ເຂດເສດຖະກິດ ຫວູງອ໋າງ
(ພາບປະກອບ)
(vovworld) – ວັນທີ 11/7, ທ່ານຮອງນາຍົກລັດຖະມົນຕີ ຫງວຽນທ້ຽນເຍີນ ເປັນປະທານກອງປະຊຸມຜ່ານເຄືອຂ່າຍອິນເຕີເນັດ ສະຫລຸບວຽກງານບຳລຸງສ້າງຊັບພະຍາກອນມະນຸດໃຫ້ເຂດເສດຖະກິດ ຫວູງອ໋າງ, ແຂວງ ຮ່າຕິ້ງ. ກອງປະຊຸມໄດ້ຈັດຕັ້ງລະຫວ່າງຮ່າໂນ້ຍ ແລະ ຮ່າຕິ້ງ. ຄະນະກຳມະການປະຊາຊົນແຂວງຮ່າຕິ້ງໃຫ້ຮູ້ວ່າ, ປະຈຸບັນເຂດເສດຖະກິດຫວຸງອ໋າວ ມີວິສາຫະກິດ 226 ແຫ່ງ ໄດ້ຮັບອະນຸຍາດໃຫ້ລົງທຶນ ແລະ ມີ 26 ໂຄງການພວມເຄື່ອນໄຫວ. ຄາດວ່າຄວາມຕ້ອງການຜູ້ອອກແຮງງານເຖິງປີ 2015 ແມ່ນກວ່າ 67.000 ຄົນ. ກ່າວຄວາມເຫັນທີ່ກອງປະຊຸມ, ທ່ານຮອງນາຍົກລັດຖະມົນຕີ ຫງວຽນທ້ຽນເຍິນ ຕີລາຄາສູງໝາກຜົນຂອງວຽກງານບຳລຸງສ້າງ ແລະ ຮັບປະກັນແຫຼ່ງຊັບພະຍາກອນມະນຸດໃຫ້ແກ່ເຂດເສດຖະກິດຫວູງອ໋າງ. ທ່ານຮອງນາຍົກລັດຖະມົນຕີສະເໜີວ່າ, ໃນໄລຍະຈະມາເຖິງ, ບັນດາກະຊວງ, ຂະແໜງການ ແລະ ແຂວງຮ່າຕິງ ຄວນສົມທົບກັບບັນດາວິສາຫະກິດກວດຄືນກ່ຽວກັບຄວາມຕ້ອງການດ້ານຊັບພະຍາກອນມະນຸດ, ເພື່ອໃຫ້ບັນດາຮາກຖານບຳລຸງສ້າງເປັນເຈົ້າການເພື່ອວາງແຜນບຳລຸງສ້າງ.
“ໃນຕໍ່ໜ້າ, ຂ້າພະເຈົ້າສະເໜີໃຫ້ຜັນຂະຫຍາຍຮູບແບບສົມທົບກັນລະຫວ່າງບັນດາມະຫາວິທະຍາໄລກັບວິສາຫາກິດ ເພື່ອສະໜອງຊັບພະຍາກອນມະນຸດ. ຜັນຂະຫຍາຍບັນດາມາດຕະການ, ນັບແຕ່ການກຳນົດທິດ ຕະຫຼອດຮອດການບຳລຸງສ້າງ.. ສະເພາະການບຳລຸງສ້າງພາສາຈີນ, ສະເໜີໃຫ້ມີການເຮັດວຽກລະຫວ່າງບາງໂຮງຮຽນ ກັບບັນດາວິສາຫະກິດ ກ່ຽວກັບວິທີການສິດສອນໃຫ້ເໝາະສົມ“
ທ່ານກໍ່ໄດ້ສະເໜີໃຫ້ແຂວງຮ່າຕິງ ຜັນຂະຫຍາຍການວາງແຜນສັງລວມ, ຮັບປະກັນຄວາມຕ້ອງການດ້ານເຮືອນຢູ່ໃຫ້ແກ່ກຳມະກອນຜູ້ອອກແຮງງານ, ແລະ ສົ່ງເສີມນັກຮຽນ ເຂົ້າຮຽນບັນດາຂະແໜງອາຊີບທີ່ເໝາະສົມກັບຄວາມຕ້ອງການຊັບພະຍາກອນຂອງເຂດເສດຖະກິດຫວຸງອ໋າງ.