(vovworld) - ຢູ່ນອກກອງປະຊຸມຂັ້ນສູງອາຊຽນ 27 ແລະ ບັນດາກອງປະຊຸມກ່ຽວຂ້ອງ. ຕອນເຊົ້າວັນທີ 22/11, ເມື່ອພົບປະເຈລະຈາກັບປະທານາທິບໍດີ ອິນໂດເນເຊຍ Joko Widodo, ການນຳສອງທ່ານໄດ້ພ້ອມກັນປຶກສາຫາລືບັນດາມາດຕະການເພື່ອແນໃສ່ເພີ່ມທະວີການຮ່ວມມື, ການເຈລະຈາລະຫວ່າງສອງປະເທດ ໃນບັນດາຂົງເຂດການເມືອງ, ການຕ່າງປະເທດ, ການຄ້າ, ການລົງທຶນ, ການປ້ອງກັນຊາດ, ປ້ອງກັນຄວາມສະຫງົບ, ການຮ່ວມມືດ້ານທະເລ. ການນຳສອງທ່ານເນັ້ນໜັກເປັນພິເສດເຖິງຄວາມສຳຄັນຂອງເລື່ອງຮັກສາສັນຕິພາບ, ສະຖຽນລະພາບຢູ່ທະເລຕາເວັນອອກ, ເຄົາລົບບັນດາຫຼັກການຂອງກົດໝາຍສາກົນ, ປະຕິບັດຖະແຫຼງການກ່ຽວກັບການປະພຶດຂອງຝ່າຍຕ່າງໆຢູ່ທະເລຕາເວັນອອກ (DOC) ຢ່າງມີປະສິດທິຜົນ ແລະ ເຈລະຈາເພື່ອບັນລຸປະມວນຂໍ້ກຳນົດກ່ຽວກັບການປະພຶດຢູ່ທະເລຕາເວັນອອກ (COC) ໂດຍໄວ.
ກ່ອນໜ້ານັ້ນ, ຕອນຄຳ່ວັນທີ 21/11, ທີ່ການພົບປະສອງຝ່າຍກັບທ່ານນາຍົກລັດຖະມົນຕີອົດສະຕາລີ Malcom Turnbull, ທ່ານນາຍົກລັດຖະມົນຕີ ຫງວຽນເຕິ໋ນຢຸງ ສະເໜີອົດສະຕາລີສ້າງທຸກເງື່ອນໄຂສະດວກເພື່ອໃຫ້ຜະລິດຕະພັນກະເສດ, ສິນໃນນຳ້ຂອງຫວຽດນາມສຳຜັດກັບຕະຫຼາດອົດສະຕາລີ. ສອງຝ່າຍກໍ່ແບ່ງປັນຄວາມວິຕົກກັງວົນຕໍ່ສະພາບການຢູ່ທະເລຕາເວັນອອກໄລຍະຜ່ານມາ ແລະ ເນັ້ນໜັກເຖິງຄວາມສຳຄັນຂອງການປະຕິບັດກົດໝາຍສາກົນ, ບໍ່ນຳໃຊ້ອາວຸດຫຼືຂົ່ມຂູ່ນຳໃຊ້ກຳລັງອາວຸດ, ບໍ່ນຳໃຊ້ກຳລັງທະຫານຢູ່ທະເລຕາເວັນອອກ.
ໃນວັນດຽວກັນ, ທີ່ການພົບປະສອງຝ່າຍກັບທ່ານນາຍົກລັດຖະມົນຕີລັດເຊຍ Dmitry Medvedev, ທ່ານນາຍົກລັດຖະມົນຕີ ຫງວຽນເຕິ໋ນຢຸງ ສະເໜີລັດເຊຍ, ໃຫ້ສັດຕະຍາບັນ ແລະ ຊຸກຍູ້ບັນດາປະເທດສະມາຊິກອື່ນໆ ເພື່ອໃຫ້ສັນຍາການຄ້າເສລີມີຜົນສັກສິດໂດຍໄວ. ກ່ຽວຂ້ອງເຖິງສະພາບການຢູ່ທະເລຕາເວັນອອກ, ທ່ານນາຍົກລັດຖະມົນຕີ Dmitry Medvedev ເນັ້ນໜັກວ່າ, ເພື່ອແກ້ໄຂຄວາມຂັດແຍ້ງກັນໂດຍສັນຕິວິທີ, ບັນດາຝ່າຍກ່ຽວຂ້ອງຕ້ອງປະຕິບັດກົດໝາຍສາກົນຢ່າງເຂັ້ມງວດ, ໃນນັ້ນມີສົນທິສັນຍາສະຫະປະຊາຊາດກ່ຽວກັບກົດໝາຍວ່າດ້ວຍທະເລປີ 1982.
ໃນການພົບປະກັບປະທານາທິບໍດີອາເມລິກາ Barack Obama , ທ່ານນາຍົກລັດຖະມົນຕີ ຫງວຽນເຕິ໋ນຢຸງ ສະເໜີອາເມລິກາປະກອບສ່ວນຢ່າງຕັ້ງໜ້າກວ່າອີກເຂົ້າໃນການຮັບປະກັນສັນຕິພາບ: ສະຖຽນລະພາບ ແລະ ຄວາມວັດທະນາຖາວອນຢູ່ພາກພື້ນ, ນັບທັງຢູ່ທະເລຕາເວັນອອກ. ປະທານາທິບໍດີອາເມລິກາ Barack Obama ຖືວ່າ, ອາເມລິກາ ແລະ ຫວຽດນາມ ຄວນສືບຕໍ່ສົມທົບກັນຢ່າງແໜ້ນແຟ້ນ ເພື່ອໃຫ້ສັດຕະຍາບັນ ແລະ ຜັນຂະຫຍາຍການປະຕິບັດ TPP ຢ່າງມີປະສິດທິຜົນ. ກ່ຽວກັບບັນຫາທະເລຕາເວັນອອກ, ອາເມລິກາສະໜັບສະໜູນຫຼັກໝັ້ນຂອງຫວຽດນາມ ແລະ ຖືວ່າ ຫວຽດນາມ ແລະ ບັນດາປະເທດອາຊຽນຕ້ອງມີທັດສະນະລວມ ແລະ ເພີ່ມທະວີການສົມທົບກັນເພື່ອແກ້ໄຂການຂັດແຍ້ງກັນດ້ວຍສັນຕິວິທີ ບົນພື້ນຖານກົດໝາຍສາກົນ ແລະ ບັນດາຂໍ້ຕົກລົງໃນພາກພື້ນ.
ໃນວັນດຽວກັນ, ທ່ານນາຍົກລັດຖະມົນຕີ ຫງວຽນເຕິ໋ນຢຸງ ໄດ້ມີການພົບປະ ແລະ ແລກປ່ຽນກັບທ່ານນາຍົກລັດຖະມົນຕີໄທປຣາຢຸດ ຈັນໂອຈາ ກ່ຽວກັບບາງບັນຫາໃນການພົວພັນສອງຝ່າຍ. ທ່ານນາຍົກລັດຖະມົນຕີ ຫງວຽນເຕິ໋ນຢຸງ ສະເໜີສອງຝ່າຍປະຕິບັດບົດບັນທຶກຊ່ວຍຈຳກ່ຽວກັບການຮ່ວມມືແຮງງານ; ສະເໜີໄທສ້າງເງື່ອນໄຂໃຫ້ຄົນງານຫວຽດນາມຢູ່ໄທ ແລະ ອະນຸຍາດໃຫ້ແຮງງານເສລີຫວຽດນາມທຸກຄົນຢູ່ໄທ ໄດ້ຈົດທະບຽນ ແລະ ສືບຕໍ່ເຮັດວຽກ. ທ່ານກໍ່ສະເໜີກະຊວງການຕ່າງປະເທດສອງປະເທດສ້າງກົນໄກປຶກສາຫາລືກ່ຽວກັບການຮ່ວມມືໃນອາຊີບປະມົງ.