(vovworld) - ຕອນເຊົ້າວັນທີ 07/01, ຢູ່ທີ່ຮ່າໂນ້ຍ, ກະຊວງແຮງງານ, ທະຫານເສຍອົງຄະ ແລະ ສັງຄົມຫວຽດນາມ ໄດ້ຈັດກອງປະຊຸມຜ່ານເຄືອຂ່າຍອີນເຕີແນດ ເພ່ືອຜັນຂະຫຍາຍວຽກງານແຮງງານ, ຜູ້ມີຄຸນງາມຄວາມດີ ແລະ ສັງຄົມປີ 2013. ກ່າວຄຳເຫັນຊີ້ນຳກອງປະຊຸມ, ທ່ານນາຍົກລັດຖະມົນຕີຫວຽດນາມ ຫງວຽນເຕີນຢຸງ ໄດ້ຍ້ອງຍໍຊົມເຊຍ ແລະ ຕີລາຄາສູງບັນດາຜົນງານເຊິ່ງຂະແໜງແຮງງານ, ທະຫານເສຍອົງຄະ ແລະ ສັງຄົມບັນລຸໄດ້ໃນວຽກງານຕ່າງໆຂອງປີ 2012; ເນັ້ນໜັກເຖິງບັນດາຜົນງານທີ່ບັນລຸໄດ້ໃນການພັດທະນາເສດຖະກິດ, ສັງຄົມຂອງປະເທດຊາດໃນປີ 2012 ທີ່ມີການປະກອບສ່ວນສຳຄັນຂອງຂະແໜງແຮງງານ, ທະຫານເສຍອົງຄະ ແລະ ສັງຄົມ, ເຊິ່ງແມ່ນຂະແໜງທີ່ເຄື່ອນໄຫວໃນຫຼາຍຂົງເຂດ. ທ່ານນາຍົກລັດຖະມົນຕີ ກໍສະແດງຄວາມເຫັນດີເຫັນພ້ອມກັບບັນດາຄາດໝາຍເຊິ່ງຂະແໜງແຮງງານ, ທະຫານເສຍອົງຄະ ແລະ ສັງຄົມ ໄດ້ວາງອອກໃຫ້ປີ 2013 ໃນນັ້ນມີບາງຄາດໝາຍໃຫຍ່ຄື; ສ້າງວຽກເຮັດງານທຳ, ເພີ່ມຈຳນວນຄົນງານເຂົ້າຮ່ວມການປະກັນສັງຄົມ, ຫຼຸດອັດຕາຄອບຄົວທຸກຍາກໃນທົ່ວປະເທດ... ທ່ານນາຍົກລັດຖະມົນຕີ ໄດ້ສະເໜີໃຫ້ກະຊວງ ແລະ ຂະແໜງແຮງງານສືບຕໍ່ສຸມໃສ່ຍົກສູງຄວາມສາມາດບົນຊ້ອນ, ປະສິດທິຜົນ, ປະສິດທິພາບການຄຸ້ມຄອງລັດໃນຂົງເຂດແຮງງານ, ທະຫານເສຍອົງຄະ ແລະ ສັງຄົມ ໂດຍສະເພາະແມ່ນໃນການສ້າງລະບອບລະບຽບການ, ເອກະສານນິຕິທຳ. ຄຽງຄ້າງນັ້ນ, ຕ້ອງສືບຕໍ່ມີບັນດາມາດຕະການທີ່ມີປະສິດທິຜົນ ເພື່ອໜູນຊ່ວຍບັນດາຄອບຄົວທຸກຍາກ, ຫຼີກຫຼ້ຽງສະພາບຄວາມທຸກຍາກກັບຕ່າວຄືນ; ປະຕິບັດນະໂຍບາຍບຳລຸງສ້າງວິຊາຊີບເປັນຢ່າງດີ ແລະ ແກ້ໄຂວຽກເຮັດງານທຳໃຫ້ຄົນງານ, ໂດຍສະເພາະແມ່ນບຳລຸງສ້າງວິຊາຊີບໃຫ້ຄົນງານເຂດຊົນນະບົດ.
ທ່ານນາຍົກລັດຖະມົນຕີຊີ້ແຈ້ງວ່າ; ຕ້ອງສືບຕໍ່ເອົາໃຈໃສ່ປະຕິບັດນະໂຍບາຍໃຫ້ບຸລິມະສິດແກ່ຜູ້ມີຄຸນງາມຄວາມດີເປັນຢ່າງດີ, ກວດກາຄືນ ເພື່ອຮັບປະກັນໃຫ້ບັນດາເປົ້າໝາຍທີ່ມີຄຸນງາມຄວາມດີຕໍ່ການປະຕິວັດ ຕ້ອງໄດ້ຊົມໃຊ້ລະບອບບຸລິມະສິດຈາກພັກ, ລັດ. ເອົາໃຈໃສ່ປະຕິບັດວຽກງານທ້ອນໂຮມອັດຖິທະຫານເສຍສະຫຼະຊີວິດເມື່ອປະຕິບັດໜ້າທີ່ຢູ່ລາວ ແລະ ກຳປູເຈຍ....