ເນື່ອງໃນໂອກາດກະກຽມຕ້ອນຮັບປີໃໝ່ປະຈຳຊາດ, ໃນລະຫວ່າງວັນທີ 13 ແລະ 14/1, ທ່ານ ເລຂາທິການໃຫຍ່ພັກກອມູນິດຫວຽດນາມ ຫງວຽນຟູ໋ຈ້ອງໄດ້ໄປຢ້ຽມຢາມ ແລະ ອວຍພອນປີໃໝ່ອົງຄະນະພັກ, ປະຊາຊົນ ແຂວງ ກວາງນາມ. ທ່ານເລຂາທິການໃຫຍ່ໄດ້ໄປຢ້ຽມຢາມ, ອວຍພອນປີໃໝ່ ແລະ ມອບຂອງຂວັນໃຫ້ບັນດາຄອບຄົວນອນໃນເປົ້າໝາຍນະໂຍບາຍ, ແມ່ຫວຽດນາມວິລະຊົນ. ນັ້ນແມ່ນ ແມ່ ຫງວຽນທິຈ໋ຽນ ຢູ່ຕາແສງ ຕາມເຟືອກ ມີຜົວ ແລະ ລູກ 2 ຄົມເສຍສະຫຼະຊີວິດເພື່ອຊາດ, ແມ່ ໂດ້ທິແຖງ ມີລູກຊາຍ 2 ຄົນ ແລະ ລູກສາວຄົນໜຶ່ງ ເສຍສະຫຼະຊີວິດເພື່ອຊາດ... ທ່ານເລຂາທິການໃຫຍ່ສະແດງຄວາມຂອບອົກຂອບໃຈຕໍ່ຄວາມເສຍສະຫຼະອັນໃຫຍ່ຫຼວງຂອງບັນດາແມ່ຫວຽດນາມວິລະຊົນ ແລະ ຢືນຢັນວ່າ ພັກ, ລັດ ແລະ ປະຊາຊົນບໍ່ມີວັນຈະລື່ມບັນດາຄຸນງາມຄວາມດີ, ຄວາມສູນເສຍຂອງບັນດາແມ່, ບັນດາຄອບຄົວນອນໃນເປົ້າໝາຍນະໂຍບາຍ ເພື່ອເຮັດໃຫ້ປະເທດຊາດຍາດໄດ້ຜົນງານຄືປະຈຸບັນ. ທ່ານເລຂາທິການໃຫຍ່ ຖືວ່າ: ໃນພາລະກິດຫັນປະເທດເປັນປະເທດອຸດສາຫະກຳ, ທັນສະໄໝ, ໃນບັນດາທ່າແຮງທີ່ ກວາງນາມຕ້ອງເສີມຂະຫຍາຍ ນັ້ນແມ່ນມູນເຊື້ອປະຕິວັດອົງອາດກ້າແກ່ນ.
ຕອນເຊົ້າວັນທີ 14/1, ເມື່ອລົງໄປອວຍພອນປີໃໝ່ອົງຄະນະພັກ, ອຳນາດການປົກຄອງ ແລະ ປະຊາຊົນແຂວງ ກວາງນາມ, ທ່ານເລຂາທິການໃຫຍ່ ຫງວຽນຟູ໋ຈ້ອງຖືວ່າ: ໃນໄລຍະທີ່ຈະມາເຖິງ, ແຂວງກວາງນາມຕ້ອງສືບຕໍ່ສາມັກຄີ, ສຸມໃສ່ປະຕິບັດວຽກງານກໍ່ສ້າງພັກ, ປັບປຸງລະບົບການເມືອງຂັ້ນຮາກຖານ, ສະກັດກັ້ນໄພສໍ້ລາດບັງຫຼວງ, ຟຸມເຟືອຍ... ຢ່າງເດັດຂາດ ຕາມເນື້ອໃນຈິດໃຈກອງປະຊຸມສູນກາງພັກຄັ້ງທີ 4 ແລະ ມະຕິກອງປະຊຸມໃຫຍ່ຜູ້ແທນທົ່ວປະເທດຄັ້ງທີ່ 11 ຂອງພັກກອມມູນິດຫວຽດນາມ.