(vovworld) - ຮ່ຳຮຽນ ແລະ ປະຕິບັດຕາມແບບຢ່າງຄຸນສົມບັດປະທານ ໂຮ່ຈີມິນ ຈາກຄວາມຮູ້ຕະຫຼອດຮອດການກະທຳ, ນີ້ແມ່ນຫົວຂໍ້ຂອງເວທີປາໄສຊາວໜຸ່ມຖືກຈັດຕັ້ງໃນຕອນບ່າຍວັນທີ 19/5, ຢູ່ເມືອງ ກູ່ລາວຢູງ, ໂດຍສູນກາງຄະນະຊາວໜຸ່ມກອມມູນິດ ໂຮ່ຈີມິນ ສົມທົບກັບຄະນະຊາວໜຸ່ມແຂວງ ຊອກຈັງ ຈັດຕັ້ງ.
ໃນວັນທີ 19/5, ແຂວງ ແຄ໋ງຮ່ວາ ກໍ່ໄດ້ຈັດຕັ້ງວັນບຸນ “ທ່ານໝໍໜຸ່ມປະຕິບັດຕາມແບບຢ່າງຄຸນສົມບັດປະທານ ໂຮ່ຈີມິນ, ອາສາສະໝັກເພື່ອສຸຂະພາບຂອງວົງຄະນະຍາດປີ 2015”. ສະມາຄົມທ່ານໝໍໜຸ່ມແຂວງ ແຄ໋ງຮ່ວາ ໄດ້ກວດ ແລະ ສະໜອງຢຸກຢາໃຫ້ກ່ວາ 1.300 ຄົນເຊິ່ງແມ່ນເປົ້າໝາຍທຸກຍາກ, ຄອບຄົວນະໂຍບາຍ. ຄະນະຊາວໜຸ່ມແຂວງ ດົ່ງນາຍ ໄດ້ຈັດຕັ້ງພິທີຍ້ອງຍໍຊົມເຊີຍຊາວໜຸ່ມດີເດັ່ນ 250 ຄົນ, ພົບປະ, ແລກປ່ຽນກັບນັກປະຕິວັດຜູ້ອາວຸໂສ. ຄະນະຊາວໜຸ່ມກອມມູນິດ ໂຮ່ຈີມິນ ແຂວງ ບີ່ງທ້ວນ ຈັດຕັ້ງລາຍການພົບປະແລກປ່ຽນ ດ້ວຍການເຂົ້າຮ່ວມຂອງຜູ້ແທນເຊິ່ງແມ່ນເຍົາວະຊົນ ແລະ ຮັບຜິດຊອບວຽກງານຂອງກອງເຍົາວະຊົນ, ອະນຸຊົນໃນແຂວງ 250 ຄົນ.
ການເຄື່ອນໄຫວສະເຫຼີມສະຫຼອງ 125 ປີແຫ່ງວັນຄ້າຍວັນເກີດປະທານ ໂຮ່ຈີມິນ ຍັງໄດ້ຈັດຕັ້ງຢູ່ຫຼາຍປະເທດໃນໂລກ. ຕອນບ່າຍວັນທີ 19/5, ສະຫະພັນບັນດາອົງການມິດຕະພາບ ຫວຽດນາມ, ສະມາຄົມມິດຕະພາບ ຫວຽດນາມ - ລາວ, ສະມາຄົມມິດຕະພາບ ຫວຽດນາມ - ໄທ ໄດ້ສົມທົບກັບສະມາຄົມມິດຕະພາບ ລາວ - ຫວຽດນາມ, ສະມາຄົມມິດຕະພາບ ໄທ - ຫວຽດນາມ ຈັດຕັ້ງການຢ້ຽມຢາມ ແລະ ຖະຫວາຍດອກໄມ້ທູບທຽນຢູ່ເຂດອະນຸສອນສະຖານປະທານ ໂຮ່ຈີມິນ ຢູ່ບ້ານ ຊຽງວາງ, ເມືອງ ໜອງບົກ, ແຂວງ ຄຳມ່ວນ (ປະເທດລາວ) ແລະ ເຂດອະນຸສອນສະຖານປະທານ ໂຮ່ຈີມິນ ຢູ່ບ້ານ ນາຈອກ, ຕາແສງ ນອງຍາດ, ເມືອງ ເມື່ອງ, ແຂວງ ນະຄອນພະນົມ (ປະເທດໄທ).
ຢູ່ນະຄອນຫຼວງກາຍໂຣ, ບັນດາພະນັກງານ, ພາລະກອນສະຖານທູດຫວຽດນາມ ປະຈຳອີຍີບ, ນັກສຶກສາ ແລະ ຜູ້ຕາງໜ້າບັນດາອົງການຫວຽດນາມ ປະຈຳອີຍີບ ໄດ້ເຂົ້າຮ່ວມພິທີສະເຫຼີມສະຫຼອງ 125 ປີແຫ່ງວັນຄ້າຍວັນເກີດປະທານໂຮ່ຈິມິນ. ກ່າວຄຳເຫັນທ່ີທີ່ພິທີ, ທ່ານເອກອັກຄະລັດຖະທູດຫວຽດນາມ ປະຈຳອີຍີບ ດ່າວແທງຈຸງ ສະເໜີໃຫ້ບັນດາພະນັກງານ, ພາລະກອນອົງການຕ່າງໜ້າຂອງຫວຽດນາມ ປະຈຳອີຍີບ ຍົກສູງຈິດໃຈຮໍ່າຮຽນ ແລະ ປະຕິບັດຕາມແບບຢ່າງຄຸນສົມບັດປະທານໂຮ່ຈິມິນ, ມານະພະຍາຍາມຮັກສາ ແລະ ເພີ່ມພູນຄຸນສ້າງການພົວພັນມິດຕະພາບລະຫວ່າງຫວຽດນາມ - ອີຍີບ ເຊິ່ງເພີ່ມໄດ້ກໍ່ຕັ້ງພື້ນຖານແລ້ວ.
ວັນທີ 18/05, ຢູ່ນະຄອນຫຼວງ Kiev, ປະເທດຢູແກຼນ, ໄດ້ດຳເນີນກອງປະຊຸມສຳມະນາສາກົນ ດ້ວຍຫົວຂໍ້ວ່າ “ໂຮ່ຈິມິນ - ນັກເຄື່ອນໄຫວປະຕິວັດທີ່ຍິ່ງໃຫຍ່ຂອງສະຕະວັດທີ 20”. ກອງປະຊຸມສຳມະນາແມ່ນໂອກາດເພື່ອໃຫ້ 2 ປະເທດຫວຽດນາມ - ຢູແກຼນ, ພິເສດແມ່ນລຸ້ນລຸ່ມ ຮັບຮູ້ບັນດາການປະກອບສ່ວນຂອງເພີ່ນ ໃນພາລະກິດປົດປ່ອຍຊາດ ແລະ ສ້າງສາປະເທດຫວຽດນາມ. ການເຄື່ອນໄຫວດັ່ງກ່າວໄດ້ປະກອບສ່ວນປັບປຸງ ແລະ ເພີ່ມທະວີການພົວພັນມິດຕະພາບທີ່ເປັນມູນເຊື້ອລະຫວ່າງ 2 ປະເທດ.