(ພາບປະກອບ :nguyenphutrong.net)
(vovworld) - ວັນທີ 28/06, ສື່ມວນຊົນໄທ ສືບຕໍ່ໃຫ້ຂ່າວ, ບົດວິຈານ, ຕີລາຄາກ່ຽວກັບການຢ້ຽມຢາມໄທ ຢ່າງເປັນທາງການຂອງທ່ານເລຂາທິການໃຫຍ່ຄະນບໍລິຫານງານສູນກາງພັກກອມມູນິດຫວຽດນາມ ຫງວຽນຟຸຈ້ອງ. ມີບັນດາໜັງສືພິມ, ສື່ເອເລກໂຕນິກ ໄທ ໄດ້ຖືວ່າ ການຢ້ຽມຢາມຂອງທ່ານເລຂາທິການໃຫຍ່ ຫງວຽນຟຸຈ້ອງ ໄດ້ຮັບຜົນສຳເລັດຢ່າງຈົບງາມ. ພິເສດແມ່ນ ເລື່ອງການນຳ 2 ປະເທດຫວຽດນາມ ແລະ ໄທ ໄດ້ອອກຖະແຫຼງການຮ່ວມຍົກລະດັບການພົວພັນ 2 ຝ່າຍຂຶ້ນສູ່ລະດັບ “ຄູ່ຮ່ວມມືຍຸດທະສາດ”. ໜັງສືພິມ ຊົນຊາດ ຂຽນດ້ວຍພາສາອັງກິດຂອງໄທ ໃຫ້ຂໍ້ສັງເກດວ່າ: ການຢ້ຽມຢາມຂອງທ່ານເລຂາທິການໃຫຍ່ ຫງວຽນຟຸຈ້ອງ ໄດ້ກຳນົດໄລຍະ “ຄູ່ຮ່ວມມືຍຸດທະສາດ” ລະຫວ່າງຫວຽດນນາມ - ໄທ, ປະກອບສ່ວນຊຸກຍູ້, ເພີ່ມທະວີການຮ່ວມມືລະຫວ່າງ 2 ປະເທດໃນທຸກຂົງເຂດເຊິ່ງໃນນັ້ນມີ 5 ຂົງເຂດຕົ້ນຕໍ່ແມ່ນ ການເມືອງ, ປ້ອງກັນຄວາມສະຫງົບ, ເສດຖະກິດ, ວັດທະນະທຳ - ສຶກສາ - ວິທະຍາສາດເຕັກໂນໂລຊີ ແລະ ການຮ່ວມມືໃນພາກພື້ນ. ໃນຂະນະນັ້ນ, ການນຳສະພາດຳເນີນທຸລະກິດໄທ - ຫວຽດນາມ ໃຫ້ຮູ້ວ່າ, ການຢ້ຽມຢາມຂອງທ່ານເລຂາທິການໃຫຍ່ ຫງວຽນຟຸຈ້ອງ ໄດ້ສ້າງກາລະໂອກາດເພື່ອໃຫ້ ສະພາດຳເນີນທຸລະກິດໄທ - ຫວຽດນາມ, ສະພາດຳເນີນທຸລະກິດຫວຽດນາມ - ໄທ ເປັນຄັ້ງທຳອິດໄດ້ຈັດຕັ້ງກອງປະຊຸມປຶກສາຫາລືກ່ຽວກັບການຮ່ວມມືລົງທຶນ, ການຄ້າ.