ທ່ານພົນໂທ Tran Dai Quang ທ່ານພົນເອກ Nikolai Patrushev
(ພາບ:ອິນເຕີແນັດ)
(VOV)- ໂດຍໄດ້ຮັບຄຳເຊີນຂອງທ່ານພົນເອກ Alexander Bornikov ຜູ້ອຳນວຍການອົງການປ້ອງກັນຄວາມສະຫງົບສະຫະພັນລັດເຊຍ FSB, ຄະນະຜູ້ແທນຂັ້ນສູງກະຊວງຕຳຫຼວດຫວຽດນາມ ໂດຍທ່ານພົນໂທ Tran Dai Quang ກຳມະການກົມການເມືອງ, ລັດຖະມົນຕີກະຊວງຕຳຫຼວດຫວຽດນາມ ນຳໜ້າ ຫາກໍ່ສິ້ນສຸດການຢ້ຽມຢາມ ແລະ ເຮັດວຽກຢູ່ລັດເຊຍ ແຕ່ວັນທີ 30/10-3/11. ຄະນະໄດ້ພົບປະ ແລະ ເຈລະຈາກັບທ່ານພົນເອກ Alexander Bornikov ຜູ້ອຳນວຍການອົງການປ້ອງກັນຄວາມສະຫງົບສະຫະພັນລັດເຊຍ, ທ່ານພົນເອກ Nikolai Patrushev ເລຂາອົງການດັ່ງກ່າວ ແລະ ທ່ານພົນຕີ Vladimia Colonoxev ລັດຖະມົນຕີກະຊວງພາຍໃນລັດເຊຍ. ທ່ານລັດຖະມົນຕີກະຊວງຕຳຫຼວດຫວຽດນາມ Tran Dai Quang ໄດ້ຕີລາຄາສູງການສົມທົບກັນຢ່າງແໜ້ນແຟ້ນ, ມີປະສິດທິຜົນ, ແທດຈິງລະຫວ່າງອົງການປ້ອງກັນຄວາມສະຫງົບ ແລະ ກະຊວງພາຍໃນລັດເຊຍ ກັບກະຊວງຕຳຫຼວດຫວຽດນາມ, ປະກອບສ່ວນຮັບປະກັນຄວາມເປັນລະບຽບຮຽບຮ້ອຍທາງສັງຄົມຂອງແຕ່ລະປະເທດ. ສອງຝ່າຍໄດ້ເຫັນດີເປັນເອກະສັນນຳກັນຕີລາຄາວ່າ: ການພົວພັນດ້ານການເມືອງ, ການຮ່ວມມືດ້ານເສດຖະກິດ, ການຄ້າ, ການປ້ອງກັນຄວາມສະຫງົບ….ລະຫວ່າງສອງປະເທດມີຄວາມໄວ້ເນື້ອເຊື່ອໃຈສູງ, ເປັນປົກກະຕິ, ໄດ້ຮັບການປັບປຸງຢ່າງບໍ່ຢຸດຢັ້ງ ແລະ ມີບັນດາບາດກ້າວເດີນສຳຄັນ, ພ້ອມທັງເຫັນດີກັບບັນດາມາດຕະການເພື່ອແນໃສ່ຮັກສາ ແລະ ພັດທະນາການພົວພັນຮ່ວມມືລະຫວ່າງກະຊວງຕຳຫຼວດຫວຽດນາມ ກັບບັນດາອົງການປ້ອງກັນຄວາມສະຫງົບ ແລະ ກະຊວງພາຍໃນລັດເຊຍ.