ທ່ານຮອງນາຍົກລັດຖະມົນຕີ ຟ້າມບິ່ງມິງ ປະທານ
ຄະນະກຳມາທິການ ຮ່ວມມືຫວຽດນາມ-ກຳປູເຈຍ
(ພາບ: VGP/PhanHoang)
(vovworld)- ກອງປະຊຸມຄັ້ງທີ 14 ຄະນະກຳມາທິການປະສົມຫວຽດນາມ-ກຳປູເຈຍ ກ່ຽວກັບການຮ່ວມມືດ້ານເສດຖະກິດ, ວັດທະນະທຳ, ວິທະຍາສາດ-ເຕັກນິກ ໄດ້ດຳເນີນໄປໃນຕອນເຊົ້າວັນທີ 19/10 ຢູ່ນະຄອນໂຮ່ຈີມິນ. ທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດ ຟ້າມບິ່ງມິງ ປະທານ ຄະນະກຳມາທິການ ຮ່ວມມືຫວຽດນາມ-ກຳປູເຈຍ ແລະ ຮອງນາຍຍົກລັດຖະມົນຕີ, ລັດຖະມົນຕີການຕ່າງປະເທດ ແລະ ຮ່ວມມືສາກົນກຳປູເຈຍ Hor Namhong, ປະທານຄະນະກຳມາທິການ ຮ່ວມມືກຳປູເຈຍ-ຫວຽດນາມ ເປັນປະທານຮ່ວມກອງປະຊຸມ. ສອງຝ່າຍໄດ້ແລກປ່ຽນ ແລະ ເປັນເອກະພາບຕໍ່ຂໍ້ຕົກລົງຮ່ວມມືກ່ຽວກັບວຽກງານ ປັກຫຼັກໝາຍຊາຍແດນທາງບົກ, ວຽກງານຄຸ້ມຄອງຊາຍແດນ. ທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດຫວຽດນາມ ຟ້າມບິ່ງມິງ ປະທານຄະນະກຳມາທິການ ຮ່ວມມືຫວຽດນາມ-ກຳປູເຈຍ ຖືວ່າ:
“ນີ້ແມ່ນກອງປະຊຸມປະຈຳປີຂອງຄະນະກຳມາທິການຊີ້ນຳການພົວພັນສອງຝ່າຍ ລະຫວ່າງຫວຽດນາມ-ກຳປູເຈຍ. ທີ່ກອງປະຊຸມຄັ້ງນີ້ ພວກເຮົາໄດ້ປຶກສາຫາລືບັນດາມາດຕະການຢ່າງລະອຽດ ເພື່ອເພີ່ມທະວີການພົວພັນລະຫວ່າງຫວຽດນາມ ແລະ ກຳປູເຈຍໃນທຸກດ້ານຄື: ແຕ່ດ້ານການເມືອງ, ເສດຖະກິດ ວັດທະນະທຳ, ວິທະຍາສາດ-ເຕັກນິກ ຕະຫຼອດຮອດການພົວພັນຮ່ວມມືໃນເວທີປາໄສຫຼາຍຝ່າຍ .”
ໃນຂະນະນັ້ນ, ຕອນເຊົ້າວັນທີ 19/10 ຢູ່ນະຄອນຫຼວງພະນົມເປັນ ປະເທດກຳປູເຈຍ ກໍ່ດຳເນີນການເຈລະຈາຍຸດທະສາດປ້ອງກັນຊາດ ຄັ້ງທີ 1 ລະຫວ່າງຫວຽດນາມ ແລະ ກຳປູເຈຍ. ຄະນະຜູ້ແທນກະຊວງປ້ອງກັນປະເທດຫວຽດນາມ ໂດຍທ່ານພົນໂທ ຫງວຽນຈີວິ້ງ, ລັດຖະມົນຕີຊ່ວຍວ່າການກະຊວງປ້ອງກັນປະເທດເປັນຫົວໜ້າຄະນະ. ຄະນະຜູ້ແທນກະຊວງປ້ອງກັນປະເທດກຳປູເຈຍ ໂດຍທ່ານພົນເອກ Neang phat ລັດຖະມົນຕີວ່າການກະຊວງປ້ອງກັນປະເທດ ນຳໜ້າ. ທີ່ການເຈລະຈາ ສອງຝ່າຍໄດ້ແລກປ່ຽນຢ່າງເລິກເຊິ່ງ ກວ້າງຂວາງກ່ຽວກັບສະພາບການໂລກ, ພາກພື້ນ ແລະ ສະພາບການຂອງແຕ່ລະປະເທດ, ພ້ອມກັນຍົກອອກບັນດາຂໍ້ສັງເກດ, ແບ່ງປັນບັນດາບັນຫາທີ່ກ່ຽວຂ້ອງ, ສົ່ງຜົນສະທ້ອນເຖິງວຽກງານປ້ອງກັນຊາດປ້ອງກັນຄວາມສະຫງົບຂອງສອງປະເທດ. ສອງຝ່າຍກໍ່ແລກປ່ຽນບັນດາມາດຕະການ ເພື່ອແນໃສ່ນຳການພົວພັນຮ່ວມມືດ້ານປ້ອງກັນຊາດສອງຝ່າຍໃຫ້ເຂົ້າສູ່ລວງເລິກ ມີປະສິດທິຜົນ ແລະ ແທດຈິງ.