ທ່ານເລຂາທິການໃຫຍ່ຫງວຽນຟູ໋ຈ້ອງລົງເຮັດວຽກຢູ່ແຂວງເກີນເທີ
ທ່ານເລຂາທິການໃຫຍ່ຫງວຽນຟູ໋ຈ້ອງລົງເຮັດວຽກຢູ່ແຂວງເກີນເທີ
(ພາບ: dantri.com)
(vovworld) - ວັນທີ 14/8, ທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດ ຫວຽດນາມ ຫງວຽນຟູ໋ຈ້ອງ ໄດ້ລົງກວດກາສະພາບການປະຕິບັດໜ້າທີ່ພັດທະນາເສດຖະກິດ - ສັງຄົມ, ການປ້ອງກັນຊາດ - ປ້ອງກັນຄວາມສະຫງົບ ແລະ ກໍ່ສ້າງພັກຢູ່ແຂວງ ເກີນເທີ. ທີ່ການເຮັດວຽກກັບພະນັກງານຫຼັກແຫຼ່ງ, ທ່ານເລຂາທິການໃຫຍ່ ຫງວຽນຟູ໋ຈ້ອງ ປາດຖະໜາວ່າ: ແຂວງ ເກີນເທີ ເສີມຂະຫຍາຍທຸກໆແຫຼ່ງກຳລັງ, ສູ້ຊົນກໍ່ສ້າງ ແລະ ພັດທະນານະຄອນສົມເປັນສູນ ທາງ ເສດຖະກິດ, ວັດທະນະທຳ, ນຳໜ້າໃນພາລະກິດຫັນປະເທດຊາດເປັນອຸດສາຫະ ກຳ, ທັນສະໄໝ, ສວມບົດບາດເປັນກຳລັງໜູນຊຸກຍູ້ການພັດທະນາຂອງທົ່ວເຂດທົ່ງ ພຽງແມ່ນ້ຳຂອງທາງພາກໃຕ້ ຫວຽດນາມ, ກາຍເປັນນະຄອນອຸດສາຫະກຳກ່ອນປີ 2020 ໂດຍພື້ນຖານ. ທ່ານເລຂາທິການໃຫຍ່ ຫງວຽນຟູ໋ຈ້ອງ ກໍ່ຊີ້ແຈ້ງວ່າ: ແຂວງ ເກີນເທີ ຄວນສືບຕໍ່ເພີ່ມທະວີລັກສະນະເປັນເຈົ້າການ, ຜັນຂະຫຍາຍການປະຕິບັດ ບັນດາໜ້າທີ່ ເຊິ່ງມະຕິກອງປະຊຸມໃຫຍ່ອົງຄະນະພັກນະຄອນ ໄດ້ວາງອອກຢ່າງ ຂ້ຽວຂາດ, ພ້ອມທັງກຳນົດ ທິດຍຸດທະສາດຍາວນານ, ວາງອອກບັນດາມາດຕະການ ມີຄວາມສາມາດເປັນໄປ ໄດ້ເພື່ອປະຕິບັດບັນດາການກຳນົດທິດພື້ນຖານກ່ຽວກັບການ ກໍ່ສ້າງ ແລະ ພັດທະນາແຂວງ ເກີນເທີ ກໍ່ຄືເຂດທົ່ງພຽງແມ່ນ້ຳຂອງທາງພາກໃຕ້ ຫວຽດນາມ. ທ່ານເລຂາທິການໃຫຍ່ ຫງວຽນຟູ່ຈ້ອງ ສະເໜີໃຫ້ແຂວງ ເກີນເທີ ເອົາໃຈໃສ່ຮັກສາ ສະຖຽນລະພາບດ້ານການເມືອງ, ຄວາມເປັນລະບຽບຮຽບຮ້ອຍ ທາງສັງຄົມ, ປົກປັກຮັກສາ ການເມືອງໃນບໍລິເວນນະຄອນ, ແກ້ໄຂບັນຫາຊົນຊາດຊົນເຜົ່າ, ສາສະໜາເປັນຢ່າງດີ, ສືບຕໍ່ປະຕິບັດວຽກງານກໍ່ສ້າງພັກ, ຕໍ່ສູ້ຕ້ານການ ສໍ້ລາດບັງຫຼວງ, ການຟຸມເຟືອຍ.