(vovworld) - ຕອນເຊົ້າວັນທີ 07/02, ຢູ່ຮ່າໂນ້ຍ, ທ່ານປະທານປະເທດ ເຈືອງເຕີນຊາງ ໄດ້ລົງຢ້ຽມຢາມ ແລະ ອວຍພອນປີໃໝ່ໝູ່ຄະນະພະນັກງານ, ກຳມະກອນ ແລະ ຜູ້ອອກແຮງງານກຸ່ມບໍລິສັດນ້ຳມັນອາຍແກັດແຫ່ງຊາດຫວຽດນາມ (PVN). ທ່ານປະທານປະເທດ ໄດ້ຕີລາຄາສູງລະດັບການເຕີບໂຕຢ່າງວ່ອງໄວຂອງກຸມບໍລິສັດນ້ຳມັນອາຍແກັດແຫ່ງຊາດຫວຽດນາມ, ພິເສດແມ່ນບັນດາການເຄື່ອນໄຫວຢູ່ຕະຫຼາດຕ່າງປະເທດ. ທ່ານປະທານປະເທດຖືວ່າ ໃນປີຜ່ານມາພະນັກງານ, ກຳມະກອນຂະແໜງນ້ຳມັນອາຍແກັດກວ່າ 5 ໝື່ນຄົນ ບໍ່ພຽງແຕ່ປະກອບສ່ວນໃຫ້ແກ່ເສດຖະກິດເທົ່ານັ້ນ ຫາກຍັງປະຕິບັດ ໜ້າທີ່ອື່ນໆຂອງປະເທດຊາດ ໃນຂົງເຂດປ້ອງກັນຊາດປ້ອງກັນຄວາມສະຫງົບ, ການຕ່າງປະເທດ. ທ່ານປະທານປະເທດ ເຈືອງເຕີນຊາງ ອວຍພອນໃຫ້ກຸ່ມບໍລິສັດນ້ຳມັນອາຍແກັດກາຍເປັນຫົວໜ່ວຍທີ່ມີລະດັບຄຸ້ມຄອງດີທີ່ສຸດ, ສ້າງກຸ່ມບໍລິສັດໃຫ້ພັດທະນາຢ່າງວ່ອງໄວທີ່ສຸດ, ມີປະສິດທິຜົນສູງສຸດ, ກາຍເປັນເສົາຄຳທີ່ໝັ້ນຄົງເຂັ້ມແຂງຂອງພື້ນຖານເສດຖະກິດ, ມີບົດບາດທຽບເທົ່າກັບບັນດາກຸ່ມບໍລິສັດນ້ຳມັນອາຍແກັດໃຫຍ່ສຸດຢູ່ອາຊີຕາເວັນອອກສ່ຽງໃຕ້ ໃນປີ 2011 – 2020.
ກຸ່ມບໍລິສັດນ້ຳມັນອາຍແກັດຫວຽດນາມ ແມ່ນລັດວິສາຫະກິດທີ່ຮັກສາບົດບາດນຳໜ້າໃນຂົງເຂດຂຸດຄົ້ນພະລັງງານ. ໃນປີ 2012, PVN ບັນລຸລະດັບເຕີບໂຕເສດຖະກິດ 20% ມອບເຂົ້າງົບປະມານແຫ່ງລັດເພີ່ມຂຶ້ນ 15%. ຄຽງຂ້າງນັ້ນ, ກຸ່ມບໍລິສັດຍັງເປີດກວ້າງການຜະລິດ, ດຳເນີນທຸລະກິດການບໍລິການຢູ່ບັນດາປະເທດຂຶ້ນກັບພາກພື້ນອາຊີ, ອາຟລິກາ, ອາເມລິກາລາຕີນ ດ້ວຍປະລິມານນ້ຳມັນທີ່ຂຸດຄົ້ນຈາກຕ່າງປະເທດແມ່ນ 1,1 ລ້ານໂຕນ.