ថ្នាក់ដឹកនាំ EU និងអ៊ុយក្រែនជួបពិភាក្សានៅក្នុងវិមាន Mariinsky រដ្ឋធានីគៀវ កាលពីថ្ងៃទី១៦ មិថុនា។ (រូបថត៖ AFP)

ប្រធានាធិបតីបារាំងលោក Emmanuel Macron កាលពីថ្ងៃទី១៦ ខែមិថុនា បានឲ្យដឹងថា ថ្នាក់ដឹកនាំសហភាពអឺរ៉ុប (EU) ទាំង៤រូប ដែលកំពុងមានវត្តមាន នៅរដ្ឋធានីគៀវ របស់អ៊ុយក្រែន បានគាំទ្រចំពោះគំនិតផ្តល់បេក្ខភាព EU ដល់ អ៊ុយក្រែន “ភ្លាមមួយរំពិច”។ ព័ត៌មាននេះត្រូវបានលោក Macron ធ្វើឡើង នៅក្នុង សន្និសីទសារព័ត៌មានមួយបន្ទាប់ពីជំនួបពិភាក្សាជាមួយប្រធានាធិបតីអ៊ុយក្រែន លោក Volodymyr Zelensky អធិការបតីអាល្លឺម៉ង់លោក Olaf Scholz នាយករដ្ឋមន្ត្រី អ៊ីតាលីលោក Mario Draghi និងប្រធានាធិបតីរ៉ូម៉ានីលោក Klaus Iohannis។ លោក Macron ក៏បានប្រកាសថា បារាំងនឹងបង្កើនជំនួយសព្វាវុធដល់អ៊ុយក្រែនផងដែរ។

ថ្នាក់ដឹកនាំសហភាពអឺរ៉ុបទាំង៤ បានមកដល់ទីក្រុងគៀវនៅថ្ងៃទី ១៦ ខែមិថុនាក្នុងដំណើរទស្សនកិច្ចលើកដំបូងរបស់គេទៅកាន់អ៊ុយក្រែនចាប់តាំងពីជម្លោះរុស្ស៊ី- អ៊ុយក្រែនបានផ្ទុះឡើងនៅចុងខែកុម្ភៈឆ្នាំនេះ។ នៅក្នុងជំនួបពិភាក្សា ថ្នាក់ដឹកនាំបានពិភាក្សាអំពីការបង្កើនទណ្ឌកម្មប្រឆាំងនឹងរុស្ស៊ី និងស្ថាបនាអ៊ុយក្រែនឡើងវិញ។

នៅក្នុងការវិវឌ្ឍន៍មួយផ្សេងទៀតដែលទាក់ទងនឹងភាពតានតឹងរវាងរុស្ស៊ី និងអ៊ុយក្រែន ប្រធានក្រុមចរចាររបស់រុស្ស៊ី លោក Vladimir Medinsky បានប្រកាសថា ទីក្រុងម៉ូស្គូត្រៀមខ្លួនជាស្រេច ចាប់ផ្តើមកិច្ចចរចាសន្តិភាពជាមួយក្រុងគៀវឡើងវិញ ប៉ុន្តែមិនទាន់ទទួលបានការឆ្លើយតបចំពោះសំណើនេះនៅឡើយ៕