(vovworld) – ຕາມລາຍການເຮັດວຽກຂອງກອງປະຊຸມສະໄໝສາມັນເທື່ອທີ 6, ສະພາແຫ່ງຊາດ ຫວຽດນາມ ຊຸດທີ 13, ຕອນເຊົ້າວັນທີ 13/11, ສະພາແຫ່ງຊາດເຮັດວຽກຢູ່ຫໍປະຊຸມ ສືບຕໍ່ປຶກສາຫາລືວຽກງານບຸກຄະລາກອນ ແລະ ຮັບຟັງໃບສະເໜີ, ບົດລາຍງານກວດກາຮ່າງກົດໝາຍວ່າດ້ວຍການລົ້ມລະລາຍ (ສະບັບປັບປຸງ). ຕອນບ່າຍວັນດຽວກັນ, ສະພາແຫ່ງຊາດປຶກສາຫາລືຢູ່ຫໍປະຊຸມກ່ຽວກັບການວາງແຜນສັງລວມກ່ຽວກັບເຂື່ອນໄຟຟ້ານ້ຳຕົກ ແລະ ການປັບປຸງ, ເພີ່ມເຕີມບາງມາດຕາມະຕິຂອງສະພາແຫ່ງຊາດກ່ຽວກັບແຜນນະໂຍບາຍລົງທຶນກໍ່ສ້າງເສັ້ນທາງໂຮ່ຈີມິນ.
ທ່ານ ຫວູດຶກດາມ ແລະ ທ່ານ ຟ້າມບິ່ງມິງ
(ພາບປະກອບຈາກ TTXVN)
ລັດຖະບານຫວຽດນາມມີຮອງນາຍົກລັດຖະມົນຕີໃຫມ່ສອງທ່ານ
ດ້ວຍໝາກຜົນປ່ອນບັດຢູ່ໃນອັດຕາສະຫນັບສະຫນູນສູງ, ທ່ານ ຫວູດືກດາມ, ລັດຖະມົນຕີ, ຫົວຫນ້າຫ້ອງວ່າການລັດຖະບານ ໄດ້ຮັບຈຳນວນບັດສະຫນັບສະຫນູນ ກວ່າ 84% ຈາກ ສສຊ ແລະ ທ່ານລັດຖະມົນຕີການຕ່າງປະເທດຫວຽດນາມ ຟ້າມບີງມີງ ແມ່ນ 85% ຈາກ ສສຊ. ໝາກຜົນດັ່ງກ່າວກໍໝາຍຄວາມວ່າ ລັດຖະບານຫວຽດນາມ ມີຮອງນາຍົກລັດຖະມົນຕີ 5 ທ່ານ, ແທນທີ່ 4 ທ່ານຄືກ່ອນນີ້. ກ່າວຄຳເຫັນພາຍຫລັງປະກາດໝາກຜົນປ່ອນບັດ, ທ່ານປະທານສະພາແຫ່ງຊາດຫວຽດນາມ ຫງວຽນຊີງຮຸ່ງ ຊີ້ແຈ້ງວ່າ:
“ສະພາແຫ່ງຊາດໄດ້ຕົກລົງບຸກຄະລາກອນ ດ້ວຍອັດຕາບັດສະຫນັບສະຫນູນ ສູງ ສຳລັບ ຮອງລັດຖະມົນຕີສອງທ່ານ ນັ້ນແມ່ນ ທ່ານ ຫວູດືກດາມ ແລະ ທ່ານ ຟ້າມບີງມີງ. ພວກຂ້າພະເຈົ້າມີຄວາມເຊື່ອໝັ້ນວ່າ ສອງສະຫາຍຈະສືບຕໍ່ມານະພະຍາຍາມສຳເລັດຫນ້າທີ່ຂອງຕົນຢ່າງດີເດັ່ນ, ສົມກັບຄວາ
ມໄວ້ເນື້ອເຊື່ອໃຈສູງຈາກ ສສຊ.”
ທ່ານຮອງນາຍົກລັດຖະມົນຕີ ຫວູດືກດາມ ຈະຊ່ວຍນາຍົກລັດຖະມົນຕີ ຕິດຕາມການຊີ້ນຳຂົງເຂດວັດທະນະທຳ, ສັງຄົມ, ວິທະຍາສາດ, ສຶກສາ ແລະ ບຳລຸງສ້າງ. ທ່ານຟ້າມບີງມີງ, ຮອງນາຍົກລັດຖະມົນຕີ, ທັງເປັນລັດຖະມົນຕີການຕ່າງປະເທດ ຈະຮັບຜິດຊອບຂົງເຂດການຕ່າງປະເທດ.