(vovworld) - ຕອບສຳພາດຕໍ່ນັກຂ່າວພາຍຫຼັງສິ້ນສຸດກອງປະຊຸມປະຈຳປີເວທີປາໄສເສດຖະກິດໂລກ (ຫຼື WEF) ຄັ້ງທີ 43 ຢູ່ Davos, ທ່ານລັດຖະມົນຕີກະຊວງກະສິກຳ ແລະ ພັດທະນາຊົນນະບົດຫວຽດນາມ ກາວດຶກຟາດ ໃຫ້ຮູ້ວ່າ: ກອງປະຊຸມປະຈຳປີ Davos ແມ່ນໂອກາດດີ ເພື່ອໃຫ້ຄະນະຜູ້ແທນ ຫວຽດນາມ ໄດ້ພົບປະກັບການນຳປະເທດຕ່າງໆ, ວິສາຫະກິດ, ບັນດານັກເສດຖະກິດ ແລະ ນັກຮຽນຮູ້ ເພື່ອແລກປ່ຽນກ່ຽວກັບບັນດາບັນຫາທີ່ພວມໄດ້ຮັບຄວາມສົນໃຈຈາກໂລກ. ໃນກອງປະຊຸມຄັ້ງຕ່າງໆ, ຄະນະຜູ້ແທນ ຫວຽດນາມ ໄດ້ສຸມໃສ່ເຂົ້າໃນ 2 ຈຸດໝາຍຄື: ທາບທາມຄວາມເຫັນຂອງບັນດາສະມາຊິກເຂົ້າຮ່ວມເວທີປາໄສກ່ຽວກັບສະພາບການເສດຖະກິດໂລກ, ແລະ ບັນດາທ່າອ່ຽງກໍ່ຄືບັນດາມາດຕະການ, ລາຍງານບັນດາໝາກຜົນແຫ່ງການຜັນຂະຫຍາຍຂໍ້ລິເລີ່ມຮູບແບບການຮ່ວມມືລະຫວ່າງພາກ ລັດ - ເອກະຊົນ (ຫຼື PPP) ໃນກະສິກຳ. ຜ່ານບົດລາຍງານ, ປະຊາຄົມໂລກຕີລາຄາສູງບັນດາຄວາມມານະພະຍາຍາມຂອງ ລັດຖະບານ ຫວຽດນາມ ໃນການພັດທະນາເສດຖະກິດ, ພິເສດແມ່ນໃນຂົງເຂດກະສິກຳ. ນີ້ແມ່ນບົດຮຽນເຊິ່ງ ຫຼາຍປະເທດໃນໂລກ ກໍ່ຢາກຖອດຖອນ ແລະ ພັດທະນາ. ພ້ອມກັນນັ້ນ, ຫວຽດນາມ ໄດ້ຮັບການຕີລາຄາ ແມ່ນໜຶ່ງໃນບັນດາປະເທດໃຫ້ຄຳໝັ້ນສັນຍາຢ່າງຂັນແຂງ ແລະ ສົມທົບເນື້ອໃນກ່ຽວກັບການເຕີບໂຕຂຽວໃນບັນດາໂຄງການເຄື່ອນໄຫວພັດທະນາເສດຖະກິດ - ສັງຄົມ ແລະ ໃນບັນດາລາຍການເຄື່ອນໄຫວຂອງຂະແໜງຕ່າງໆ ພິເສດແມ່ນໃນຂົງເຂດກະສິກຳ ແລະ ພັດທະນາຊົນນະບົດ.