ແຂວງເຫົ້າຢາງຄວນຂະຫຍາຍຮູບແບບຮ່ວມສຳພັນ,ຮ່ວມມືຫຼາຍຮູບຫຼາຍແບບເພື່ອພັດທະນາການຜະລິດ
ທ່ານນາຍົກລັດຖະມົນຕີ ຫງວຽນເຕິ໋ນຢຸງ ເຮັດວຽກກັບການນຳຫຼັກແຫຼ່ງແຂວງເຫົ້າຢາງ
(ພາບ: VGP/Nhật Bắc)
|
(vovworld) - ທີ່ການເຮັດວຽກກັບການນຳຫຼັກແຫຼ່ງແຂວງເຫົ້າຢາງ, ກ່ຽວກັບສະພາບການປະຕິບັດໜ້າທີ່ພັດທະນາເສດຖະກິດສັງຄົມຂອງທ້ອງຖີ່ນໃນຕອນບ່າຍວັນທີ 9/4, ຢູ່ນະຄອນວິແທງ, ແຂວງເຫົ້າຢາງ. ທ່ານນາຍົກລັດຖະມົນຕີ ຫງວຽນເຕິ໋ນຢຸງ ໄດ້ຊີ້ນຳແຂວງເຫົ້າຢາງ ຄວນຂະຫຍາຍຮູບແບບຮ່ວມສຳພັນ, ຮ່ວມມືດ້ວຍຫຼາຍຮູບຫຼາຍແບບເພື່ອພັດທະນາການຜະລິດເສດຖະກິດ. ທ່ານນາຍົກລັດຖະມົນຕີ ຮຽກຮ້ອງການນຳແຂວງສືບຕໍ່ຊີ້ນຳການປະຕິບັດເພື່ອບັນລຸ ແລະ ລື່ນກາຍຕົວເລກຄາດໝາຍເສດຖະກິດສັງຄົມທີ່ໄດ້ວາງອອກໃນປີນີ້ ແລະໃນແຜນການ 5 ປີ, ຕິດພັນກັບການຈັດຕັ້ງກອງປະຊຸມໃຫຍ່ພັກທຸກຂັ້ນ; ກຳນົດຄາດໝາຍ, ໜ້າທີ່ ແລະ ມາດຕະການລະອຽດໃຫ້ຕິດແທດກັບສະພາບຕົວຈິງ. ທ່ານນາຍົກລັດຖະມົນຕີ ກໍ່ໃສ່ໃຈການນຳແຂວງເຫົ້າຢາງ ຫັນປ່ຽນໂຄງປະກອບແຮງງານຈາກຂົງເຂດກະສີກຳໄປສູ່ຂົງເຂດອຸດສາຫະກຳ ແລະ ການບໍລິການຢ່າງໄວບົນພື້ນຖານສ້າງທຸກກົນໄກ, ນະໂຍບາຍສົ່ງເສີມດຶງດູດການລົງທຶນພັດທະນາບັນດາຂົງເຂດທີ່ຄົນງານມາເຮັດວຽກຫຼາຍ. ທ່ານນາຍົກລັດຖະມົນຕີ ຮຽກຮ້ອງແຂວງເຫົ້າຢາງ ສືບຕໍ່ສ້າງການຫັນປ່ຽນຢ່າງແຮງໃນການພັດທະນາສາທາລະນະສຸກ, ການສຶກສາ, ຫຼຸດຜ່ອນຄວາມທຸກຍາກຢ່າງໄວ ແລະ ໝັ້ນຄົງ; ຍູ້ແຮງການປະຕິຮູບລະບຽບການບໍລິຫານ, ແນໃສ່ສ້າງຄວາມສະດວກໃຫ້ແກ່ປະຊາຊົນ ແລະ ວິສາຫະກິດ; ສົມທົບທຸກແຫຼ່ງກຳລັງ ເພື່ອສຸມໃສ່ລົງທຶນກໍ່ສ້າງພື້ນຖານໂຄງລ່າງຕິດພັນກັບການກໍ່ສ້າງຊົນນະບົດໃໝ່.
ເມື່ອເຂົ້າຮ່ວມ ແລະ ກ່າວຄຳເຫັນທີ່ກອງປະຊຸມສະຫລຸບໂຄງການກໍ່ສ້າງເຂດຊຸມຊົນ ແລະ ເຮືອນຢູ່ ຢູ່ເຂດນ້ຳຖ້ວມ ທົ່ງພຽງແມ່ນ້ຳຂອງທາງພາກໃຕ້ຫວຽດນາມ ໄລຍະ 2, ທ່ານນາຍົກລັດຖະມົນຕີ ຫງວຽນເຕີນຢູງ ຕີລາຄາວ່າ: ຜ່ານ 2 ໄລຍະແຫ່ງການຜັນຂະຫຍາຍ, ໂຄງການບັນລຸໄດ້ໝາກຜົນອັນແທດຈິງ ແລະ ປະສົບຜົນສຳເລັດ. ທ່ານນາຍົກລັດຖະມົນຕີ ສະເຫນີ ບັນດາກະຊວງ, ຂະແຫນງການ,ບັນດາແຂວງ,ນະຄອນ ໃນເຂດ ສືບຕໍ່ສຳເລັດບັນດາໂຄງການກໍ່ສ້າງພື້ນຖານໂຄງລ່າງ ແລະ ເຮືອນຢູ່ ເພື່ອຕອບສະຫນອງຄວາມຕ້ອງການໃນການດຳລົງຊີວິດນັບມື້ນັບສູງ ຂອງປະຊາຊົນ .