ທ່ານຮອງລັດຖະມົນຕີການຕ່າງປະເທດຫວຽດນາມ Pham Quang Vinh ຫົວໜ້າຄະນະຜູ້ແທນຫວຽດນາມເຂົ້າຮ່ວມກອງປະຊຸມສະມັດຊາໃຫຍ່ ສ.ປ.ຊ ຄັ້ງທີ່ 67 (ພາບ: internet)
|
Vovworld- ບັນດາປະເທດອາຊຽນຢືນຢັນວ່າຈະເພີ່ມທະວີປະຊາຄົມ ແລະ ເຊື່ອມຕໍ່ພາຍໃນກຸ່ມເພື່ອຮັບປະກັນສັນຕິພາບ, ສະຖຽນລະພາບ ແລະ ການຮ່ວມມືໃນພາກພື້ນ, ໃນນັ້ນມີຂົງເຂດປ້ອງກັນຄວາມສະຫງົບ ແລະ ຮັບປະກັນຄວາມ ປອດໄພໃນການເດີນທະເລ. ຕອບສຳພາດຕໍ່ນັກຂ່າວ VOV ປະຈຳອາເມລິກາ, ທ່ານຮອງລັດຖະມົນຕີການຕ່າງປະເທດຫວຽດນາມ Pham Quang Vinh ຫົວໜ້າຄະນະຜູ້ແທນຫວຽດນາມທີ່ເຂົ້າຮ່ວມກອງປະຊຸມສະມັດຊາໃຫຍ່ ສ.ປ.ຊ ຄັ້ງທີ່ 67 , ໃຫ້ຮູ້ວ່າ ນີ້ແມ່ນໜຶ່ງໃນບັນດາຄວາມເຫັນດີເຫັນພ້ອມທີ່ຫາກໍບັນລຸໄດ້ລະຫວ່າງບັນດາລັດຖະມົນຕີການຕ່າງປະເທດອາຊຽນທີ່ວາລະປຶກສາຫາລືລວມຂອງ ກອງປະຊຸມສະມັດຊາໃຫຍ່ ສ.ປ.ຊ ຄັ້ງທີ່ 67 ທີ່ຫາກໍຖືກຈັດຂຶ້ນຢູ່ນິວຢອກປະເທດອາເມລິກາ. ຕາມທ່ານແລ້ວ, ທີ່ກອງປະຊຸມຢ່າງບໍ່ເປັນທາງການຂອງບັນດາ ລັດຖະມົນຕີການຕ່າງປະເທດອາຊຽນຢູ່ນອກ ກອງປະຊຸມສະມັດຊາໃຫຍ່ ສ.ປ.ຊ , ບັນດາລັດຖະມົນຕີໄດ້ປຶກສາຫາລືກ່ຽວກັບການສົມທົບກັນຂອງອາຊຽນໃນບັນດາບັນຫາທີ່ກ່ຽວຂ້ອງຂອງ ສ.ປ.ຊ ແລະ ເພີ່ມທະວີການຮ່ວມມື ອາຊຽນ - ສ.ປ.ຊ. ກ່ຽວກັບການກະກຽມໃຫ້ແກ່ບັນດາກອງປະຊຸມຂັ້ນສູງອາຊຽນທີ່ຈັດຂຶ້ນຢູ່ກຳປູເຈຍໃນເດືອນທັນວາທີ່ຈະມາເຖິງນີ້, ບັນດາ ລັດຖະມົນຕີ ການຕ່າງປະເທດເນັ້ນໜັກເຖິງການເພີ່ມທະວີປະຊາຄົມອາຊຽນ ແລະ ເຊື່ອມຕໍ່ພາຍໃນກຸ່ມ, ພ້ອມທັງຊຸກຍູ້ການຮ່ວມມືຂອງອາຊຽນກັບບັນດາຄູ່ຮ່ວມມື, ໃນນັ້ນ ພິເສດແມ່ນຊຸກຍູ້ການຮ່ວມມືແນໃສ່ສ້າງສະພາບແວດລ້ອມແຫ່ງສັນຕິພາບ, ສະຖຽນລະພາບໃນພາກພື້ນ ກໍຄືແກ້ໄຂບັນດາສິ່ງທ້າທາຍຕ່າງໆ. ທ່ານຮອງລັດຖະມົນຕີການຕ່າງປະເທດຫວຽດນາມ Pham Quang Vinh ໃຫ້ຮູ້ວ່າ :
“ ບັນດາປະເທດອາຊຽນເນັ້ນໜັກເຖິງເລື່ອງອາຊຽນຄວນເສີມຂະຫຍາຍບົດບາດເປັນໃຈກາງ ແລະ ນຳໜ້າຂອງຕົນໃນການຮັບປະກັນ ສະພາບແວດລ້ອມແຫ່ງສັນຕິພາບ, ສະຖຽນລະພາບ ແລະ ການຮ່ວມມືໃນພາກພື້ນ, ໃນນັ້ນມີການຮັບປະກັນສັນຕິພາບ, ສະຖຽນລະພາບ ແລະ ຄວາມ ປອດໄພໃນການເດີນທະເລ. ບັນດາປະເທດອາຊຽນລ້ວນແຕ່ເນັ້ນໜັກວ່າ ຕ້ອງເພີ່ມທະວີການເຄົາລົບບັນດາຫຼັກການຂອງກົດໝາຍສາກົນ ແລະ ສົນທິສັນຍາ ສ.ປ.ຊ ກ່ຽວກັບກົດໝາຍທະເລ, ແກ້ໄຂການພິພາດກັນໂດຍສັນຕິວິທີ. ກ່ຽວຂ້ອງເຖິງທະເລຕາເວັນອອກ, ບັນດາປະເທດຍັງເນັ້ນໜັກເຖິງຫຼັກການຕ້ອງປະຕິບັດຖະແຫຼງການກ່ຽວກັບຂໍ້ກຳນົດການປະພຶດຂອງຝ່າຍຕ່າງໆທີ່ກ່ຽວຂ້ອງຢູ່ ທະເລຕາເວັນອອກ (DOC), ແກ້ໄຂການພິພາດກັນໂດຍສັນຕິວິທີ ແລະ ເຄົາລົບສົນທິສັນຍາ ສ.ປ.ຊ ກ່ຽວກັບກົດໝາຍທະເລ ແລະ ພິເສດແມ່ນສະໜັບສະໜູນຖະແຫຼງການ 6 ຂໍ້ຂອງອາຊຽນກ່ຽວກັບບັນຫາ ທະເລຕາເວັນອອກ; ກ້າວເຂົ້າສູ່ການເຈລະຈາກ່ຽວກັບປະມວນຂໍ້ກຳນົດວິທີການປະພຶດ( COC) ຢູ່ ທະເລຕາເວັນອອກ ”
ຫົວເລື່ອງທີ່ວາງອອກຂອງກອງປະຊຸມສະມັດຊາໃຫຍ່ ສ.ປ.ຊ ຄັ້ງນີ້ ກໍແມ່ນສວ່ນໜຶ່ງທີ່ສຳຄັນທີ່ສຸດໃນຄວາມມານະພະຍາຍາມລວມຂອງບັນດາປະເທດທີ່ມີຄວາມຫວັງສ້າງສະພາບແວດລ້ອມແຫ່ງສັນຕິພາບເພື່ອສຸມໃສ່ການພັດທະນາໃນສະພາບການທີ່ຄວາມແຕກໂຕນກັນລະຫວ່າງຄວາມຮ່ັງມີ ແລະ ທຸກຍາກຍັງຫຼາຍຢູ່. ທ່ານຮອງລັດຖະມົນຕີການຕ່າງປະເທດຫວຽດນາມ Pham Quang Vinh ຊີ້ແຈງວ່າ :
“ ຕາມທັດສະນະຂອງຫວຽດນາມແລ້ວ, ທີ່ 1 ແມ່ນພື້ນຖານສັນຕິພາບແບບຍືນຍົງຄວນອີງໃສ່ກົດໝາຍສາກົນ. ທີ່ 2 , ບັນດາປະເທດຄວນສ້າງພື້ນຖານວັດທະ ນະທຳສັນຕິພາບ. ທີ່ 3 ແມ່ນບັນດາປະເທດຕ້ອງແກ້ໄຂການພິພາດກັນໂດຍສັນຕິວິທີຊຶ່ງໄດ້ລະບຸໃນກົດໝາຍສາກົນ ແລະ ບັນດາສັນຍາສາກົນ ” .