ភ្ញៀវអញ្ជើញចូលរួមការចាក់ចញ្ចាំងខ្សែភាពយន្ត។

“Love Destiny ២” ជាខ្សែភាពយន្តមនោសញ្ចេតនាប្រវត្តិសាស្ត្រថៃ ដែលចាប់ផ្ដើមបានចាក់បញ្ចាំងនៅរោងភាពយន្តក្នុងឆ្នាំ ២០២២ របស់អ្នកដឹកនាំរឿង Adisorn Tresirikasem។ ខ្សែភាពយន្តនេះត្រូវបានក្រុមហ៊ុន GDH ៥៥៩ និងទូរទស្សន៍ថៃសហការផលិត ហើយជាគម្រោងមួយក្នុងចំណោមគម្រោងបន្ទាប់ទាំង២ នៃរឿងភាគទូរទស្សន៍ Love Destiny ឆ្នាំ២០១៨ ដែលទទួលបានជោគជ័យយ៉ាងខ្លាំង។ ទោះបីជាមានរយៈពេលរហូតដល់ ១៦៦ នាទីក៏ដោយ ប៉ុន្តែខ្សែភាពយន្តនេះនៅតែទទួលបានការពេញនិយមពីសំណាក់ទស្សនិកជន អាស្រ័យដោយមានរឿងស្នេហាថ្មីទាំងស្រុង បើប្រៀប
ធៀបទៅនឹងកំណែទូរទស្សន៍ ជាមួយនឹងភាពកំប្លែង គួបផ្សំនឹងភាពល្អិតល្អន់ខាងរូបភាពនិងសំឡេង។ ចូលរួមក្នុងការចាក់បញ្ចាំងបង្ហាញខ្សែភាពយន្តនេះ លោកស្រី Morakot Janemathukorn ភារធារីថៃបានឲ្យដឹងថា៖

“ការចាក់បញ្ចាំងខ្សែភាពយន្តនេះមានអត្ថន័យសម្រាប់ទាំងជនជាតិថៃ និងវៀតណាម។ ខ្ញុំគិតថា ការយោគយល់គ្នាទៅវិញទៅមក គឺជាមូលដ្ឋានគ្រឹះដ៏សំខាន់ដើម្បីពង្រឹងមិត្តភាពនិងកិច្ចសហប្រតិបត្តិការឲ្យកាន់តែរឹងមាំ។ ប្រការល្អបំផុតគឺប្រជាជននៃប្រទេសនីមួយៗមានអារម្មណ៍ស្និទ្ធស្នាល និងមនោសញ្ចេតនាសម្រាប់គ្នាទៅវិញទៅមកដូចមិត្តភក្តិអញ្ចឹង។ ប្រការនេះនឹងជួយឲ្យកិច្ចសហប្រតិបត្តិការរបស់យើងកាន់តែងាយស្រួល ហើយទំនាក់ទំនងកាន់តែជិតស្និទ្ធ”។

នេះក៏ជាឱកាសដើម្បីផ្សព្វផ្សាយឧស្សាហកម្មភាពយន្តរបស់ថៃ ហើយនាំយកវប្បធម៌ថៃខិតមកជិតយុវជនវៀតណាមផងដែរ។

ក្នុងក្របខណ្ឌនៃការចាក់បញ្ចាំងខ្សែភាពយន្ត ស្ថានទូតថៃក៏បានរៀបចំសកម្មភាពគួរឲ្យចាប់អារម្មណ៍ជាច្រើន ដូចជាការប្រឡងអ្នកស្លៀកសំលៀកបំពាក់ថៃស្អាតបំផុត ដោយមានការចូលរួមពីយុវជនវៀតណាមយ៉ាងច្រើនកុះករក្នុងសំលៀកបំពាក់ថៃ។ ទស្សនិកជនដែលមកទស្សនាខ្សែភាពយន្ត ក៏បានរីករាយជាមួយនឹងម្ហូបអាហារថៃផងដែរ។ និស្សិតមួយក្រុម ជំនាញសិក្សាថៃ នៅដេប៉ាតឺម៉ង់សិក្សាបូព៌ា សាកលវិទ្យាល័យវិទ្យាសាស្ត្រសង្គមនិងមនុស្សសាស្ត្រ ដែលចូលរួម ព្រឹត្តិការណ៍នេះក្នុងសំលៀកបំពាក់នារីថៃ បានចែករំលែកថា៖

“ខ្សែភាពយន្តនេះល្បីល្បាញណាស់។ មុនពេលចាប់ផ្តើមរៀនភាសាថៃ ខ្ញុំបានដឹងពីរឿងនេះរួចហើយ។ រឿងនេះត្រូវបានចាក់បញ្ចាំងលើប៉ុស្តិ៍ Today TV កំណែទូរទស្សន៍។ មនុស្សយ៉ាងច្រើនកុះករ សូម្បីតែអ្នកដែលមិនយកចិត្តទុកដាក់ដល់ប្រទេសថៃ ក៏ឃើញថា រឿងនេះល្អណាស់។ រឿងនេះជួយយើងខ្ញុំមានចំណេះដឹងជាច្រើនអំពីវប្បធម៌ ប្រវត្តិសាស្ត្រ ផ្នត់រស់នៅប្រចាំថ្ងៃរបស់ប្រជាជនថៃតាំងពីសករាជ Ayutthaya។ ខ្ញុំបានមើលរឿងនេះម្តងហើយម្តងទៀត”។

“ខ្សែភាពយន្ត “Love Destiny” មិនត្រឹមតែជាភាពយន្តនៅប្រទេសថៃប៉ុណ្ណោះទេ ថែមទាំងនៅ
វៀតណាមក៏មានប្រជាប្រិយភាពខ្លាំងដែរ មិនថាជាកំណែទូរទស្សន៍ ឬភាពយន្ត។ មុននោះ ខ្ញុំបានមើលកំណែទូរទស្សន៍មុនពេលរៀនភាសាថៃ។ ខ្ញុំចូលចិត្តរឿងនេះខ្លាំងណាស់។ វាមិនត្រឹមតែនិយាយអំពីសេចក្ដីស្នេហារវាងបុរស និងស្ត្រីប៉ុណ្ណោះទេ ប៉ុន្តែថែមទាំងបាននាំយកកត្តាប្រវត្តិសាស្ត្របញ្ចូលទៅក្នុងខ្សែភាពយន្ត ហើយព្រឹត្តិការណ៍ប្រវត្តិសាស្ត្រនៅក្នុងខ្សែភាពយន្តគឺត្រឹមត្រូវណាស់ ដែលបានពិពណ៌នាអំពីព្រឹត្តិការណ៍ប្រវត្តិសាស្ត្រធំៗរបស់ថៃ។ ខ្សែភាពយន្តនេះល្អណាស់ ដែលជួយប្រជាជនថៃ និងយុវជនថៃយល់ដឹងកាន់តែច្បាស់អំពីប្រវត្តិសាស្ត្រ”។

អ្នកស្រី Ling ជនជាតិថៃនៅវៀតណាម ហើយក៏ជាទស្សនិកជនម្នាក់ដែលបានមកមើលរឿងនេះ បានឲ្យដឹងថា៖

“នេះមិនមែនជាលើកដំបូងទេ ដែលខ្សែភាពយន្តថៃត្រូវបានចាក់បញ្ចាំងនៅប្រទេសវៀតណាម។ ខ្ញុំសប្បាយចិត្តណាស់ នៅពេលឃើញជនជាតិវៀតណាមចូលចិត្តខ្សែភាពយន្ត។ ខ្ញុំនៅតែចាំថា នៅពេលដែលជនជាតិវៀតណាម មើលរឿងភាគទូរទស្សន៍តាមអនឡាញ មនុស្សជាច្រើនបានសួរគ្នាទៅវិញទៅមកថា តើគេបានមើលរឿងនេះដែរឬនៅ? គេនិយាយអំពីរឿងនេះសូម្បីតែនៅការិយាល័យការងារផងដែរ។ ប្រការនេះមានអត្ថន័យដ៏ធំធេងណាស់សម្រាប់ប្រជាជនថៃ។ ខ្ញុំមានមោទនភាពព្រោះប្រជាជនវៀតណាមស្រឡាញ់ប្រទេសថៃ ហើយថៃត្រូវបានស្គាល់ដល់យ៉ាងទូលំទូលាយលើពិភពលោក”។

ក្រោយពីបានចាក់បញ្ចាំងរយៈពេល ៣ សប្តាហ៍នៅប្រទេសវៀតណាម ខ្សែភាពយន្ត “Love Destiny” បានក្លាយជាខ្សែភាពយន្តថៃដែលលក់ដាច់បំផុតនៅវៀតណាមក្នុងឆ្នាំ ២០២២ ហើយក្លាយជាខ្សែភាពយន្តថៃដែលរកចំណូលបានខ្ពស់បំផុតគ្រប់ពេលនៅប្រទេសវៀតណាមផងដែរ។ ប្រការនេះបានបង្ហាញឲ្យឃើញថា ភាពយន្តថៃកំពុងទទួលបានការពេញនិយមនិងការចាប់អារម្មណ៍យ៉ាងខ្លាំងពីសាធារណជនវៀតណាម។ ទន្ទឹមនឹងនោះ ទឹកដី មនុស្ស និងវប្បធម៌ថៃ ត្រូវបានផ្សព្វផ្សាយយ៉ាងទូលំទូលាយ ហើយកាន់តែជិតស្និទ្ធជាមួយប្រជាជនវៀតណាមពីមួយថ្ងៃទៅមួយថ្ងៃ៕