(ພາບປະກອບ)
(vovworld) - ດ້ວຍຈຳນວນບັດສະໜັບສະໜູນ 182/187 ບັດ, ຫວຽດນາມ ໄດ້ກາຍເປັນສະມາຊິກຂອງສະພາເສດຖະກິດສັງຄົມສະຫະປະຊາຊາດ (ECOSOC) ເທື່ອທີ 2, ໃນອາຍຸການ 2016-2018 ແລະ ຫວຽດນາມ ຈະຮັບໜ້າທີ່ເປັນສະມາຊິກ ECOSOC ຢ່າງເປັນທາງກາງ ນັບແຕ່ວັນທີ 1/1/2016 ເປັນຕົ້ນໄປ.
ນີ້ແມ່ນເຫດການມີຄວາມໝາຍສຳຄັນ; ເຊິ່ງດຳເນີນກົງກັບເວລາທີ່ສະມັດຊາໃຫຍ່ສະຫະປະຊາຊາດ ຫາກໍ່ຮັບຮອງເອົາໂຄງການດຳເນີນງານພັດທະນາຢ່າງໝັ້ນຄົງເຖິງປີ 2030. ດັ່ງນັ້ນ, ເພື່ອນມິດສາກົນມີຄວາມຫວັງຫຼາຍຢ່າງເຖິງການປະກອບສ່ວນຂອງຫວຽດນາມ ພ້ອມກັບ 53 ປະເທດສະມາຊິກທີ່ຍັງເຫຼືອຂອງ ECOSOC ໃນການປະຕິບັດບັນດາຄາດໝາຍພັດທະນາແບບຍືນຍົງ. ທ່ານປະທານ ECOSOC, ເອກອັກຄະລັດຖະທູດ ສເກົາຫຼີ Oh Joon ໄດ້ອວຍພອນລັດຖະບານຫວຽດນາມ ແລະ ໃຫ້ຮູ້ວ່າ, ບັນດາສະມາຊິກ ECOSOC ປາຖະໜາຢາກຮ່ວມມືຢ່າງແໜ້ນແຟ້ນກັບຫວຽດນາມ ໃນການຜັນຂະຫຍາຍການປະຕິບັດບັນດາໜ້າທີ່ສຳຄັນຂອງ ECOSOC. ສ່ວນທ່ານນາງເອກອັກຄະລັດຖະທູດ ຫງວຽນເຟືອງງາ, ຫົວໜ້າຄະນະຫວຽດນາມ ປະຈຳສະຫະປະຊາຊາດ, ໃຫ້ຮູ້ວ່າ, ດ້ວຍນຳ້ໃຈຮ່ວມມື, ສ້າງສັນ, ຫວຽດນາມ ຈະຕັ້ງໜ້າເຂົ້າຮ່ວມການເຄື່ອນໄຫວຕ່າງໆຂອງ ECOSOC, ລະດົມການເຂົ້າຮ່ວມຂອງບັນດາກຳລັງ, ແຫຼ່ງກຳລັງໃນສັງຄົມ, ປ່ຽນໃໝ່ການເຄື່ອນໄຫວຂອງລະບົບພັດທະນາສະຫະປະຊາຊາດ, ເສີມຂະຫຍາຍປະສິດທິຜົນແຫ່ງການຮ່ວມມືພັດທະນາ ເພື່ອປະຕິບັດສຳເລັດໂຄງການດຳເນີນງານພັດທະນາແບບຍືນຍົງ ແລະ ບັນດາຄາດໝາຍພັດທະນາແບບຍືນຍົງ (SDG), ພິເສດແມ່ນການລົບລ້າງຄວາມອຶດຫີວ, ທຸກຍາກ, ຊຸກຍູ້ການເຕີບໂຕເສດຖະກິດຢ່າງໝັ້ນຄົງ, ຮອບດ້ານ ແລະ ປົກປັກຮັກສາສິ່ງແວດລ້ອມ.