(vovworld) - ຕອນບ່າຍວັນທີ 3/9, ຢູ່ສຳນັກງານປະທານປະເທດ, ທ່ານ Ronald Kirk ຜູ້ຕາງໜ້າໜ້າດ້ານການຄ້າອາເມລິກາ ໄດ້ເຂົ້າຢ້ຽມຄຳນັບທ່ານປະທານປະເທດຫວຽດນາມ Truong Tan Sang ເນື່ອງໃນໂອກາດມາຢ້ຽມຢາມຫວຽດນາມ ໃນລະຫວ່າງວັນທີ 1 – 3/9. ທີ່ການຕ້ອນຮັບ, ທ່ານປະທານປະເທດ Truong Tan Sang ໄດ້ຢືນຢັນວ່າ ຍາມໃດຫວຽດນາມ ກໍຖືການພົວພັນກັບອາເມລິກາ ເປັນສຳຄັນ, ຊົມເຊີຍບັນດາບາດກ້າວໃນການພັດທະນາສາຍພົວພັນສອງຝ່າຍ ແລະ ເນັ້ນໜັກວ່າ ສອງປະເທດຄວນແບ່ງປັນບັນດາຜົນປະໂຫຍດລວມໃນການຊຸກຍູ້ການພົວພັນໃຫ້ຂຶ້ນສູ່ລະດັບສູງໃໝ່, ບົນພື້ນຖານສະເໝີພາບ, ເຄົາລົບເອກະລາດ, ອະທິປະໄຕ, ຜືນແຜນດິນອັນຄົບຖ້ວນຂອງກັນ, ເພື່ອສັນຕິພາບ, ສະຖຽນລະພາບ ແລະ ການຮ່ວມມືຢູ່ພາກພື້ນ, ທ່ານປະທານປະເທດ ໄດ້ຕີລາຄາສູງບົດບາດຂອງອົງການຕາງໜ້າດ້ານການຄ້າຂອງອາເມລິກາ ໃນການຊຸກຍູ້ການພົວພັນລະຫວ່າງສອງປະເທດ, ພິເສດແມ່ນໃນຂົງເຂດເສດຖະກິດ, ການຄ້າ, ການລົງທຶນ. ທ່ານປະທານປະເທດຖືວ່າ ສອງຝ່າຍຄວນສືບຕໍ່ເສີມຂະຫຍາຍຄວາມສາມາດບົ່ມຊ້ອນທີ່ໃຫຍ່ຫຼວງໃນຂົງເຂດຮ່ວມມືດັ່ງກ່າວ ແລະ ປາດຖະໜາວ່າ ບັນດາວິສາຫະກິດຂອງອາເມລິກາ ຈະເພີ່ມທະວີການລົງທຶນ ແລະ ດຳເນີນທຸລະກິດຢູ່ຫວຽດນາມ. ທ່ານປະທານປະເທດໄດ້ສະເໜີໃຫ້ລັດຖະບານອາເມລິກາ ຮັບຮູ້ຫວຽດນາມ ແມ່ນີພື້ນຖານເສດຖະກິດການຕະຫຼາດໂດຍໄວ ແລະ ສະຫງວນໃຫ້ຫວຽດນາມກົນໄກບຸລິມະສິດດ້ານພາສີ (GSP); ສອງຝ່າຍສືບຕໍ່ສົມທົບກັນຢ່າງແໜ້ນແຟ້ນໃນບັນດາກົນໄກຮ່ວມມື, ເຊື່ອມຕໍ່ເສດຖະກິດຫຼາຍຝ່າຍ. ພ້ອມກັນມານະພະຍາຍາມແກ້ໄຂຄວາມແຕກຕ່າງກັນ, ການແກ້ງແຍ່ງດ້ານເສດຖະກິດ - ການຄ້າ ບົນພື້ນຖານຄູ່ຮ່ວມມືຢ່າງສະເໝີພາບ, ເຄົາລົບເຊິ່ງກັນ ແລະ ກັນ, ຕ່າງຝ່າຍຕ່າງມີຜົນປະໂຫຍດ ແລະ ຕ້ອງຄິດໄລ່ເຖິງຜົນປະໂຫຍດຂອງກັນ.
ຜູ້ຕາງໜ້າດ້ານການຄ້າອາເມລິກາ ທ່ານ Ronald Kirk ໄດ້ຢືນຢັນວ່າ ລັດຖະບານອາເມລິກາ ປາດຖະໜາວ່າ ການພົວພັນຮ່ວມມືລະຫວ່າງສອງປະເທດຈະພັດທະນາຢ່າງແຮງກວ່າອີກໃນໄລຍະຈະມາເຖິງ, ພິເສດແມ່ນໃນຂົງເຂດເສດຖະກິດ, ການຄ້າ ແລະ ການລົງທຶນ. ທ່ານ Ronald Kirk ປາດຖະໜາວ່າ ສອງຝ່າຍພ້ອມກັບບັນດາຄູ່ຮ່ວມມືອື່ນໆ ສິ້ນສຸດການເຈລະຈາສັນຍາຄູ່ຮ່ວມມືເສດຖະກິດຍຸດທະສາດເຂດປາຊີຝິກ (TPP) ໂດຍໄວ.
ກ່ອນໜ້ານັ້ນ, ທ່ານຮອງນາຍົກລັດຖະມົນຕີ Vu Van Ninh ໄດ້ໃຫ້ການຕ້ອນຮັບຜູ້ຕາງໜ້າດ້ານການຄ້າອາເມລິກາ ທ່ານ Ronald Kirk. ທີ່ການຕ້ແນຮັບ, ທ່ານຮອງນາຍົດລັດຖະມົນຕີ Vu Van Ninh ໄດ້ເນັ້ນໜັກວ່າ ຫວຽດນາມ ໄດ້ຖືເປັນສຳຄັນການເຂົ້າຮ່ວມສັນຍາ TPP, ນີ້ແມ່ນສິ່ງທ້າທາຍ ທັງແມ່ນກາລະໂອກາດເພື່ອໃຫ້ຫວຽດນາມ ພັດທະນາການພົວພັນການຄ້າໃນຕະຫຼາດສາກົນ, ຊ່ວຍໃຫ້ຫວຽດນາມ ກຳແໜ້ນ ແລະ ໝູນໃຊ້ບັນດາກາລະໂອກາດສະແຫວງຫາການຮ່ວມມືສາກົນ ເພື່ອຮັບໃຊ້ຍຸດທະສາດພັດທະນາເສດຖະກິດ, ສັງຄົມ ແລະ ເຊື່ອມໂຍງເຂົ້າກັບສາກົນ.