ເນື່ອງໃນໂອກາດທ່ານນາຍົກລັດຖະມົນຕີ ຫງວຽນຊວນຟຸກ ເລີ່ມຕົ້ນການຢ້ຽມຢາມ ອາເມລິກາ ຢ່າງເປັນທາງການແຕ່ວັນທີ 29 -31 ພຶດສະພາ. ສະແດງຄວາມຄິດເຫັນກ່ຽວກັບການຢ້ຽມຢາມຂອງທ່ານນາຍົກລັດຖະມົນຕີ ຫງວຽນຊວນຟຸກ, ບົດຂຽນໄດ້ຕີລາຄາການຢ້ຽມຢາມໃນຄັ້ງນີ້ວ່າຈະເປີດໂອກາດໃຫ້ 2 ຝ່າຍປຶກສາຫາລືນະໂຍບາຍ ແລະ ການປະຕິບັດນະໂຍບາຍໃນບັນດາຂົງເຂດ: ເສດຖະກິດ, ການຄ້າກໍ່ຄືບັນດາບັນຫາສາກົນ ແລະ ພາກພື້ນທີ່ຕ່າງຝ່າຍຕ່າງມີຄວາມສົນໃຈ. ຜ່ານນັ້ນ, ຫວຽດນາມ ແລະ ອາເມລິກາ ອາດຈະເຮັດໃຫ້ການພົວພັນຄູ່ຮ່ວມມືຮອບດ້ານເລິກເຊິ່ງກ່ວາອີກ ເພື່ອຜົນປະໂຫຍດລວມ ແລະ ຍາວນານຂອງປະຊາຊົນ 2 ປະເທດໃນສະພາບການອຳນາດການປົກຄອງໃໝ່ຢູ່ ອາເມລິກາ ມີການດັດປັບ ກ່ຽວກັບນະໂຍບາຍການຕ່າງປະເທດ.

        ໃນວັນດຽວກັນ, ສື່ເອເລັກໂຕນິກ Asiaplomacy.com ມີບົດໄຈ້ແຍກດ້ວຍຫົວຂໍ້: ທ່ານປະທານາທິບໍດີ Donald Trump ໄດ້ຂຽນໃສ່ໜ້າປະຫວັດສາດກັບ ຫວຽດນາມ ຕື່ມອີກ. ບົດຂຽນຂອງ ປອ Lisa Williams, ອະດີດຫົວໜ້າກຸ່ມຊ່ວຍວຽກສະມາຊິກສະພາແຫ່ງຊາດ ອາເມລິກາ ຂອງອະນຸກຳມະການ ອາຊີ - ປາຊີຟິກ ແລະ ສິ່ງແວດລ້ອມທົ່ວໂລກຂຶ້ນກັບສະພາຕ່ຳ ອາເມລິກາ ຖືວ່າ: ທ່ານປະທານາທິບໍດີ Donald Trump ຕັດສິນໃຈໄປເຂົ້າຮ່ວມກອງປະຊຸມສຸດຍອດເວທີປາໄສການຮ່ວມມືເສດຖະກິດ ອາຊີ - ປາຊີຟິກ (APEC) ຢູ່ ຫວຽດນາມ ໃນເດືອນ ພະຈິກ ປີ 2017 ເປັນຂີດໝາຍບາດລ້ຽວໃໝ່. ທ່ານປະທານາທິບໍດີ Donald Trump ໄປ ຫວຽດນາມ ໃນປີທຳອິດຮັບດຳລົງຕຳແໜ່ງ, ນັ້ນແມ່ນການກະທຳສຳຄັນທີ່ໄດ້ສະແດງໃຫ້ເຫັນການພົວພັນກັບ ຫວຽດນາມ ໄດ້ຮັບການຕີລາຄາສູງຈາກອຳນາດການປົກຄອງ ອາເມລິກາ. ໃນຈົດໝາຍຝາກເຖິງທ່ານປະທານປະເທດ ເຈີ່ນດ້າຍກວາງ, ທ່ານປະທານາທິບໍດີ Donald Trump ຢັ້ງຢືນຄວາມປາດຖະໜາຢາກຊຸກຍູ້ການຮ່ວມມືໃນຂົງເຂດເສດຖະກິດ, ການຄ້າ ແລະ ບັນດາບັນຫາສາກົນ, ພາກພື້ນ.

        ເນື່ອງໃນໂອກາດນີ້, ໜັງສືພິມ ວໍຊິງຕັນ ທາມ ສະບັບອອກໃນວັນທີ 30 ພຶດສະພາ ກໍ່ໄດ້ລົງພິມສານຂອງທ່ານນາຍົກລັດຖະມົນຕີ ຫງວຽນຊວນຟຸກ ໂດຍເນັ້ນໜັກວ່າ: ຫວຽດນາມ ປາດຖະໜາຢາກສ້າງການພົວພັນອັນດີງາມກັບອຳນາດການປົກຄອງຂອງທ່ານປະທານາທິບໍດີ Donald Trump ບໍ່ພຽງແຕ່ເພື່ອຜົນປະໂຫຍດຂອງປະຊາຊົນ 2 ປະເທດ ຫວຽດນາມ ແລະ ອາເມລິກາ ເທົ່ານັ້ນ ຫາກຍັງເພື່ອຜົນປະໂຫຍດຂອງປະຊາຄົມ ອາຊຽນ, ຂອງສັນຕິພາບ, ຄວາມໝັ້ນຄົງ, ສະຖຽນລະພາບ, ການຮ່ວມມື ແລະ ຄວາມວັດທະນາຖາວອນລວມຂອງພາກພື້ນ ອາຊີ - ປາຊີຟິກ ແລະ ໃນໂລກ ອີກດ້ວຍ.