(vovworld) - ວັນທີ 23/2, ຢູ່ຮ່າໂນ້ຍ, ທ່ານລັດຖະມົນຕີກະຊວງການເງິນຫວຽດນາມ ເວືອງດິ່ງເຫ້ວ ໄດ້ມີການເຮັດວຽກກັບຜູ້ຕາງໜ້າເກືອບ 30 ວິສະຫະກິດອາເມລິກາ ທີ່ພວມເຄື່ອນໄຫວຢູ່ສິງກະໂປ ມາຢ້ຽມຢາມ ແລະ ຊອກຫາກາລະໂອກາດລົງທຶນຢູ່ຫວຽດນາມ. ທ່ານລັດຖະມົນຕີ ເວືອງດິ່ງເຫ້ວ ຢືນຢັນວ່າ: ອາເມລິກາ ຍາມໃດກໍແມ່ນຄູ່ຮ່ວມມືສຳຄັນຂອງຫວຽດນາມ ດ້ວຍວົງເງິນການຄ້າເພີ່ມຂຶ້ນຢ່າງຕໍ່ເນື່ອງໃນຊຸມປີຜ່ານມາ. ດັ່ງນັ້ນ, ລັດຖະບານຫວຽດນາມ ກໍຄືກະຊວງການເງິນຫວຽດນາມ ຍາມໃດກໍສ້າງເງື່ອນໄຂອຳນວຍຄວາມສະດວກໃຫ້ແກ່ບັນດາວິສາຫະກິດ ອາເມລິກາ ມາລົງທຶນຢູ່ຫວຽດນາມ. ກ່ຽວກັບການກຳນົດທິດພັດທະນາເສດຖະກິດ - ສັງຄົມຂອງຫວຽດນາມ ໃນໄລຍະຈະມາເຖິງ, ທ່ານລັດຖະມົນຕີເນັ້ນໜັກວ່າຫວຽດນາມ ຈະສືບຕໍ່ຢືດໝັ້ນນະໂຍບາຍຮັກສາເສດຖະກິດມະຫາພາກໃຫ້ເປັນປົກກະຕິ, ຄວບຄຸມໄພເງິນເຟີ້, ຮັກສາລະດັບເຕີບໂຕໃຫ້ເໝາະສົມ, ບໍລິຫານນະໂຍບາຍການເງິນ - ເງິນຕາບົນຈິດໃຈແໜ້ນແຟ້ນ, ມີໄຫວພິບ, ມີປະສິດທິຜົນ. ໃນນັ້ນ, ບັນດາມາດຕະການດ້ານການເງິນຈະໄດ້ຮັບການຜັນຂະຫຍາຍຄື: ປະຕິຮູບລະບຽບການບໍລິຫານ ພິເສດແມ່ນໃນຂົງເຂດພາສີອາກອນ, ພາສີ, ສຸມແຫຼ່ງທຶນເຂົ້າໃນການພັດທະນາໂຄງປະກອບ, ພື້ນຖານໂຄງລ່າງຄືຄົມມະນາຄົມ, ທ່າກຳປັ່ນທະເລ, ໄຟຟ້າ, ເຮັດໃຫ້ນະໂຍບາຍການເງິນ, ພາສີອາກອນເປັນກະຈ່າງແຈ້ງ, ໂປ່ງໃສ, ເຄົາລົບບັນດາຄຳໝັ້ນສັນຍາໃຫ້ບຸລິມະສິດກ່ຽວກັບພາສີອາກອນ, ການເງິນສຳລັບບັນດານັກລົງທຶນ, ໜູນຊ່ວຍວຽກງານສົ່ງເສີມການລົງທຶນ, ສົ່ງເສີມການຄ້າ, ໂຄສະນາພາດພົດ ແລະ ສະພາບແວດລ້ອມແຫ່ງການລົງທຶນຢູ່ຫວຽດນາມ. ທ່ານລັດຖະມົນຕີ ເວືອງດິ່ງເຫ້ວ ເນັ້ນໜັກວ່າ: ໃນໄລຍະຈະມາເຖິງ, ລັດຖະບານຫວຽດນາມຈະຍືນສະເໜີຕໍ່ສະພາແຫ່ງຊາດ ອະນຸມັດຜ່ານການປັບປຸງ, ເພີ່ມເຕີມກົດໝາຍຈຳນວນໜຶ່ງ ເພື່ອມີການປະຕິຮູບນະໂຍບາຍຢ່າງແຂງແຮງກ່ວາ, ສ້າງເງື່ອນໄຂທີ່ດີສຸດໃຫ້ບັນດາວິສາຫະກິດ.
ທ່ານເອກອັກຄະລັດຖະທູດອາເມລີກາ ປະຈຳສິງກາໂປ, ຫົວໜ້າຄະນະວິສາຫະກິດ, ທ່ານ David Adelman ຢືນຢັນວ່າ: ການມີໜ້າຂອງບັນດາວິສາຫະກິດທີ່ການພົບປະຄັ້ງນີ້ແມ່ນການສະແດງໃຫ້ເຫັນຄວາມເອົາໃຈໃສ່ຂອງວິສາຫະກິດ ອາເມລິກາ ຕໍ່ຕະຫຼາດຫວຽດນາມ. ໂດຍອີງໃສ່ສາຍພົວພັນຮ່ວມມືພັດທະນາອັນດີງາມລະຫວ່າງ 2 ປະເທດ, ທ່ານເອກອັກຄະລັດຖະທູດຫວັງວ່າ ກະຊວງການເງິນຫວຽດນາມຈະສືບຕໍ່ສ້າງເງື່ອນໄຂອຳນວຍຄວາມສະດວກໃຫ້ແກ່ບັນດາວິສາຫະກິດຕ່າງປະເທດຫຼາຍກ່ວາອີກ, ໃນນັ້ນມີອາເມລິກາ ເຂົ້າມາລົງທຶນຢູ່ຫວຽດນາມ.