គណៈប្រតិភូសមាជិកសភាវ័យក្មេងថៃដែលអញ្ជើញចូលរួមសន្និសីទ។ (រូបថត៖ VOV)

សន្និសីទសមាជិកសភាវ័យក្មេងសកលលើកទី៩ មានប្រធានបទ៖ “តួនាទីរបស់មជ្ឈដ្ឋានវ័យក្មេងក្នុងការជំរុញការអនុវត្តគោលដៅអភិវឌ្ឍន៍ប្រកបដោយចីរភាព តាមរយៈការផ្លាស់ប្តូរឌីជីថល និងនវានុវត្តន៍”។ នេះជាខ្លឹមសារដែលត្រូវបានសមាជិកសភាវ័យក្មេងថៃវាយតម្លៃខ្ពស់ ព្រោះវាស្របតាមស្ថានភាពនិងនិន្នាការអភិវឌ្ឍន៍នៃប្រទេសនានាជុំវិញពិភពលោកក្នុងបរិបទនៃបដិវត្តន៍ឧស្សាហកម្មទី៤។ លោកស្រី Khattiya Sawatdiphol សមាជិកាសភាថៃបានឲ្យដឹងថា៖

“ប្រធានបទរបស់ប្រទេសម្ចាស់ផ្ទះវៀតណាមគឺមានលក្ខណៈក្ដៅគគុក។ បច្ចុប្បន្ននេះយើងកំពុងរស់នៅក្នុងសម័យឌីជីថល។ ដូច្នេះហើយ ប្រទេសទាំងអស់ចាំបាច់ត្រូវធ្វើបច្ចុប្បន្នភាពនិន្នាការនេះ ដោយសារតែឌីជីថលមានការរីកចម្រើនយ៉ាងឆាប់រហ័ស។ សម្រាប់ជំនាន់វ័យក្មេង អាចសម្របខ្លួននិងរៀនបច្ចេកវិទ្យាថ្មីបានយ៉ាងលឿន។ ដូច្នេះ យើងត្រូវការកិច្ចសហការពីមនុស្សវ័យក្មេងដើម្បីកែលម្អបញ្ហានានារបស់ប្រទេសជាតិ”។

ក្នុងរបៀបវារៈនៃសន្និសីទ គណៈប្រតិភូសមាជិកសភាថៃ និងប្រទេសដទៃទៀតបានទៅទស្សនាសាលប្រជុំ Dien Hong នៅក្នុងវិមានរដ្ឋសភា ហើយចូលរួមសិក្ខាសាលា “បង្កើនសមត្ថភាពឌីជីថលសម្រាប់យុវជន” ដែលរៀបចំដោយមជ្ឈិមសម្ព័ន្ធយុវជនកុម្មុយនិស្តហូជីមិញ។ សកម្មភាពនេះជួយសមាជិកសភាវ័យក្មេងថៃយល់ដឹងថែមទៀតអំពីតួនាទី និងការបង្កើនសមត្ថភាពឌីជីថលសម្រាប់យុវជននៅវៀតណាម។ លោកស្រី Phanida Mongkolsawat សមាជិកាវ័យក្មេងថៃបានធ្វើអត្ថាធិប្បាយថា៖

“យើងខ្ញុំបានចូលរួមក្នុងសកម្មភាពនានានៅវិមានរដ្ឋសភា ហើយបានស្តាប់អង្គភាពឯកជន ក៏ដូចជាទីភ្នាក់ងាររដ្ឋបញ្ចេញគំនិតស្តីពីការបង្កើនសមត្ថភាពឌីជីថលសម្រាប់យុវជន។ ខ្ញុំឃើញថា យុវជនវៀតណាមមានទេពកោសល្យខ្លាំងណាស់។ ប្រការនេះត្រូវបានឆ្លុះបញ្ចាំងពីការរីកចម្រើនយ៉ាងឆាប់រហ័សនៃសេដ្ឋកិច្ចវៀតណាម ជាមួយនឹងជំហានអភិវឌ្ឍន៍គួរឲ្យកត់សម្គាល់ដូចសព្វថ្ងៃ”។

គណៈប្រតិភូថៃទៅទស្សនារដ្ឋធានីហាណូយ។ (រូបថត៖ VOV)

នេះមិនមែនជាលើកដំបូងទេដែលលោក Voraphop Viriyaroj ប្រធានគណៈប្រតិភូសមាជិក
សភាវ័យក្មេងថៃ មកកាន់ប្រទេសវៀតណាម។ ដូច្នេះហើយ នៅពេលដែលអញ្ជើញមកវៀតណាម ដើម្បីចូលរួមសន្និសីទសមាជិកសភាវ័យក្មេងសកលលើកទី៩ នៅទីក្រុងហាណូយ លោក Voraphop Viriyaroj មានចំណាប់អារម្មណ៍ប្លែកៗ៖

“មុននេះ ខ្ញុំមានដំណើរទេសចរណ៍មកវៀតណាមហើយ។ យ៉ាងណាមិញ នេះជាលើកដំបូងដែលខ្ញុំមកវៀតណាមក្នុងនាមជាសមាជិកសភាថៃ។ ខ្ញុំពិតជាភ្ញាក់ផ្អើលនៅពេលឃើញសេដ្ឋកិច្ចវៀតណាមរីកចម្រើនយ៉ាងឆាប់រហ័ស ហើយប្រទេសមានការអភិវឌ្ឍយ៉ាងខ្លាំង។ ចំពោះការតាំងពិព័រណ៍ “សមិទ្ធិផលនៃបុព្វហេតុផ្លាស់ប្ដូរថ្មី - ផលិតផល OCOP” ក្នុងក្របខ័ណ្ឌនៃសន្និសីទនេះ ខ្ញុំមានការចាប់អារម្មណ៍យ៉ាងខ្លាំងចំពោះផលិតផល OCOP របស់វៀតណាម។ នេះគឺជាវិធីផ្សព្វផ្សាយដ៏ខុសប្លែក។ ខ្ញុំបានភ្លក់ហើយទិញកាហ្វេត្រាវនិងកាហ្វេដូងរបស់វៀតណាម”។

ទោះបីជាមិនមែនជាសមាជិកក្រុមសមាជិកសភាមិត្តភាពថៃ-វៀតណាមក្នុងរដ្ឋសភាក៏ដោយ ប៉ុន្តែលោក Voraphop Viriyaroj បានសម្តែងការត្រៀមខ្លួនជាស្រេចដើម្បីសហប្រតិបត្តិការ និងគាំទ្រចំពោះគម្រោង និងកម្មវិធីសហប្រតិបត្តិការរវាងប្រទេសទាំងពីរតាមរយៈកាណាល់រដ្ឋសភា៖

“ថៃនិងវៀតណាម សុទ្ធតែជាសមាជិកអាស៊ាន។ ក្នុងក្របខ័ណ្ឌនៃសន្និសីទសមាជិកសភាវ័យក្មេងសកលឆ្នាំនេះ ក៏មានសកម្មភាពសម្រាប់ក្រុមប្រឹក្សាសហភាពអន្តរសភានៃសមាគមប្រជាជាតិអាស៊ីអាគ្នេយ៍ (AIPA) ផងដែរ។ ខ្ញុំជឿជាក់ថា ដោយមានទីតាំងភូមិសាស្ត្រជិតស្និទ្ធ និងភាពស្រដៀងគ្នាក្នុងទិដ្ឋភាពជាច្រើន ប្រទេសថៃនិងវៀតណាមនឹងរួមគ្នាបង្កើតសន្ទុះសម្រាប់អាស៊ាន។ ការពង្រឹងកិច្ចសហប្រតិបត្តិការក្នុងអាស៊ាន នឹងជួយបង្កើនសមត្ថភាពចរចារបស់អាស៊ានជាមួយប្រទេសផ្សេងៗទៀត រួមទាំងមហាអំណាចផងដែរ។ ប្រទេសថៃ និងវៀតណាមសុទ្ធតែមានឥទ្ធិពល និងតួនាទីនៅក្នុងអាស៊ាន។ កិច្ចសហប្រតិបត្តិការទៅវិញទៅមកនឹងនាំមកនូវផលប្រយោជន៍រួម ហើយបង្កើនសមត្ថភាពចរចារបស់អាស៊ាន”។

គណៈប្រតិភូសមាជិកសភាវ័យក្មេងថៃក៏បានថ្លែងអំណរគុណ ហើយអបអរសាទរចំពោះប្រទេសវៀតណាមដែលបានរៀបចំសន្និសីទសមាជិកសភាវ័យក្មេងសកលលើកទី៩ប្រកបដោយជោគជ័យ។ ព្រឹត្តិការណ៍នេះជួយឱ្យបណ្ដាសភានិងសមាជិកសភាវ័យក្មេងមានឱកាសជួបប្រាស្រ័យនិងរៀនសូត្រពីគ្នាទៅវិញទៅមក។ ពីនោះ អ្នកតាក់តែងច្បាប់ទាំងនេះអាចអនុវត្តន៍នៅក្នុងសកម្មភាពសភា និងលើកកំពស់តួនាទីរបស់មជ្ឈដ្ឋានវ័យក្មេងលើគ្រប់វិស័យនៃជិវភាព ដូចជានយោបាយ សេដ្ឋកិច្ច វប្បធម៌ និងសង្គម។ល៕