ທ່ານ ໂຊກດີ ແກ້ວແສງ ຮອງເລຂານຸການ
ຄະນະກຳມະການສົ່ງເສີມການລົງທຶນໄທກ່າວຄຳເຫັນທີ່ເວທີປາໄສ
(ພາບ: vov.vn)
(vovworld)- ເວທີປາໄສສົ່ງເສີມການຄ້າ, ການລົງທຶນຫວຽດນາມ-ໄທ ໄດ້ດຳເນີນໃນວັນທີ 27/11 ຢູ່ບາງກອກ ປະເທດໄທ ດ້ວຍຫົວເລື່ອງ “ບັນດາໂອກາດດ້ານການຄ້າ ແລະ ການລົງທຶນຢູ່ພາກກາງຫວຽດນາມ“ ເພື່ອແນໃສ່ເພີ່ມທະວີການຊຸກຍູ້ການຮ່ວມມືເສດຖະກິດສອງຝ່າຍ. ກ່າວຄຳເຫັນໄຂເວທີປາໄສ, ທ່ານໂງດຶກທັງ ເອກອັກຄະລັດຖະທູດຫວຽດນາມ ປະຈຳໄທ ສະແດງຄວາມພາກພູມໃຈກ່ຽວກັບເລື່ອງການພົວພັນລະຫວ່າງ ຫວຽດນາມ-ໄທ ໄດ້ຍົກຂຶ້ນລະດັບຄູ່ຮ່ວມມືຍຸດທະສາດ ແລະ ສອງປະເທດບັນລຸໄດ້ຜົນງານຫຼາຍຢ່າງກ່ຽວກັບການຮ່ວມມືດ້ານເສດຖະກິດ, ການຄ້າ, ການລົງທຶນໃນໄລຍະຜ່ານມາ.
ສ່ວນທ່ານ ໂຊກດີ ແກ້ວແສງ ຮອງເລຂານຸການຄະນະກຳມະການສົ່ງເສີມການລົງທຶນໄທ ໃຫ້ຮູ້ວ່າ: ລັດຖະບານໄທ ສະໜັບສະໜູນ, ສົ່ງເສີມບັນດາວິສາຫະກິດໄທເອົາໃຈໃສ່ລົງທຶນເຂົ້າຫວຽດນາມ ແລະ ພາກກາງຫວຽດນາມ. ເວທີປາໄສຄັ້ງນີ້ແມ່ນໂອກາດທີ່ດີເພື່ອໃຫ້ວິສາຫະກິດສອງປະເທດຊອກຮູ້ບັນດາຂໍ້ມູນຂ່າວກ່ຽວກັບສິ່ງແວດລ້ອມ, ໂອກາດລົງທຶນ, ແລກປ່ຽນກ່ຽວກັບຄວາມສາມາດຮ່ວມມືໃນໄລຍະຈະມາເຖິງ.