(vovworld) - ບັນຫາທະເລຕາເວັນອອກແມ່ນໜຶ່ງໃນບັນດາເນື້ອໃນຂອງໂຄງການດຳເນີນງານທີ່ກອງປະຊຸມສຸດຍອດອາຊຽນຄັ້ງທີ 20 ທີ່ພວມຈັດຂຶ້ນທີ່ນະຄອນຫຼວງພະນົມເປັນ, ປະເທດກຳປູເຈຍ, ໃນວັນທີ 3 ແລະ 4/4. ທ່ານ Ho Nam Hong, ຮອງນາຍົກລັດຖະມົນຕີ, ທັງເປັນລັດຖະມົນຕີການຕ່າງປະເທດກຳປູເຈຍ ໃຫ້ຮູ້ວ່າ: ບັນດາປະເທດອາຊຽນ ທັງໝົດລ້ວນແຕ່ເຫັນດີເປັນເອກະສັນນຳກັນ ແກ້ໄຂບັນຫາພິພາດກັນຢູ່ເຂດທະເລຕາເວັນອອກຕາມບັນດາຫຼັກການພື້ນຖານ. ທີ່ໜຶ່ງແມ່ນ, ການພິພາດກັນຕ້ອງແກ້ໄຂບົນຈິດໃຈປົກປັກຮັກສາສັນຕິພາບ ແລະ ສະຖຽນລະພາບຢູ່ທະເລຕາເວັນອອກ. ທີ່ 2 ແມ່ນ, ແກ້ໄຂບັນດາການພິພາດກັນຕ້ອງມີການເຂົ້າຮ່ວມຂອງອາຊຽນ ແລະ ຈີນ.
ກ່ອນໜ້ານັ້ນ, ຕາມພາຫະນະສື່ມວນຊົນຈຳນວນໜຶ່ງ, ບັນຫາທະເລຕາເວັນອອກຈະບໍ່ໄດ້ນຳມາປຶກສາຫາລືທີ່ກອງປະຊຸມສຸດຍອດອາຊຽນຄັ້ງທີ 20, ເຖິງຢ່າງໃດກໍຕາມ, ບັນຫານີ້ໄດ້ນຳເຂົ້າໂຄງການດຳເນີນງານຂອງກອງປະຊຸມ. ທີ່ກອງປະຊຸມຄັ້ງນີ້, ບັນດາການນຳອາຊຽນ ຈະປຶກສາຫາລື ແລະ ຮັບຮອງເອົາບັນດາເອກະສານຄື: ຖະແຫຼງການພະນົມເປັນ “ອາຊຽນ: ປະຊາຄົມໜຶ່ງດຽວ, ຊາຕາກຳໜຶ່ງດຽວ”, ຖະແຫຼງການຮ່ວມປອດຢາເສບຕິດໃນປີ 2015, ຖະແຫຼງການປະທານອາຊຽນ ກ່ຽວກັບການສະເຫຼີມສະຫຼອງ 45 ປີແຫ່ງວັນສ້າງຕັ້ງອາຊຽນ ແລະ ໝາກຜົນກອງປະຊຸມສຸດຍອດອາຊຽນ ຄັ້ງທີ 20.