ທ່ານປະທານປະເທດ ຫງວຽນຊວັນຟຸກ: ມະຫາວິທະຍາໄລສ້າງຄູ ຮ່າໂນ້ຍ ຄວນປັບຕົວຢ່າງແຮງ ເພື່ອປະກອບທັກສະ ແລະ ຄວາມຮູ້ໃໝ່
(VOVWORLD) - ຕອນເຊົ້າວັນທີ 18 ພະຈິກ, ຢູ່ ຮ່າໂນ້ຍ, ທ່ານປະທານປະເທດ ຫວຽດນາມ ຫງວຽນຊວັນຟຸກ ໄດ້ເຂົ້າຮ່ວມພິທີສະເຫຼີມສະຫຼອງວັນສ້າງຕັ້ງມະຫາວິທະຍາໄລສ້າງຄູ ຮ່າໂນ້ຍ ຄົບຮອບ 70 ປີ (11/10/1951 – 11/10/2021) ແລະ ຮັບຫຼຽນໄຊແຮງງານຊັ້ນໜຶ່ງ ຄັ້ງທີ 2.
 ທ່ານປະທານປະເທດຫວຽດນາມ ຫງວຽນຊວັນຟຸກ ມອບຫຼຽນໄຊແຮງງານຊັ້ນໜຶ່ງໃຫ້ແກ່ມະຫາວິທະຍາໄລສ້າງຄູ ຮ່າໂນ້ຍ (ພາບ: VOV) |
ກ່າວຄຳເຫັນທີ່ພິທີ, ທ່ານປະທານປະເທດຫວຽດນາມ ຫງວຽນຊວັນຟຸກ ໄດ້ຕີລາຄາວ່າ ໃນຕະຫຼອດ 70 ປີຜ່ານມາ, ມະຫາວິທະຍາໄລສ້າງຄູ ຮ່າໂນ້ຍ ໄດ້ມີການປະກອບສ່ວນຢ່າງເຕັມທີ່ແກ່ປະເທດຊາດໃນຍຸກສະໄໝປະທານ ໂຮ່ຈີມິນ ແລະ ໄດ້ຮັບຖືວ່າ ແມ່ນອູ່ບຳລຸງສ້າງຖັນແຖວຄູອາຈານທີ່ມີສະຕິປັນຍາເພື່ອສິດສອນໃຫ້ຄົນລຸ້ນຕ່າງໆໃນທຸກແຖບຖິ່ນຂອງປະເທດຊາດ, ປະກອບສ່ວນໂດຍກົງເຂົ້າໃນພາລະກິດສຶກສາ; ສ້າງສາ ແລະ ປົກປັກຮັກສາປະເທດຊາດ.
ເມື່ອເວົ້າເຖິງສິ່ງທ້າທາຍຂອງປະເທດ ກໍຄືພື້ນຖານການສຶກສາໃນສັງກາດຫັນເປັນດີຈີຕອນ, ທ່ານປະທານປະເທດ ປາດຖະໜາວ່າ ດ້ວຍບົດບາດເປັນໜຶ່ງໃນຈຳນວນມະຫາວິທະຍາໄລສ້າງຄູຈຸດສຸມສອງແຫ່ງຂອງປະເທດຊາດ, ມະຫາວິທະຍາໄລສ້າງຄູ ຮ່າໂນ້ຍ ຄວນປັບຕົວຢ່າງແຮງເພື່ອປະກອບທັກສະ ກໍຄືຄວາມຮູ້ໃໝ່ໆ. ໃນໄລຍະສິດສອນ, ຕ້ອງມີການປ່ຽນແປງໃໝ່ຢ່າງຮອບດ້ານ ນັບທັງວິທີ ແລະ ເນື້ອໃນການສິດສອນ ເພື່ອແນໃສ່ຕອບສະໜອງຕາມສະພາບການໃໝ່ ແລະ ຄຳຮຽກຮ້ອງຕ້ອງການໃໝ່ໃນປັດຈຸບັນ.