(vovworld) – ນະໂຍບາຍຢ່າງສະເໝີຕົ້ນສະເໝີປາຍຂອງ ຫວຽດນາມ ແມ່ນຖືເປັນສຳຄັນການພັດທະນາການພົວພັນມິດຕະພາບ,ເພີ່ມທະວີການຮ່ວມມືຮອບດ້ານກັບຈີນ - ນັ້ນແມ່ນຄຳຢັ້ງຢືນຂອງທ່ານເອກອັກຄະລັດຖະທູດ ຫວຽດນາມ ປະຈຳ ຈີນ ຫງວຽນວັນເທີ ໃນການພົບປະກັບສື່ມວນຊົນເມື່ອວັນທີ 16/12 ຢູ່ນອກກອງປະຊຸມການທູດ ຄັ້ງທີ 28, ເຊິ່ງພວມດຳເນີນໄປຢູ່ ຮ່າໂນ້ຍ.
ຕາມທ່ານເອກອັກຄະລັດຖະທູດ ຫງວຽນວັນເທີ ແລ້ວ, ນັບແຕ່ຕົ້ນປີ 2013 ມາຮອດປະຈຸບັນ, ພິເສດແມ່ນພາຍຫຼັງການໂອ້ລົມທາງໂທລະສັບລະຫວ່າງທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດ ຫວຽດນາມ ຫງວຽນຟູ໋ຈ້ອງ ແລະ ທ່ານເລຂາທິການໃຫຍ່, ປະທານປະເທດ ຈີນ ສືຈີ້ນຜິງ, ການຢ້ຽມຢາມທາງລັດຖະກິດຂອງທ່ານປະທານປະເທດ ຫວຽດນາມ ເຈືອງເຕີນຊາງ ຢູ່ຈີນ, ການພົບປະລະຫວ່າງນາຍົກລັດຖະມົນຕີຫວຽດນາມ ຫງວຽນເຕີນຢູ້ງ ແລະ ນາຍົກລັດຖະມົນຕີ ຈີນ ຫຼີເຄີຊຽງ ຢູ່ ໜາມໜິງ ແລະ ຫວ່າງແລ້ວນີ້ແມ່ນການຢ້ຽມຢາມ ຫວຽດນາມ ຢ່າງເປັນທາງການຂອງນາຍົກລັດຖະມົນຕີ ຫຼີເຄີຊຽງ, ການພົວພັນລະຫວ່າງ 2 ປະເທດມີບາດກ້າວພັດທະນາໃໝ່. ທ່ານເອກອັກຄະລັດຖະທູດ ຫງວຽນວັນເທີ ຢັ້ງຢືນວ່າ:
“ນະໂຍບາຍສະເໝີຕົ້ນສະເໝີປາຍຂອງຫວຽດນາມແມ່ນຖືເປັນສຳຄັນການພັດທະນາການພົວພັນມິດຕະພາບ,ເພີ່ມທະວີການຮ່ວມມືຮອບດ້ານກັບຈີນ. ການພົວພັນກັບ ຈີນ ແມ່ນຜົນປະໂຫຍດຂອງປະຊາຊົນ ຫວຽດນາມ, ຊຸກຍູ້ການພົວພັນມິດຕະພາບ, ການຮ່ວມມືຮອບດ້ານກັບຈີນ ກໍ່ປະກອບສ່ວນເຂົ້າໃນສັນຕິພາບ, ສະຖຽນລະພາບໃນພາກພື້ນ ແລະ ໃນໂລກ. ບັນດາຄວາມຄືບໜ້າໃນການພົວພັນ ຫວຽດນາມ - ຈີນ ແມ່ນຄວາມປາດຖະໜາຂອງການນຳ ກໍ່ຄືປະຊາຊົນ ຫວຽດນາມ.”
ກ່ຽວກັບບັນຫາທະເລຕາເວັນອອກ, ທ່ານເອກອັກຄະລັດຖະທູດ ຫງວຽນວັນເທີ ໃຫ້ຮູ້ວ່າ, ຈະແກ້ໄຂບັນຫານີ້ເທື່ອລະກ້າວບົນພື້ນຖານການເຈລະຈາມິດຕະພາບ, ກົດໝາຍສາກົນ ແລະ ສົນທິສັນຍາ ສປຊ ກ່ຽວກັບທະເລປີ 1982.
ກ່ຽວກັບການແລກປ່ຽນການຄ້າລະຫວ່າງ ຫວຽດນາມ - ຈີນ, ທ່ານເອກອັກຄະລັດຖະທູດ ຫງວຽນວັນເທີ ກໍ່ໃຫ້ຮູ້ຈຸດໝາຍເຊິ່ງການນຳຂັ້ນສູງ 2 ປະເທດວາງອອກແມ່ນຮອດປີ 2015, ວົງເງິນການຄ້າ 2 ສົ້ນບັນລຸ 60 ຕື້ USD ແມ່ນສາມາດເປັນໄປໄດ້.