ທ່ານປະທານປະເທດ ເຈີນດ້າຍກວາງ ແລະ ປະທານາທິບໍດີ ຟີລີບປີນ Rodrigo Duterte ໄດ້ດຳເນີນການເຈລະຈາ
|
(vovworld)- ຕອນເຊົ້າວັນທີ 29/9, ພິທີຕ້ອນຮັບທ່ານ Rodrigo Duterte ປະທານາທິບໍດີ ຟີລີບປີນ ມາຢ້ຽມຢາມຫວຽດນາມ ຢ່າງເປັນທາງການແຕ່ວັນທີ 28-29/9 ໄດ້ຈັດຂຶ້ນຢ່າງສົມກຽດຢູ່ ທຳນຽບປະທານປະເທດ. ພາຍຫລັງພິທີຕ້ອນຮັບ, ທ່ານປະທານປະເທດ ເຈີນດ້າຍກວາງ ແລະ ປະທານາທິບໍດີ ຟີລີບປີນ Rodrigo Duterte ໄດ້ດຳເນີນການເຈລະຈາ. ການນຳສອງທ່ານສະແດງຄວາມເພິ່ງພໍໃຈກ່ຽວກັບການພັດທະນາຢ່າງແຮງ ແລະ ມີປະສິດທິຜົນຂອງການພົວພັນຮ່ວມມືມິດຕະພາບລະຫວ່າງສອງປະເທດໃນ 40 ປີຜ່ານມາ. ກ່ຽວກັບການກຳນົດທິດການພົວພັນສອງປະເທດໃຫ້ພັດທະນາໃນໄລຍະໃຫມ່, ສອງຝ່າຍເຫັນດີເພີ່ມທະວີການຮ່ວມມືດ້ານການເມືອງການທູດ, ຊຸກຍູ້ການພົວພັນຂັ້ນພັກ, ລັດຖະບານ, ລັດ, ສະພາແຫ່ງຊາດ ແລະ ການພົວພັນແລກປ່ຽນປະຊາຊົນ, ຍົກສູງກົນໄກຮ່ວມມືສອງຝ່າຍທີ່ມີຢູ່ແລ້ວ. ສອງຝ່າຍຕີລາຄາ ການຮ່ວມມືປ້ອງກັນຄວາມສະຫງົບ, ປ້ອງກັນຊາດ ແມ່ນຫນຶ່ງໃນບັນດາເສົາຄ້ຳສຳຄັນຂອງການພົວພັນຄູ່ຮ່ວມມືຍຸດທະສາດລະຫວ່າງສອງປະເທດ. ສອງຝ່າຍໄດ້ແລກປ່ຽນຢ່າງເລິກເຊິ່ງ ກວ້າງຂວາງ ກ່ຽວກັບບັນດາຂົງເຂດຮ່ວມມືອື່ນຄື: ທະເລ ແລະ ມະຫາສະມຸດ, ກະສິກຳ, ຄົມມະນາຄົມຂົນສົ່ງ, ວັດທະນະທຳທ່ອງທ່ຽວ, ການພົວພັນແລກປ່ຽນປະຊາຊົນ, ການສຶກສາ..ຄຽງຂ້າງການຮ່ວມມືສອງຝ່າຍ, ສອງຝ່າຍໄດ້ສຸມໃສ່ແລກປ່ຽນກ່ຽວກັບບັນດາບັນຫາສາກົນ ແລະ ພາກພື້ນ ຊື່ງຕ່າງຝ່າຍຕ່າງມີຄວາມສົນໃຈ. ສອງຝ່າຍຢືນຢັນ: ສະຫນັບສະຫນູນເຊິ່ງກັນ ແລະກັນເພື່ອສຳເລັດບົດບາດເປັນປະທານ ອາຊຽນ 2017 ຂອງ ຟິລີບປີນ ແລະ ປະເທດເຈົ້າພາບຈັດຕັ້ງກອງປະຊຸມສຸດຍອດ APEC 2017 ຂອງຫວຽດນາມ, ພ້ອມທັງໃຫ້ຄຳໝັ້ນສັນຍາສືບຕໍ່ສົມທົບ ແລະ ມານະພະຍາຍາມພ້ອມກັບບັນດາປະເທດ ອາຊຽນ ອື່ນ ຜັນຂະຫຍາຍປະຊາຄົມ ອາຊຽນ ສຳເລັດຜົນ.
ກ່ຽວກັບບັນຫາທະເລຕາເວັນອອກ, ສອງຝ່າຍໃຫ້ຄຳໝັ້ນສັນຍາຮັກສາ ແລະ ຊຸກຍູ້ສັນຕິພາບ, ຄວາມໝັ້ນຄົງ, ສະຖຽນລະພາບ, ຄວາມເສລີໃນການເດີນເຮືອບົນທະເລ ແລະ ການບິນ ກໍຄືການຄ້າບໍ່ຖືກກີດຂວາງໃນພາກພື້ນ, ພິເສດ ຢູ່ທະເລຕາເວັນອອກ, ຮຽກຮ້ອງບັນດາຝ່າຍຈົ່ງອົດກັ້ນ, ບໍ່ນາບຂູ່ຫລືໃນໃຊ້ກຳລັງອາວຸດ, ເຄົາລົບບັນດາວິວັດການການທູດ, ນິຕິທຳຢ່າງຄົບຖ້ວນ,ແກ້ໄຂຄວາມຂັດແຍ້ງໂດຍສັນຕິວິທີ, ບົນພື້ນຖານເຄົາລົບກົດໝາຍສາກົນ, ໃນນັ້ນມີສົນທິສັນຍາ ຂອງ ສປຊ ກ່ຽວກັບກົດໝາຍທະເລປີ 1982.ໃນຂອບເຂດການຢ້ຽມຢາມ, ປະທານາທິບໍດີ ຟິລີບຟີນ Rodrigo Duterte ໄດ້ເຂົ້າຢ້ຽມຂ່ຳນັບທ່ານເລຂາທິການໃຫຍ່ ຫງວຽນຟູຈ້ອງ, ພົບປະກັບນາຍົກລັດຖະມົນຕີ ຫງວຽນຊວນຟຸກ ແລະ ຕ້ອນຮັບຄະນະນັກທຸລະກິດຫວຽດນາມ. ຕອນຄ່ຳວັນທີ 29/9, ທ່ານປະທານປະເທດ ເຈີນດ້າຍກວາງ ຈັດງານລ້ຽງຮັບຮອງປະທານາທິບໍດີ Rodrigo Duterte ແລະ ຄະນະຜູ້ແທນຂັ້ນສູງ ຟີລີບປີນ ເນື່ອງໃນໂອກາດຄະນະມາຢ້ຽມຢາມຫວຽດນາມ ຢ່າງເປັນທາງການ.