ທ່ານ ລັດຖະມົນຕີ ຟາມຫວູລ້ວນ
|
(vovworld)- ທີ່ວາລະຊັກຖາມໃນຕອນເຊົ້າວັນທີ 11/6, ທ່ານ ຟ້າມຫວູລ້ວນ, ລັດຖະມົນຕີກະຊວງສຶກສາ ແລະ ບຳລຸງສ້າງຫວຽດນາມ ຕອບຄຳຊັກຖາມກ່ຽວກັບຄຸນນະພາບການສຶກສາບຳລຸງສ້າງ, ການຜັນຂະຫຍາຍປະຕິບັດການປະຕິຮູບດ້ານການສຶກສາ, ປ່ຽນໃຫມ່ການສອບເສັງ.
ກ່ຽວກັບສາຍເຫດ ເຮັດໃຫ້ນັກສຶກສາພາຍຫລັງຮຽນຈົບມະຫາວິທະຍາໄລ ແຕ່ບໍ່ມີວຽກເຮັດງານທຳ, ທ່ານ ລັດຖະມົນຕີ ຟາມຫວູລ້ວນ ຖືວ່າ: ການບຳລຸງສ້າງແມ່ນອີງຕາມຄວາມສາມາດຂອງບັນດາມະຫາວິທະຍາໄລ ຫາກບໍ່ທັນເອົາໃຈໃສ່ເຖິງຄວາມຕ້ອງການຂອງທ້ອງຖິ່ນ. ຫລັກສູດການສິດສອນ ບໍ່ທັດທຽມກັບການພັດທະນາຂອງໂລກ, ບໍ່ທັນເອົາໃຈໃສ່ເປັນພິເສດເຖິງຄວາມສາມາດເຮັດວຽກຕາມຫນ່ວຍ, ພາສາຕ່າງປະເທດ. ເພື່ອແກ້ໄຂສະພາບການດັ່ງກ່າວ, ກະຊວງສຶກສາ ແລະ ບຳລຸງສ້າງ ໄດ້ຈຳກັດສ້າງຕັ້ງບັນດາມະຫາວິທະຍາໄລ, ວິທະຍາໄລ, ປັບປຸງຂັ້ນຕອນອອກຫນັງສືອະນຸຍາດໃຫ້ສ້າງຕັ້ງ, ກ່າວເຕືອນກ່ຽວກັບຂະແຫນງອາຊີບ, ຂົງເຂດບຳລຸງສ້າງທີ່ມີຂອບຂະຫນາດໃຫຍ່. ທ່ານ ຫວູລ້ວນກ່າວວ່າ:
“ແຕ່ລະປີ ມີນັກສຶກສາ ຮຽນຈົບມະຫາວິທະຍາໄລ ແລະ ວິທະຍາໄລ ປະມານ 400.000 ຄົນ, ໃນໄລຍະ 5 ປີ ແມ່ນ 2 ລ້ານຄົນ. ບັນຫາວຽກເຮັດງານທຳຂອງນັກສຶກສາ ແມ່ນບັນຫາຂອງຕະຫລາດແຮງງານ. ກະຊວງສຶກສາ ແລະ ບຳລຸງສ້າງ ມີຄວາມຮັບຜິດຊອບໃນການບຳລຸງສ້າງເພື່ອຍົກສູງຄຸນນະພາບ ແລະ ກ່າວເຕືອນໃຫ້ສັງຄົມຮູ້ຈັກວ່າ ຂະແຫນງໃດພວມເຫລືອເກີນຄົນງານ ແລະ ຂະແຫນງໃດຂາດຄົນງານ.”