ຕອນເຊົ້າວັນທີ 14/12 ຢູ່ນະຄອນ ກອນຕູມ, ຄະນະກຳມະການປະຊາຊົນແຂວງ ກອນຕູມ ໄດ້ຈັດຕັ້ງກອງປະຊຸມຮ່ວມມືພັດທະນາແລວເສດຖະກິດຕາເວັນອອກ ຕາເວັນຕົກ, ເຂດພູ ແລະ ທະເລ ລະຫວ່າງແຂວງ ກອນຕູມ ກັບ 2 ແຂວງ ອຸບົນ ຣາຊະທານີ, ສີສະເກດຂອງໄທ, 3 ແຂວງ ຂອງລາວນັ້ນແມ່ນ ຈຳປາສັກ, ເຊກອງ, ອັດຕະປື ພ້ອມກັບສອງແຂວງແຄມທະເລທາງພາກກາງຫວຽດນາມ ນັ້ນແມ່ນ ກວ໋າງຫງາຍ ແລະ ບີ່ງດີ້ງ. ບັນດາຜູ້ແທນໄດ້ປຶກສາຫາລຶມາດຕະການ ແລະ ກົນໄກການຮ່ວມມືໃນບັນດາຂົງເຂດຄື: ຈັດຕັ້ງການດຳເນີນທຸລະກິດການທ່ອງທ່ຽວ, ປູກຕົ້ນໄມ້ອຸດສາຫະກຳ, ກໍ່ສ້າງຮາກຖານປຸງແຕ່ງ, ສະຫນອງພາຫະນະກົນຈັກການຜະລິດກະສິກຳ, ອະນຸລັກຮັກສາ ແລະ ພັດທະນາຊັບພະຍາກອນປ່າ, ລົງທຶນກໍ່ສ້າງບັນດາໂຄງການພະລັງງານ, ຕ່າຫນ່າງສົ່ງໄຟຟ້າ, ສົມທົບກັນຂຸດຄົ້ນໂຄງການສຳຫລວດ, ຂຸດຄົ້ນ, ປຸງແຕ່ງບໍ່ແຮ່ …ນອກນັ້ນຍັງຮຽກຮ້ອງອົງການການເງິນລົງທຶນກໍ່ສ້າງສຳເລັດເສັ້ນທາງເຊື່ອມຕໍ່ບັນດາທ້ອງຖິ່ນຢູ່ລຽມຕາມແລເສດຖະກິດ, ຄົ້ນຄ້ວາສ້າງຕັ້ງສູນຂໍ້ມູນຂ່າວສານກ່ຽວກັບການຄ້າ, ການທ່ອງທ່ຽວ, ການລົງທຶນ ລະຫວ່າງແຂວງ ກອນຕູມ ກັບບັນດາແຂວງດັ່ງກ່າວ.
ທີ່ກອງປະຊຸມ, ທ່ານ ຫງວຽນວັນຮູ່ງ, ປະທານຄະນະກຳມະການປະຊາຊົນແຂວງ ກອນຕູມ ຖືວ່າ: ຄວາມສາມາດບົ່ມຊ້ອນ, ທ່າແຮງຂອງແຕ່ລະປະເທດ ຈະໄດ້ຮັບການເສີມຂະຫຍາຍ, ປະກອບສ່ວນຮັດແຄບຊ່ອງຫວ່າງການພັດທະນາລະຫວ່າງເຂດ, ບໍລິເວນອື່ນຂອງແຕ່ລະປະເທດ ຖ້າຫາກມີການຮ່ວມສຳພັນ, ການຮ່ວມມືລົງທຶນຢ່າງມີປະສິດທິຜົນ.
“ການເຊ່ືອມຈອດການຮ່ວມມືລະຫວ່າງບັນດາແຂວງດັ່ງກ່າວຈະເພີ່ມທະວີກຳລັງແຮງໃນທຸກຂົງເຂດຄ້າຍຄືກັນ ແລະ ພ້ອມກັນຫນູນຊ່ວຍກັນໃນດ້ານແຕກຕ່າງກັນ ເພື່ອສ້າງຜະລິດຕະພັນຫລາຍຮູບແບບ, ອຸດົມສົມບູນໃນທຸກຂົງເຂດ. ພວກເຮົາພ້ອມກັນແລກປ່ຽນຢ່າງກົງໄປກົງມາ ຍົກໃຫ້ເຫັນບັນດາແນວຄວາມຄິດການຮ່ວມມື ເພື່ອປຶກສາຫາລື ແລະ ເປັນເອກະພາບບັນດາບັນຫາລວມກ່ຽວກັບກົນໄກການຮ່ວມມືຈາກຮາກຖານ.“