ຫວຽດນາມ ເຂົ້າຮ່ວມກອງປະຊຸມ ລັດຖະມົນຕີຂະບວນການບໍ່ຮ່ວມກຸ່ມຢູ່ ອີຢີບ
Pham Huan ນັກຂ່າວ VOV ປະຈຳອີຢີບ -
ປະເທດອີຢີບ
(ພາບ:travel365.com.vn)
( vovworld ) – ກອງປະຊຸມລັດຖະມົນຕີຂະບວນການບໍ່ຮ່ວມກຸ່ມ (NAM) ພວມດຳເນີນໄປຢູ່ນະຄອນ Sharm El Sheikh ປະເທດອີຢີບ ແຕ່ວັນທີ 7-10/5. ກອງປະຊຸມຄັ້ງນີ້ ເພື່ອແນໃສ່ປຶກສາຫາລືບັນດາເນື້ອໃນອັນເປັນພື້ນຖານທີ່ສຸດ ແນໃສ່ກະກຽມໃຫ້ແກ່ກອງປະຊຸມຂັ້ນສູງຂອງຂະບວນການບໍ່ຮ່ວມກຸ່ມ ຊື່ງຈະຖືກຈັດຂຶ້ນໃນທ້າຍເດືອນ 8/2012 ຢູ່ Teheran ປະເທດ Iran.
ເມື່ອຕອບສຳພາດຕໍ່ນັກຂ່າວວິທະຍຸກະຈາຍສຽງຫວຽດນາມ ປະຈຳອີຢີບ, ທ່ານ Hoang Chi Trung ຫົວໜ້າກົມບັນດາອົງການຈັດຕັ້ງສາກົນ-ກະຊວງການຕ່າງປະເທດຫວຽດນາມ ໃຫ້ຮູ້ວ່າ: ທ່ານຮອງລັດຖະມົນຕີການຕ່າງປະເທດ Le Luong Minh ເປັນຫົວໜ້າຄະນະຜູ້ແທນຫວຽດນາມ ເຂົ້າຮ່ວມກອງປະຊຸມຄັ້ງນີ້. ຄະນະຜູ້ແທນ ຫວຽດນາມ ໄດ້ເຂົ້າຮ່ວມຢ່າງຕັ້ງໜ້າ ແລະ ມີການປະກອບສ່ວນຢ່າງລະອຽດເຂົ້າໃນວິວັດການກະກຽມເນື້ອໃນເອກະສານໃຫ້ແກ່ກອງປະຊຸມ. ທ່ານ Hoang Chi Trung ເວົ້າວ່າ:
“
ເອກະສານມີຫຼາຍເນື້ອໃນ, ໂດຍຜ່ານຄະນະຜູ້ແທນ ຫວຽດນາມ ປະຈຳສະຫະປະຊາຊາດ, ພວກເຮົາໄດ້ສົມທົບກັບບັນດາປະເທດໃນຂະບວນການບໍ່ຮ່ວມກຸ່ມໃນ ອາຊຽນ ເພື່ອສ້າງແຜນະໂຍບາຍລວມຂອງຂະບວນການບໍ່ຮ່ວມກຸ່ມ ກ່ຽວກັບທຸກໆບັນຫາ, ພິເສດແມ່ນການຕີລາຄາສະພາບການຂອງພາກພື້ນອາຊີຕາເວັນອອກສ່ຽງໃຕ້, ກ່ຽວກັບການພັດທະນາຂອງອາຊຽນ, ກ່ຽວກັບການສ້າງພາກພື້ນແຫ່ງສັນຕິພາບ, ສະຖຽນລະພາບໃນພາກພື້ນກໍ່ຄືໃນໂລກ. ນອກຈາກນັ້ນແລ້ວ, ຫວຽດນາມ ຍັງປະກອບສ່ວນ ແລະ ມີຂໍ້ລິເລີ່ມຄື: ກ່ຽວກັບການຫລຸດຜ່ອນກຳລັງທັບ, ຄວາມມານະພະຍາຍາມຂອງຂະບວນການບໍ່ຮ່ວມກຸ່ມ ໃນການຊຸກຍູ້ການສ້າງໂລກປອດອາວຸດນິວເຄຼຍ, ບັນດາຂໍ້ລິເລີ່ມແກ້ໄຂການປະທະກັນໂດຍສັນຕິວິທີ, ຂໍ້ລິເລີ່ມເພື່ອປະຕິບັດຈຸດໝາຍການພັດທະນາ, ຈຸດໝາຍສະຫັດສະວັດຂອງ ສະຫະປະຊາຊາດ…..“
Pham Huan ນັກຂ່າວ VOV ປະຈຳອີຢີບ