ທ່ານເລຂາທິການໃຫຍ່ຫງວຽນຟູຈ້ອງເຈລະຈາກັບ
ທ່ານນາຍົກລັດຖະມົນຕີ ຍີ່ປຸ່ນ Shinzo Abe
|
(vovworld)- ພາຍຫລັງການເຈລະຈາດຳເນີນໃນວັນທີ 15/9, ຢູ່ ໂຕກຽວ, ທ່ານເລຂາທິການໃຫຍ່ ຄະນະບໍລິຫານງານສູນກາງພັກກອມມູນິດຫວຽດນາມ ຫງວຽນຟູຈ້ອງ ແລະ ນາຍົກລັດຖະມົນຕີ ຍີ່ປຸ່ນ Shinzo Abe ໄດ້ອອກຖະແຫລງການກ່ຽວກັບວິໄສທັດລວມ ການພົວພັນລະຫວ່າງຫວຽດນາມ ແລະ ຍີ່ປຸ່ນ ເພື່ອສັນຕິພາບ ແລະ ວັດທະນາຖາວອນ ຢູ່ ອາຊີ. ສອງຝ່າຍ ໄດ້ຕີລາຄາສູງການພັດທະນາຢ່າງແຮງ, ຮອບດ້ານ ແລະ ແທດຈິງ ຂອງການພົວພັນລະຫວ່າງ ຫວຽດນາມ ແລະ ຍີ່ປຸ່ນ ໃນໄລຍະຜ່ານມາ ເປັນຕົ້ນແມ່ນພາຍຫລັງທີ່ ການພົວພັນລະຫວ່າງສອງປະເທດ ໄດ້ຍົກຂຶ້ນສູ່ລະດັບຄູ່ຮ່ວມມືຍຸດທະສາດ ເພື່ອສັນຕິພາບ ແລະ ວັດທະນາຖາວອນ ຢູ່ ອາຊີ ເມື່ອປີ 2009 ແລະ ຄູ່ຮ່ວມມືຍຸດທະສາດຢ່າງເລິກເຊິ່ງກວ້າງຂວາງ ເພື່ອສັນຕິພາບ ແລະ ວັດທະນາຖາວອນ ຢູ່ ອາຊີ ເມື່ອປີ 2014. ສອງຝ່າຍ ຢືນຢັນ ຕັດສິນໃຈພັດທະນາການພົວພັນລະຫວ່າງ ຫວຽດນາມ ແລະ ຍີ່ປຸ່ນ ຢ່າງຮອບດ້ານ ແລະ ເລິກເຊິ່ງໃນທຸກຂົງເຂດ. ການນຳສອງທ່ານ ໄດ້ແບ່ງປັນຄວາມປາດຖະຫນາຢາກຮັກສາການຢ້ຽມຢາມ ແລະ ພົບປະຄັ້ງຕ່າງໆລະຫວ່າງ ການນຳຂັ້ນສູງ, ຊຸກຍູ້ການພົບປະແລກປ່ຽນລະຫວ່າງສະພາແຫ່ງຊາດ, ພັກການເມືອງ ເພື່ອປັບປຸງ ແລະ ເພີ່ມທະວີຄວາມໄວ້ເນື້ອເຊື່ອໃຈກ່ຽວກັບດ້ານການເມືອງລະຫວ່າງສອງປະເທດ. ສອງຝ່າຍເຫັນດີສືບຕໍ່ສົມທົບກັນຢ່າງແຫນ້ນແຟ້ນ ເພື່ອເພີ່ມທະວີ ແລະ ເຮັດໃຫ້ບັນດາກົນໄກຮ່ວມມື ການເຈລະຈາທີ່ມີຢູ່ແລ້ວໃນປະຈຸບັນ. ກ່ຽວກັບການເຊື່ອມຕໍ່ຍຸດທະສາດພັດທະນາເສດຖະກິດ, ສອງຝ່າຍ ແບ່ງປັນຄວາມປາດຖະຫນາຢາກເພີ່ມທະວີການຮ່ວມມືໃນວິວັດການວາງແຜນກຳນົດຍຸດທະສາດພັດທະນາເສດຖະກິດແບບຍືນຍົງ. ກ່ຽວກັບການຮ່ວມມືໃນບັນດາບັນຫາພາກພື້ນ ແລະ ສາກົນ, ສອງຝ່າຍຢືນຢັນຄືນການຮ່ວມມືຢ່າງແຫນ້ນແຟ້ນໃນບັນດາອົງການ, ເວທີປາໄສພາກພື້ນ ແລະ ສາກົນ ຊື່ງສອງປະເທດລ້ວນແຕ່ແມ່ນປະເທດສະມາຊິກ. ສອງຝ່າຍສະແດງຄວາມວິຕົກກັງວົນຢ່າງເລິກເຊິ່ງກ່ຽວກັບບັນດາການຜັນແປຢ່າງສັບສົນຫວ່າງມໍ່ໆມານີ້ຢູ່ທະເລຕາເວັນອອກ. ສອງຝ່າຍເນັ້ນຫນັກເຖິງຄວາມສຳຄັນຂອງການຮັບປະກັນສັນຕິພາບ, ຄວາມໝັ້ນຄົງ, ຄວາມປອດໄພ ແລະ ການເດີນທະເລ ແລະ ການບິນ, ຊຸກຍູ້ບັນດາຝ່າຍກ່ຽວຂ້ອງບໍ່ໄດ້ມີການກະທຳຕາມລຳພັງຝ່າຍດຽວເຮັດໃຫ້ສະພາບການສັບສົນຂຶ້ນຕື່ມ ແລະ ເປີດກວ້າງການຂັດແຍ້ງຢູ່ທະເລຕາເວັນອອກ, ແກ້ໄຂທຸກການຂັດແຍ້ງໂດຍສັນຕິວິທີ ບົນພື້ນຖານເຄົາລົບກົດໝາຍສາກົນ.