ສະພາແຫ່ງຊາດສືບຕໍ່ປຶກສາຫາລືກົດໝາຍວ່າດ້ວຍດຳເນີນທຸລະກິດ ອະສັງຫະລິມະຊັບ
(ພາບປະກອບ)
(vovworld) – ໃນວາລະປຶກສາຫາລືຢູ່ໜ່ວຍຕອນເຊົ້າວັນທີ 27/05, ບັນດາສະມາຊິກສະພາແຫ່ງຊາດ (ສສຊ) ເຂົ້າຮ່ວມກອງປະຊຸມສະໄໝສາມັນເທື່ອທີ 7 ສະພາແຫ່ງຊາດຫວຽດນາມ ຊຸດທີ 13 ໄດ້ຕີລາຄາວ່າເລື່ອງຮ່າງກົດໝາຍວ່າດ້ວຍການດຳເນີນທຸລະກິດອະສັງຫະລິມະຊັບ (ສະບັບປັບປຸງ) ໄດ້ເປີກວ້າງຂອບເຂດເຄື່ອນໄຫວດຳເນີນທຸລະກິດອະສັງຫະລິມະຊັບໃຫ້ແກ່ບັນດາອົງການຈັດຕັ້ງ, ສ່ວນບຸກຄົນຊາວຕ່າງປະເທດ, ຊາວຫວຽດນາມ ອາໄສຢູ່ຕ່າງປະເທດ ແມ່ນເໝາະສົມກັບແຜນນະໂຍບາຍ ແລະ ນະໂຍບາຍຂອງລັດໃນໄລຍະປະຈຸບັນ.
ແຕ່ວ່າ, ການກຳນົດກ່ຽວກັບເລື່ອງອົງການຈັດຕັ້ງ, ສ່ວນບຸກຄົນຊາວຕ່າງປະເທດໄດ້ຮັບການມອບໂອນສິດນຳໃຊ້ທີ່ດິນ, ເຊົ່າທີ່ດິນໃນບັນດາໂຄງການອະສັງຫະລິມະຊັບຂອງບັນດາເຈົ້າຂອງລົງທຶນ ເພື່ອກໍ່ສ້າງເຮືອນ, ກິດຈະກຳກໍ່ສ້າງເພື່ອຂາຍ, ໃຫ້ເຊົ່າ, ໃຫ້ຊື້ນັ້ນ, ສສຊ ຫຼາຍທ່ານຖືວ່າ ຂໍ້ກຳນົດດັ່ງກ່າວບໍ່ທັນເໝາະສົມກັບກົດໝາຍວ່າດ້ວຍທີ່ດິນ ປີ 2013. ທ່ານ ຫງວຽນມິງກວາງ, ສສຊ ນະຄອນຮ່າໂນ້ຍ ສະເໜີວ່າ.
“ເລື່ອງເປີດກວ້າງຂອບເຂດເຂົ້າຮ່ວມຂອງນັກລົງທຶນຕ່າງປະເທດແມ່ນຈຳເປັນ ເພື່ອແນໃສ່ຈຸດໝາຍດຶງດູດແຫຼ່ງທຶນເຂົ້າຕະຫຼາດອະສັງຫະລິມະຊັບພາຍໃນປະເທດ ແຕ່ຄະນະຮຽບຮຽງຄວນຄົ້ນຄວ້າເພື່ອມີກົນໄກຄວບຄຸມກຳລັງຄວາມສາມາດຂອງບັນດານັກລົງທຶນຕ່າງປະເທດ, ຕົວຢ່າງຄື ຕ້ອງມອບໃຫ້ອົງການຄຸ້ມຄອງ ຫຼື ມອບໃຫ້ບໍລິສັດເອກະລາດແມ່ນຜູ້ກວດກາ, ຕິດຕາມກວດກາຄວາມຄືບໜ້າຂອງບັນດານັກລົງທຶນຕ່າງປະເທດ”.
ປຶກສາຫາລືກ່ຽວກັບຮ່າງກົດໝາຍວ່າດ້ວຍເຮືອນຢູ່ (ສະບັບປັບປຸງ), ບັນດາ ສສຊ ໄດ້ຕີລາຄາເລື່ອງຮ່າງກົດໝາຍເປີດກວ້າງເປົ້າໝາຍ ແລະ ເງື່ອນໄຂຊາວຫວຽດນາມ ອາໄສຢູ່ຕ່າງປະເທດ, ອົງການຈັດຕັ້ງ, ສ່ວນບຸກຄົນຕ່າງປະເທດ ໄດ້ຊື້ ແລະ ກຳມະສິດເຮືອນຢູ່ ຢູ່ຫວຽດນາມ ແມ່ນເໝາະສົມ. ແຕ່ວ່າ ຕ້ອງເຮັດແຈ້ງບັນດາຜົນກະທົບຂອງຂໍ້ກຳນົດດັ່ງກ່າວສຳລັບສິດມີບ່ອນຢູ່ຂອງປະຊາຊົນ, ຄວາມເປັນລະບຽບຮຽບຮ້ອຍທາງສັງຄົມ ແລະ ການພັດທະນາຢ່າງໝັ້ນຄົງຂອງຕະຫຼາດອະສັງຫະລິມະຊັບພາຍໃນປະເທດ.