កម្មវិធីជួបប្រាស្រ័យរវាងយុវជនថៃ-វៀតណាមត្រូវបានស្ថានទូតថៃប្រចាំទីក្រុងហាណូយរៀបចំតាមប្រព័ន្ធវីដេអូ។

“នាងខ្ញុំជាសមាជិកានៃកម្មវិធីផ្លាស់ប្ដូរយុវជនវៀតណាម-ថៃកាលពី ឆ្នាំ២០១៧។ ឆ្នាំនោះ យើងខ្ញុំមានឱកាសទៅកាន់ប្រទេសថៃ ដោយបានទៅទស្សនា រមណីយដ្ឋានរបស់ថៃ ក៏ដូចជាចូលរួមសកម្មភាពជួបប្រាស្រ័យផ្នែកវប្បធម៌រវាងនិស្សិត នៃប្រទេសទាំងពីរផងដែរ។ រាល់សកម្មភាពទាំងនោះបានជួយយើងខ្ញុំឲ្យបានយល់ដឹងបន្ថែម អំពីវប្បធម៌និងមនុស្សថៃ ហើយស្រឡាញ់ប្រទេសថៃកាន់តែច្រើនថែមទៀត។ នោះ គឺជាប្រភពកម្លាំងចលករដែលជួយនាងខ្ញុំអាចរៀនភាសាថៃឲ្យបានពូកែ ហើយបច្ចុប្បន្ន នេះ នាងខ្ញុំបានក្លាយទៅជាគ្រូបង្រៀនភាសាថៃហើយ។ នាងខ្ញុំមានបំណងចង់ផ្ទេរបន្ត ការជក់ចិត្តនឹងភាសាថៃ វប្បធម៌ថៃរបស់ខ្លួនដល់ប្អូនៗនិស្សិតជំនាន់ក្រោយ”។

“នាងខ្ញុំបានចូលរួមកម្មវិធីឆ្នាំ២០១៤នៅវៀតណាមក្នុងរយៈពេល ១៤ថ្ងៃ។ យើងបានជួបប្រាស្រ័យគ្នាប្រកបដោយក្ដីសប្បាយរីករាយតាមរយៈល្បែងលេង កំសាន្ត ហើយចែករំលែកអំពីវប្បធម៌ពួក ពិធីបុណ្យទាននានារបស់វៀតណាមនិងថៃ។ យើងបានសម្ដែងរបាំប្រពៃណីនៃតំបន់ឦសានថៃ ចំណែកឯមិត្តវៀតណាមក៏ស្លៀក ពាក់អាវផាយ ហើយសម្ដែងរបាំប្រជាប្រិយរបស់វៀតណាមវិញផងដែរ។ អ្វីៗដែល នាងខ្ញុំចាប់អារម្មណ៍បំផុតនោះគឺ យើងគ្រប់គ្នាទាំងថៃនិងវៀតណាមអាចតភ្ជាប់គ្នាយ៉ាង ងាយស្រួលណាស់ តាមរយៈការជួបប្រាស្រ័យផ្នែកវប្បធម៌ ភាសា និងបទពិសោធន៍ ជាមួយគ្នា”។

កញ្ញា Amonrat Nawasri (ខាងស្ដាំ) និងមិត្តស្រីជិតស្និទ្ធជនជាតិវៀតណាមឈ្មោះ Hanh។

ក្រៅពីការពង្រីក “ពិភពទស្សនៈ” អំពីប្រទេសជិតខាងដ៏ល្អមួយក្នុងតំបន់អាស៊ាន នោះ ក្ដីសប្បាយរីករាយដែលកញ្ញា Dao Thi Hop និងកញ្ញា Amonrat Nawasri ទទួល បាននៅពេលចូលរួមកម្មវិធីនេះ គឺការដែលគេមានមិត្តភក្តិថ្មីៗថែមទៀត ជាពិសេស កញ្ញា Amonrat Nawasri មានមិត្តស្រីជិតស្និទ្ធម្នាក់ឈ្មោះ Hanh នៅវៀតណាម។ ហើយ ពួកគេបានជួបជុំគ្នាឡើងវិញតាមប្រព័ន្ធវីដេអូក្នុងកម្មវិធីលើកនេះ។

“ខ្ញុំចាប់អារម្មណ៍យ៉ាងខ្លាំងចំពោះ Hanh។ នាងរួសរាយរាក់ទាក់ ណាស់ ហើយតែងតែណែនាំខ្ញុំអំពីទីកន្លែងសំខាន់ៗនិងវប្បធម៌វៀតណាម។ ពេលបាយ Hanh ក៏ប្រាប់ខ្ញុំថា ជនជាតិវៀតណាមតែងតែអញ្ជើញបាយមុនពេលទទួលទាន ហើយបង្រៀនខ្ញុំឲ្យចេះនិយាយអរគុណទៀតផង។ ពេល ខ្ញុំមានឱកាសដើរកំសាន្តនៅ វៀតណាមវិញ ខ្ញុំក៏បានជួបជុំជាមួយ Hanh ទៀត ហើយនាងបាននាំខ្ញុំទៅទស្សនាកន្លែងទេសចរណ៍ ជាច្រើន។ រហូតមកទល់បច្ចុប្បន្ននេះ យើងខ្ញុំនៅតែរក្សាទំនាក់ទំនងជាមួយគ្នា”។

បណ្ដាតំណាងបានរួមគ្នា រំលឹករាល់អនុស្សាវរីយ៍និងបទពិសោធន៍នៅពេលចូលរួមកម្មវិធីយុវជន វៀតណាម-ថៃ; ផ្ទៀងស្ដាប់សុន្ទរកថារបស់លោកស្រី Ratiwan Boonprakong ប្រធានតំណាងការិ យាល័យពន្លឿនទេសចរណ៍ថៃនៅទីក្រុងហូជីមិញ ក្រោមប្រធានបទ “និន្នាការរបស់អតិថិជននៅអាស៊ីឆ្នាំ២០២១” ព្រមទាំងផ្លាស់ប្ដូរអំពី មធ្យោបាយចរាចរណ៍ វប្បធម៌ ម្ហូបអាហារ ភាពយន្ត តារាសម្ដែង តារាចម្រៀងដែល យុវជននៃប្រទេសទាំងពីរយកចិត្តទុកដាក់។ ជាពិសេស បណ្ដាតំណាងបានពិភាក្សាគ្នា យ៉ាងផុលផុសអំពីទិសដៅប្រតិបត្តិការរបស់កម្មវិធីនាពេលខាងមុខ។

“យុវជននៃប្រទេសយើងទាំងពីរមិនមានឱកាសច្រើនដើម្បី ជួបជុំគ្នាដោយផ្ទាល់ឡើយដោយសារការរាតត្បាតនៃជម្ងឺកូវីដ ១៩។ ប៉ុន្តែ យើងនៅតែរក្សា ទំនាក់ទំនងតាមរយៈបណ្ដាញសង្គម។ វៀតណាមនិងថៃសុទ្ធតែប្រើ facebook ដូច្នេះ ខ្ញុំគិតថាយើងគួរតែបង្កើត fanpage មួយនៃក្រុមយុវជនវៀត ណាម-ថៃ ដើម្បីធ្វើបច្ចុប្បន្ន កម្មព័ត៌មាន”។

ក្នុងពេលជាមួយគ្នានោះ ស្ថានទូតថៃប្រចាំវៀតណាមក៏មានផែនការមួយចំនួន សំដៅអភិវឌ្ឍកម្មវិធីជួបប្រាស្រ័យរវាងយុវជននៃប្រទេសទាំងពីរឲ្យបានសមស្របនឹងស្ថានភាពជាក់ស្ដែងនៃដំណាក់កាលនីមួយៗផងដែរ។ លោកស្រី Chanidabha Yuktadatta លេខាទីមួយនៃស្ថានទូតថៃប្រចាំទីក្រុងហាណូយ បានលើកមតិថា៖

“យុវជនវៀតណាម-ថៃដែលមានអាយុចន្លោះពី១៨ដល់៣០ឆ្នាំ នឹងធ្វើការជាគូ ថៃ-វៀតណាមរួមគ្នាធ្វើវីដេអូឃ្លីបមួយរយៈពេលប្រមាណ៥នាទីអំពីការផ្លាស់ប្ដូរវប្បធម៌ ប្រហែលជា ថតវីដេអូមិត្ត២នាក់ចម្អិនអាហារ ឬការចែករំលែកបទពិសោធន៍ក្នុងរយៈពេលកើតមាន ជម្ងឺរាតត្បាត។ នៅវៀតណាមមានក្បាច់រាំលាងដៃដ៏ល្បីល្បាញណាស់ ដូច្នេះបណ្ដា មិត្តអាចថតឈុតឆាកលាងដៃ ហើយមិត្តនៅថៃអាចចែករំលែកពីលក្ខណៈនៅថៃ។ រាល់វីដេអូឃ្លីបនេះនឹងត្រូវបានបង្ហោះឡើឆានែល youtube facebook tiktok និងគេហ ទំព័ររបស់ VOVTV។ ក្នុងឆ្នាំ២០២២ ប្រសិនបើស្ថានភាពកូវីដ ១៩ ត្រូវបានគ្រប់គ្រង យើង អាចរៀបចំសកម្មភាពដោយផ្ទាល់នៅវៀតណាមឬនៅថៃ”។

កម្មវិធីជួបប្រាស្រ័យរវាងយុវជនវៀតណាម-ថៃរួមជាមួយផែនការនានាដែល យុវជននៃប្រទេសទាំងពីរកំពុងកសាង នឹងជាមូលដ្ឋានគ្រឹះដើម្បីអភិវឌ្ឍបណ្ដាញ យុវជនឲ្យកាន់តែទូលំទូលាយ ដើម្បីជួយគាំទ្រគ្នាក្នុងការងារនិងជីវភាពរស់នៅតាមនោះ រួមចំណែកជំរុញការជួបប្រាស្រ័យនិងការយល់ដឹងគ្នាទៅវិញទៅមករវាងប្រជាជនវៀតណាមនិងថៃឲ្យកាន់តែស៊ីជម្រៅនិងរឹងមាំថែមទៀត៕