(VOVWORLD) -ທ່ານນາຍົກລັດຖະມົນຕີ ຟ້າມມິງຈິງ ໄດ້ເນັ້ນໜັກວ່າ ເພື່ອສືບຕໍ່ປະຕິບັດເປົ້າໝາຍຄວບຄູ່, ທາງນະຄອນໂຮ່ຈີມິນ ແລະ 7 ແຂວງຕ້ອງສຸມໃສ່ສະກັດກັ້ນ, ຄວບຄຸມໂລກລະບາດໂຄວິດ - 19, ກັບຄືນສູ່ສະພາບການທີ່ເປັນປົກກະຕິໂດຍໄວ.
 ທ່ານນາຍົກລັດຖະມົນຕີ ຫວຽດນາມ ຟ້າມມິງຈິງ ລົງກວດກາຢູ່ເຂດແຍກຕົວຫໍພັກຂອງມະຫາວິທະຍາໄລແຫ່ງຊາດ ນະຄອນໂຮ່ຈີມິນ (ພາບ: TTXVN) |
ວັນທີ 26 ມິຖຸນາ, ຢູ່ນະຄອນໂຮ່ຈີມິນ, ທ່ານນາຍົກລັດຖະມົນຕີ ຫວຽດນາມ ຟ້າມມິງຈິງ ໄດ້ເປັນປະທານກອງປະຊຸມທາງອອນລາຍກັບການນຳຫຼັກແຫຼ່ງນະຄອນໂຮ່ຈີມິນ ແລະ ບັນດາທ້ອງຖິ່ນໃກ້ຄຽງ ຂຶ້ນກັບເຂດເສດຖະກິດຈຸດສຸມທາງພາກໃຕ້ລວມມີ: ບິ່ງເຢືອງ, ດົ່ງນາຍ, ບ່າເຣີຍວຸງເຕົາ, ບິ່ງເຟືອກ, ໄຕນິງ, ລອງອານ, ຕຽນຢາງ. ທ່ານນາຍົກລັດຖະມົນຕີ ຟ້າມມິງຈິງ ໄດ້ເນັ້ນໜັກວ່າ ເພື່ອສືບຕໍ່ປະຕິບັດເປົ້າໝາຍຄວບຄູ່, ທາງນະຄອນໂຮ່ຈີມິນ ແລະ 7 ແຂວງຕ້ອງສຸມໃສ່ສະກັດກັ້ນ, ຄວບຄຸມໂລກລະບາດໂຄວິດ - 19, ກັບຄືນສູ່ສະພາບການທີ່ເປັນປົກກະຕິໂດຍໄວ, ແກ້ໄຂຜົນຮ້າຍຢ້ອນຫຼັງ ແລະ ຍູ້ແຮງການຜະລິດດຳເນີນທຸລະກິດ, ຮັບປະກັນສະຖຽນລະພາບດ້ານເມືອງ, ຄວາມໝັ້ນຄົງ, ຄວາມເປັນລະບຽບຮຽບຮ້ອຍ, ຄວາມປອດໄພໃນສັງຄົມ, ຍົກສູງຊີວິດການເປັນຢູ່ທາງດ້ານວັດຖຸ ແລະ ຈິດໃຈຂອງປະຊາຊົນເປັນເທື່ອລະກ້າວ, ຮັບປະກັນໃຫ້ປະຊາຊົນໄດ້ກິນອີ່ມນຸ່ງອຸ່ນ, ມີເງື່ອນໄຂໃນການດຳລົງຊີວິດ. ຕ້ອງອີງໃສ່ ສະພາບການໂລກລະບາດໂຄວິດ - 19 ໃນແຕ່ລະໄລຍະ, ແຕ່ລະສະຖານທີ່ເພື່ອສະຫງວນບຸລິມະສິດ, ສຸມໃສ່ໜ້າທີ່ພັດທະນາເສດຖະກິດທັງປ້ອງກັນ, ຕ້ານໂລກລະບາດໂຄວິດ - 19, ປະຕິບັດທັງສອງໜ້າທີ່ນີ້ຢ່າງຄົບຊຸດ. ບັນດາອົງການຕ້ອງກວດກາຄືນຢ່າງຮີບດ່ວນ, ແກ້ໄຂບັນດາຄວາມຫຍຸ້ງຍາກ, ສິ່ງທີ່ຄ້າງຄາໃນການຜະລິດ, ດຳເນີນທຸລະກິດ, ຮັກສາສະຖຽນລະພາບດ້ານການເມືອງ, ຮັບປະກັນຄວາມປອດໄພໃຫ້ແກ່ປະຊາຊົນ.