(vovworld) - ວັນທີ 13/03, ໃນຂອບເຂດການຢ້ຽມຢາມ ສປປ ລາວ ຕາມຄຳເຊີນຂອງທ່ານນາຍົກລັດຖະມົນຕີ ທອງສິງ ທຳມະວົງ, ຢູ່ແຂວງ ຊຽງຂວາງ, ທ່ານນາຍົກລັດຖະມົນຕີຫວຽດນາມ ຫງວຽນເຕີນຢຸງ ພ້ອມກັບທ່ານນາຍົກລັດຖະມົນຕີ ທອງສິງ ທຳມະວົງ ໄດ້ເປັນປະທານຮ່ວມກອງປະຊຸມສົ່ງເສີມການລົງທຶນເຂົ້າບັນດາແຂວງພາກເໜືອຂອງລາວ. ທີ່ກອງປະຊຸມ,ທ່ານນາຍົກລັດຖະມົນຕີຫວຽດນາມ ຫງວຽນເຕີ້ນຢຸ້ງ ຢືນຢັນວ່າ :
“ ໃນໄລຍະທີ່ຜ່ານມາ, ໂດຍມີຄວາມເອົາໃຈໃສ່, ສົ່ງເສີມຂອງ 2 ລັດຖະບານ ແລະ ຄວາມເປັນເຈົ້າການຂອງວິສາຫະກິດ, ການລົງທຶນຂອງວິສາຫະກິດຫວຽດນາມຢູ່ລາວ ໄດ້ບັນລຸປະມານ 4,5 ຕື້ USD , ກວມເອົາອັດຕາສ່ວນສູງສຸດໃນຍອດຈຳນວນເງິນລົງທຶນອອກສູ່ຕ່າງປະເທດຂອງຫວຽດນາມ. ເຖິງຢ່າງນັ້ນ ກໍຕາມ, ພວກຂ້າພະເຈົ້າເຫັນວ່າ ຍັງບໍ່ທັນແທດເໝາະກັບຄວາມສາມາດບົມຊ້ອນ ແລະ ຄວາມຫວັງຂອງທັງ 2 ຝ່າຍ. ເພາະສະນັ້ນ, ຈຳເປັນທີ່ສຸດທີ່ຕ້ອງຍູ້ແຮງກ່ວາອີກໃນໄລຍະທີ່ຈະມາເຖິງ ເພື່ອນຳມາເຊິ່ງຜົນປະໂຫຍດຢ່າງແທດຈິງໃຫ້ທັງ 2 ຝ່າຍ, ເພື່ອການພັດທະນາແບບຍືນຍົງຂອງທັງ 2 ປະເທດ ”
ນາຍົກລັດຖະມົນຕີ 2 ທ່ານ ໄດ້ເຫັນດີນຳກັນໂດຍຖືວ່າ ຄວນສືບຕໍ່ສ້າງຍຸດທະສາດການຮ່ວມມືດ້ານເສດຖະກິດຫວຽດນາມ - ລາວ ໄລຍະ 10 ປີ, ໃນນັ້ນ ສືບຕໍ່ກຳນົດລະດັບ, ຂົງເຂດໃຫ້ບຸລິມະສິດ ແລະ ໂຄງການຢ່າງລະອຽດ. ການຮ່ວມມືດ້ານເສດຖະກິດໃຫ້ສົມກັບການພົວພັນດ້ານການເມືອງ, ການຕ່າງປະເທດ ແລະ ສາຍພົວພັນແບບພິເສດລະຫວ່າງຫວຽດນາມ - ລາວ. ຕາມນາຍົກລັດຖະມົນຕີ 2 ທ່ານແລ້ວ, ການໃຫ້ບຸລິມະສິດແກ່ການລົງທຶນເຂົ້າພາກເໜືອຂອງລາວ ແມ່ນຈຳເປັນທີ່ສຸດ ໃນນັ້ນຄວນໃຫ້ບຸລິມະສິດແກ່ການລົງທຶນຢູ່ແຂວງ ຊຽງຂວາງ ແລະ ຫົວພັນ. ທ່ານນາຍົກລັດຖະມົນຕີ ຫງວຽນເຕີນຢຸງ ໄດ້ເຫັນດີເປັນດອກະພາບກັບຂໍ້ສະເໜີເປີດເສັ້ນທາງຄົມມະນາຄົມເຊື່ອມຕໍ່ແຂວງຊຽງຂວາງ (ລາວ) ກັບແຂວງແທງຮ໋ວາ (ຫວຽດນາມ).
ທ່ານນາຍົກລັດຖະມົນຕີຫວຽດນາມ ຫງວຽນເຕີ້ນຢຸ້ງ ຍັງເປັນສັກຂີພິຍານພິທີມອບໜັງສືອະນຸຍາດລົງທຶນຂອງລັດຖະບານລາວໃຫ້ແກ່ບັນດາໂຄງການລົງທຶນຂອງວິສາຫະກິດຫວຽດນາມຢູ່ຊຽງຂວາງ; ໃຫ້ການຕ້ອນຮັບການນຳບໍລິສັດໃຫຍ່ຮ່ວມມືຫວຽດ-ລາວ ແລະ ຕ້ອນຮັບຊາວຫວຽດນາມອາໄສຢູ່ແຂວງຊຽງຂວາງ.