ທ່ານເລຂາທິການໃຫຍ່ ຫງວຽນຝູຈ້ອງ, ທ່ານນາງປະທານສະພາແຫ່ງຊາດ ຫງວຽນທິກິມເງິນ, ທ່ານນາງດັ້ງທິງອັກທິ້ງ ຜູ້ຮັກສາການປະທານປະເທດ ພ້ອມດ້ວຍບັນດາການນຳ, ອະດີດການນຳພັກ, ລັດ, ລັດຖະບານ, ສະພາແຫ່ງຊາດສະໄໝຕ່າງໆ ແລະ ຜູ້ຕາງໜ້າບັນດາຄະນະຜູ້ແທນສາກົນເຂົ້າຮ່ວມພິທີ.

ພິທີເຄື່ອນຍ້າຍສົບປະທານປະເທດ ເຈິ່ນດ້າຍກວາງ ຈັດຂຶ້ນຢ່າງສົມກຽດ

       ອ່ານບົດສະດຸດີທີ່ພິທີ, ທ່ານເລຂາທິການໃຫຍ່ ຫງວຽນຝູຈ້ອງ, ຫົວໜ້າຄະນະຈັດຕັ້ງພິທີຢັ້ງຢືນວ່າ: ທ່ານ ເຈິ່ນດ້າຍກວາງ ກຳມະການກົມການເມືອງຄະນະບໍລິຫານງານສູນກາງພັກກອມມູນິດ ຫວຽດນາມ, ປະທານປະເທດແຫ່ງ ສສ. ຫວຽດນາມ ແມ່ນຜູ້ນຳໄດ້ອຸທິດສ່ວນຫລາຍຢ່າງໃຫ້ແກ່ພາລະກິດປະຕິວັດອັນສະຫງ່າລາສີຂອງພັກ ແລະ ຂອງຊາດ, ເພື່ອຄວາມຜາສຸກຂອງປະຊາຊົນ. ທ່ານປະທານປະເທດ ເຈິ່ນດ້າຍກວາງ ເຖິງແກ່ມໍລະນະກຳແມ່ນຄວາມສູນເສຍຢ່າງໃຫຍ່ຫລວງຕໍ່ພັກ, ລັດ, ປະຊາຊົນ, ຄອບຄົວ ແລະ ຍາດຕິພີ່ນ້ອງປະທານປະເທດ ເຈິ່ນດ້າຍກວາງ. (ເທບ)

       “ດ້ວຍຖານະຕຳແໜ່ງເປັນກຳມະການກົມການເມືອງ, ປະທານປະເທດແຫ່ງ ສສ.ຫວຽດນາມ, ທ່ານປະທານປະເທດ ເຈິ່ນດ້າຍກວາງ ພ້ອມກັບໝູ່ຄະນະກົມການເມືອງໄດ້ສຸມໃສ່ຊີ້ນຳນຳພາທົ່ວພັກ, ທົ່ວປະຊາຊົນ, ທົ່ວກອງທັບ ປະຕິບັດມະຕິກອງປະຊຸມໃຫຍ່ທົ່ວປະເທດຄັ້ງທີ 12 ຂອງພັກ, ບັນດາມະຕິຂອງຄະນະບໍລິຫານງານສູນກາງພັກ, ຂອງສະພາແຫ່ງຊາດຢ່າງມີປະສິດທິຜົນ. ຜ່ານນັ້ນ ໄດ້ປະກອບສ່ວນຢ່າງຕັ້ງໜ້າຍູ້ແຮງກິດຈະການປ່ຽນແປງໃໝ່, ພັດທະນາເສດຖະກິດ, ເປີດກ້ວາງການພົວພັນຕ່າງປະເທດ ແລະ ເຊື່ອມໂຍງເຂົ້າກັບສາກົນ, ເພີ່ມທະວີກຳລັງຄວາມສາມາດດ້ານປ້ອງກັນຊາດ ແລະ ປ້ອງກັນຄວາມສະຫງົບ, ປົກປັກຮັກສາລະບົບການເມືອງສັງຄົມເປັນປົກກະຕິ, ຍົກສູງບົດບາດ, ທີ່ຕັ້ງ, ອິດທິພົນຊື່ສຽງຂອງ ຫວຽດນາມ ໃນເວທີສາກົນ.”

        ທ່ານເລຂາທິການໃຫຍ່ ຫງວຽນຝູຈ້ອງ ຢືນຢັນວ່າ: ທ່ານປະທານປະເທດ ເຈິ່ນດ້າຍກວາງ ແມ່ນໜຶ່ງໃນບັນດາການນຳຫຼັກແຫຼ່ງຂອງພັກ ແລະ ລັດ ຫວຽດນາມ.

ລວມອາຍຸ 63 ປີ, ໃນນັ້ນອາຍຸພັກແມ່ນ 38 ປີ, ທ່ານປະທານປະເທດ ເຈິ່ນດ້າຍກວາງ ໄດ້ອຸທິດສ່ວນຕະຫຼອດຊີວິດໃຫ້ແກ່ພາລະກິດແຫ່ງການປະຕິວັດທີ່ສະຫງ່າລາສີຂອງພັກ, ຂອງຊາດ ແລະ ຄວາມຜາສຸກຂອງປະຊາຊົນ. ພັກ, ລັດ ໄດ້ຮັບຮູ້, ມອບຫຼຽນກາ, ຫຼຽນໄຊອັນສູງສົ່ງຫຼາຍຫຼຽນ ແລະ ກາໝາຍອາຍຸພັກ 30 ປີ ໃຫ້ແກ່ທ່ານປະທານປະເທດເຈິ່ນດ້າຍກວາງ.

        ໃນຕອນເຊົ້າວັນທີ 27 ກັນຍາ, ພິທີໄວ້ອາໄລເຄົາລົບສົບຂອງທ່ານປະທານປະເທດ ເຈິ່ນດ້າຍກວາງ ກໍ່ໄດ້ຈັດຕັ້ງຢູ່ຫໍປະຊຸມ ທົ໋ງເຍິດ ນະຄອນໂຮ່ຈີມິນ ເຊັ່ນດຽວກັນ.

        ແລະ ກໍ່ໃນຕອນບ່າຍວັນດຽວກັນ, ພິທີປົງສົບທ່ານປະທານປະເທດ ເຈິ່ນດ້າຍກວາງ ໄດ້ຮັບການຈັດຕັ້ງຢູ່ບ້ານເກີດເມືອງນອນ ຕາແສງ ກວາງທ້ຽນ, ເມືອງ ກິມເຊີນ, ແຂວງ ນີງບີ່ງ. ເຂົ້າຮ່ວມພິທີປົງສົບທ່ານປະທານປະເທດ ເຈິ່ນດ້າຍກວາງ ມີທ່ານນາງປະທານສະພາແຫ່ງຊາດ ຫງວຽນທິກິມເງິນ, ທ່ານນາງຮັກສາການປະທານປະເທດ ດັ້ງທິງອັກທິ້ງ ພ້ອມດ້ວຍບັນດາການນຳ, ອະດີດການນຳພັກ, ລັດ ແລະ ປະຊາຊົນທຸກຊັ້ນວັນນະເປັນຈຳນວນຫລວງຫລາຍ.