាមឲ្យបានស្ទាត់ជំនាញផងដែរ។ ខ្ញុំសូមអរគុណម្ចាស់ទំព័រនេះដែលបានចែករំលែកព័ត៌មានអំពីភាសាវៀតណាម»។

អ្នកនាង Patthida Bunchavalit

សមាជិកនៃទំព័រ “Talk About Vietnamese" មិនត្រឹមតែប្រជាជនថៃដែលចូលចិត្តភាសាវៀតណាមនិងចាប់អារម្មណ៍វៀតណាមប៉ុណ្ណោះទេ ប៉ុន្តែថែមទាំង មានប្រជាជនវៀតណាមជាច្រើន ដែលរៀនភាសាថៃ និងចូលចិត្តភាសាថៃទៀតផង។ ការចុចមើលទំព័រនេះ សមាជិកដែលស្រឡាញ់ភាសាថៃ ជាពិសេសគឺនិស្សិតដែលកំពុងសិក្សាភាសាថៃ ឬអ្នកដែលធ្លាប់បានធ្វើការឱ្យក្រុមហ៊ុនថៃក៏អាចសិក្សបន្ថែមទៀតអំពីចំណេះដឹង និងស្វែងរកការងារធ្វើដែលទាក់ទងនឹងភាសាថៃ ក៏ដូចជាស្វែងយល់អំពីប្រទេសថៃឲ្យកាន់តែច្បាស់លាស់ទៀតផង។ ចែករំលែកអំពីថ្ងៃដំបូងនៃការបង្កើតទំព័រនេះ អ្នកស្រី Patthida បានឲ្យដឹងថា៖ ទំព័រនេះត្រូវបានអ្នកនាងបង្កើតឡើងចាប់តាំងពីឆ្នាំ ២០១២ នៅពេលដែលអ្នកនាងនៅតែរស់នៅទីក្រុងបាងកក។ គោលបំណងដំបូងនៅពេលបង្កើតទំព័រនេះគឺដោយសារតែអ្នកនាងចង់សរសេរសៀវភៅកំណត់ហេតុ និងកត់ត្រាទុកនូវចំណេះដឹងជាប្រចាំថ្ងៃ រឺក៏អ្វីៗដែលអ្នកនាងទើបតែដឹងអំពីប្រទេសវៀតណាមតែប៉ុណ្ណោះ ។ បន្ទាប់ពីនោះ ដោយឃើញថាមានចំនួនមនុស្សចាប់អារម្មណ៍និងតាមដានទំព័រនេះកាន់តែច្រើនឡើង ហេតុដូច្នេះ អ្នកនាង Patthida ក៏បានគិតពីគោលបំណងចង់ចែករំលែកចំណេះដឹង និងការយល់ដឹងអំពីប្រទេសវៀតណាមសម្រាប់មនុស្សជាច្រើនដែលមានចំណាប់អារម្មណ៍ដូចរូបអ្នកនាងផ្ទាល់តែម្តង។អ្នកនាង Patthida បានចែករំលែកថា៖

 «នាបច្ចុប្បន្ន ទំព័រនេះមានអ្នកតាមដានជាង ៦០០០ នាក់ ដូច្នេះរាល់ពេលដែលខ្ញុំបង្ហោះអត្ថបទមួយ ខ្ញុំក៏ត្រូវតែរកមើលដោយយោងទៅលើព័ត៌មានមានប្រភពដើមត្រឹមត្រូវនិងសមស្របផងដែរ។ ឥឡូវនេះ ទំព័រនេះមានគោលបំណងបន្ថែមក្នុងការចែករំលែកការងារ ទាក់ទងទៅនឹងភាសាវៀតណាមនិងថៃ ព្រមទាំងណែនាំអំពីមុខម្ហូបវៀតណាមនៅថៃ និងមុខម្ហូបវៀតណាមនៅវៀតណាមសម្រាប់ប្រជាជនថៃផងដែរ។ ដូចថ្ងៃនេះដែរ ខ្ញុំទើបតែទទួលបានសារមួយដែល ពឹងពាក់ថាជួយរកមិត្តភ័ក្តិដែលបាត់ទំនាក់ទំនងនៅវៀតណាម ហើយក៏មានសារសួរអំពីភាសាពីសំណាក់បងប្អូននិស្សិតនៅប្រទេសថៃនិងវៀតណាម ក៏ដូចជាសំណួរមួយចំនួនអំពីការស្វែងរកការងារផងដែរ»។

បន្ទាប់ពីការពារនិក្ខេបបទថ្នាក់បណ្ឌិត អ្នកនាង Pathida មិនអាចលាក់បាំងអារម្មណ៍របស់ខ្លួននៅពេលដែលអ្នកនាងនិយាយអំពីពាក្យថា «វៀតណាម» នោះទេ

និយាយអំពីនិស្ស័យនៃការចាប់ផ្តើមរៀនភាសាវៀតណាមនិងការជក់ចិត្ត រៀនភាសានេះ អ្នកនាង Patthida បានឲ្យដឹងថា អ្នកនាងស្រលាញ់ភាសាវៀតណាមតាមបែបធម្មជាតិ ហើយនៅពេលដែលអ្នកនាងស្រឡាញ់ភាសានេះពិតប្រាកដ ក៏ជាពេលវេលាដែលអ្នកនាងដឹងខ្លួនថាខ្លួនឯងក៏ជាមនុស្សដែលមាន  «ញាត្តិសណ្តានវៀតណាម» ផងដែរ ។ អ្នកនាង Patthida បានបន្ថែមទៀតថា៖

«ពិតណាស់ថា ខ្ញុំទើបតែដឹងថាខ្ញុំជាអាណិកជនវៀតណាមពីព្រោះគ្មាននរណាម្នាក់នៅក្នុងគ្រួសាររបស់ខ្ញុំនិយាយអំពីរឿងរ៉ាវនេះ ឬក៏អំពីប្រភពដើមរបស់ខ្ញុំមកពីណីពីណានោះទេ។ ប៉ុន្តែខ្ញុំចូលចិត្តរៀនភាសាវៀតណាមតាំងពីខ្ញុំជានិស្សិតឆ្នាំទី ៣ នៃសាកលវិទ្យាល័យ Khon Ken ។ បន្ទាប់ពីបញ្ចប់ការសិក្សានៅសាកលវិទ្យាល័យ ខ្ញុំបានទៅធ្វើការអស់រយៈពេល ១ ឆ្នាំ ហើយមានអារម្មណ៍ថា ចង់រៀនភាសាបរទេសថែមមួយទៀត ប៉ុន្តែមិនមែនភាសាអង់គ្លេសទេ។ កាលពីននោះ ខេត្ត Nakhon Phanom និងសាកលវិទ្យាល័យ Tra Vinh ទើបតែមានកិច្ចសហការនិងផ្លាស់ប្តូរនិស្សិតទៅវិញទៅមក ហេតុដូច្នេះខ្ញុំក៏បានចុះឈ្មោះទៅ រៀននៅសាកលវិទ្យាល័យ Tra Vinh អស់រយៈពេល ១ ឆ្នាំ។ បន្ទាប់ពីបញ្ចប់ការសិក្សា ខ្ញុំបានត្រឡប់មកសិក្សាថ្នាក់អនុបណ្ឌិតនៅសាកលវិទ្យាល័យ Mahasa rakham ។ ក្រោយពីបញ្ចប់ការសិក្សាថ្នាក់អនុបណ្ឌិត ខ្ញុំបានចាប់ផ្តើមបង្រៀនភាសាវៀតណាមជាផ្លូវការនៅតាមសាកលវិទ្យាល័យមួយចំនួន។ នាបបច្ចុប្បន្នខ្ញុំកំពុងបង្រៀននៅឯសាកលវិទ្យាល័យ Ramkhamheang»។

ទាក់ទងនឹងគោលបំណងនៅវិលត្រឡប់មកប្រទេសកំណើតវិញ បន្ទាប់ពីការពារនិក្ខេបបទថ្នាក់បណ្ឌិត អ្នកនាង Pathida មិនអាចលាក់បាំងអារម្មណ៍របស់ខ្លួននៅពេលដែលអ្នកនាងនិយាយអំពីពាក្យថា «វៀតណាម» នោះទេ។ អ្នកនាងបានអះអាងថានឹងត្រឡប់មកប្រទេសវៀតណាមជារៀងរាល់ឆ្នាំពីព្រោះអស់រយៈពេលជាង ៣ ឆ្នាំដែលបានសិក្សានៅទីក្រុងហាណូយ អ្នកនាងចាត់ទុកវៀតណាមជាស្រុកកំណើតទី២របស់អ្នកនាង។ នៅពេលដែលភាសាវៀតណាមរបស់ខ្លួន កាន់តែល្អស្ទាត់ជំនាញហើយ អ្នកនាងចង់ក្លាយទៅជា«ស្ពានតភ្ជាប់» ក្នុងការចែករំលែកព័ត៌មាន ដើម្បីជួយប្រជាជនថៃឱ្យកាន់តែយល់ច្បាស់លាស់និងស្រឡាញ់ប្រទេសវៀតណាម ដូចក្តីស្រឡាញ់ដែលអ្នកនាងបានផ្តល់ជូនចំពោះប្រទេសវៀតណាមផងដែរ៕