(vovworld)- ເຂດວາງສະແດງ “ບັນດາການຄົ້ນຫາບູຮານຄະດີໃຕ້ດິນຢູ່ ບໍລິເວນຫໍປຊຸມສະພາແຫ່ງຊາດ” ໄດ້ນຳເຂົ້າເຄື່ອນໄຫວຢ່າງເປັນທາງການນັບແຕ່ເດືອນ 5/2016 ເປັນຕົ້ນໄປ. ນີ້ໄດ້ຮັບຖືວ່າແມ່ນຫໍພິພິທະພັນບູຮານຄະດີແຫ່ງທຳອິດຢູ່ຫວຽດນາມ ໂດຍສະພາມະຫາບັນດິດວິທະຍາສາດສັງຄົມຫວຽດນາມປະຕິບັດ.
ການວາງສະແດງເຄື່ອງບູຮານຄະດີຢູ່ຊັ້ນ 2
|
ການວາງສະແດງ “ບັນດາການຄົ້ນຫາບູຮານຄະດີໃຕ້ດິນຢູ່ ບໍລິເວນຫໍປະຊຸມສະພາແຫ່ງຊາດ ດ້ວຍ ຮ່ອງຮອຍ 140 ຢ່າງ ພ້ອມກັບເຄື່ອງ ວັດຖຸບູຮານ ນັບພັນໆຢ່າງທີ່ມີມາໃນຫລາຍສະໄຫມ ແລະ ຖືກຕັ້ງຢ່າງກ່າຍກອງກັນ. ເພື່ອສ້າງເປັນຄວາເຊື່ອມຈອດຢ່າງກົມກຽວລະຫວ່າງບູຮານ ແລະ ທັນສະໄຫມ, ລັດຫວຽດນາມ ມີແຜນນະໂຍບາຍສະຫງວນທີ່ດິນສ່ວນຫນຶ່ງຢູ່ ຊັ້ນໃຕ້ດິນຂອງ ບໍລິເວນຫໍປະຊຸມສະພາແຫ່ງຊາດ ເພື່ອ ເປັນບ່ອນວາງສະແດງບັນດາການຄົ້ນຫາບູຮານຄະດີກ່ຽວກັບເຂດພະລາດຊະວັງທັງລອງ, ແນໃສ່ສ້າງພາບພົດທີ່ເປັນເອກະລັກສະເພາະ, ປະກອບສ່ວນໂຄສະນາຄຸນຄ່າມໍລະດົກພະລາດຊະວັງ ທັງລອງ ໃຫ້ແກ່ນັກທ່ອງທ່ຽວພາຍໃນ ແລະ ຕ່າງປະເທດ. ເນື້ອໃນຕົ້ນຕໍຂອງເຂດວາງສະແດງນີ້ ແມ່ນແນະນຳຮ່ອງຮອຍ, ເຄື່ອງວັດຖຸບູຮານທີ່ໂດດເດັ່ນ, ເປັນເອກະລັກສະເພາະພິເສດທີ່ສຸດຊື່ງໄດ້ຮັບການຂຸດຄົ້ນມາໄດ້ຢູ່ບໍລິເວນກໍ່ສ້າງ ບໍລິເວນຫໍປະຊຸມສະພາແຫ່ງຊາດ ໃນຊຸມປີ 2008-2009 ຢູ່ໃຕ້ຊັ້ນໃຕ້ດິນຂອງອາຄານຫລັງນີ້. ການວາງສະແດງແມ່ນແນະນຳຕາມໄລຍະເວລາ. ຮູບການວາງສະແດງແມ່ນປະສົມປະສານລະຫວ່າງຮ່ອງຮອຍ ແລະ ເຄື່ອງວັດຖຸບູຮານ, ໃນນັ້ນ ຮ່ອງຮອຍໄດ້ຮັບຖືວ່າແມ່ນຈຸດສຸມ, ວັດຖຸບູຮານໄດ້ຮັບຖືວ່າແມ່ນສິ່ງສຳຄັນທີ່ແນະນຳຢູ່ເຂດປູຊະນີຍະສະຖານ. ຮູບການວາງສະແດງນີ້ ແມ່ນເພື່ອນຳມາເຊິ່ງບັນດາຄວາມຮູ້ສຶກ ແລະ ຄວາມປະທັບໃຈຜ່ານແຕ່ລະເຂດວາງສະແດງ. ຮອງສາດສະດາຈານ, ດຣ ບູ່ຍມີງຈີ, ຜູ້ອຳນວຍການສູນຄົ້ນຄ້ວາພະລາດຊະວັງ, ສະພາມະຫາບັນດິດ ວິທະຍາສາດສັງຄົມຫວຽດນາມ ໃຫ້ຮູ້ວ່າ:
“ ພວກຂ້າພະເຈົ້າໄດ້ມີແນວຄວາມຄິດວ່າ ເຮັດແນວໃດເພື່ອວາດພາບໄດ້ປູຊະນີຍະສະຖານນີ້ໃຫ້ມີຊີວິດຊີວາທີ່ສຸດ, ມີຄວາມເຂົ້າໃຈງ່າຍສຸດ, ນຳມາໃຫ້ສາທາລະນະຊົນຄວາມຮູ້ສຶກອັນເລິກເຊິ່ງທີ່ສຸດ ແລະ ນຶກເຫັນບັນດາຄຸນຄ່າການຄົ້ນພົບເຄື່ອງບູຮານຄະດີ, ເຂົ້າໃຈໄດ້ຂອບຂະຫນາດບັນດາກິດຈະກຳສະຖາປັດຕະຍະກຳກໍຄືເຕັກນິກໃນການກໍ່ສ້າງ ພ້ອມກັບບັນດາວັດຖຸພັນທີ່ຊອກເຫັນໄດ້ຢູ່ປູຊະນີຍະສະຖານແຫ່ງນີ້.”
ຮູບພາບເຮັດດ້ວຍປ່ຽງດິນຈີ,ດິນຂໍ
|
ໃນບໍລິເວນວາງສະແດງຢູ່ຊັ້ນໃຕ້ດິນ ລ້ວນແຕ່ມີຈຸດທີ່ພົ້ນເດັ່ນ ສ້າງເປັນຄວາມເປັນເອກະລັກພິເສດສະເພາະ ພ້ອມກັບບັນດາເລື່ອງລາວກ່ຽວກັບປະຫວັດຄວາມເປັນມາໃນການຄົ້ນພົບວັດຖຸບູຮານໃຕ້ດິນກ່ຽວກັບພະລາດຊະວັງທັງລອງໃນເມື່ອກ່ອນ. ແນວຄວາມຄິດວາງສະແດງຢູ່ທີ່ນີ້ ແມ່ນແບ່ງຕາມຊັ້ນດິນບູຮານຄະດີ, ຕາມການຜັນແປຂອງການເວລານັບແຕ່ໄລຍະກ່ອນມາຮອດໄລຍະຫລັງ ສະນັ້ນ ຊັ້ນໃຕ້ດິນຊັ້ນ 2 ແມ່ນວາງສະແດງເຄື່ອງວັດຖຸບູຮານກ່ຽວກັບໄລຍະກ່ອນທີ່ເຈົ້າຊີວິດ ລີກົງອວນ ຍ້າຍເມືອງຫລວງມາຕັ້ງຢູ່ທັງລອງ, ສ່ວນຢູ່ຊັ້ນໃຕ້ດິນ ຊັ້ນ 1 ແມ່ນວາງສະແດງວັດຖຸບູຮານສະໄຫມ ຫລັງປີ 1010 ພາຍຫລັງ ເຈົ້າຊີວິດ ລີກົງອວນ ຍ້າຍເມືອງຫລວງມາຕັ້ງຢູ່ ທັງລອງ. ຢູ່ຊັ້ນໃຕ້ດິນ ແຕ່ລະຊັ້ນ ແລະ ແຕ່ລະບໍລິເວນວາງສະແດງ ພັດມີບັນດາຈຸດພົ້ນເດັ່ນເພື່ອນຳມາເຊິ່ງບັນດາຄວາມຮູ້ສຶກ, ຄວາມປະທັບໃຈ ມາໃຫ້ສາທາລະນະຊົນແບບທຳມະຊາດ ແລະ ສະແດງໃຫ້ເຫັນບັນດາຄຸນຄ່າທີ່ໂດດເດັ່ນຂອງມໍລະດົກ. ຮອງສາດສະດາຈານ, ດຣ ບູ່ຍມີງຈີ ເນັ້ນຫນັກວ່າ:
“ນີ້ແມ່ນບັນດາຮູບພາບທຳອິດເພື່ອໃຫ້ພວກເຮົາມີຄວາມຮູ້ສຶກຢ່າງເລິກເຊິ່ງກ່ຽວກັບສະຖາປັດຕະຍະກຳ ວັງ ຂອງສະໄຫມລາດຊະວົງ ລີ. ພວກເຮົາມີຄວາມເອກອ້າງທະນົງໃຈວ່າ ສະໄຫມລາດຊະວົງ ລີ ໄດ້ມີຫົວຄິດປະດິດສ້າງ ກໍ່ສ້າງພື້ນຖານສະຖາປັດຕະຍະກຳທີ່ມີຄຸນຄ່າສະເພາະຕ່າງຫາກ ດ້ວຍລະດັບຄວາມຮູ້ທີ່ກ້າວຫນ້າ ແລະ ເປັນເອກະລັກສະເພາະພິເສດ. ສິ່ງດັ່ງກ່າວສະແດງໃຫ້ເຫັນຢ່າງຈະແຈ້ງຜ່ານບັນດາປະເພດວັດສະດຸອຸປະກອນປະດັບປະດາຫລັງຄາ ແລະ ເຕັກນິກການກໍ່ສ້າງພື້ນເຮືອນຂອງບັນດາກິດຈະກຳສະຖາປັດຕະຍະກຳ;”
ເຂດວາງສະແດງຍັງມີຮູບພາບຂະຫຍາດໃຫຍ່ 2 ແຜ່ນ ໂດຍໄດ້ຕິດຕັ້ງການຕິດຕໍ່ໃສ່ກັນຂອງປ່ຽງດິນຈີ່ດິນຂໍທີ່ເກັບມາໄດ້ຢູ່ເຂດປູຊະນີຍະສະຖານນີ້ ເພື່ອວາດພາບກ່ຽວກັບປະຫວັດຄວາມເປັນມາໃນການກໍ່ສ້າງພະລາດຊະວັງ ທັງລອງ. ນັ້ນແມ່ນ ຮູບພາບ “ມັງກອນບິນຂຶ້ນສູ່ສະຫວັນ” ແລະ “ແສງອະລຸນທັງລອງ” ໂດຍນາງບູ່ຍທູຈາງ ເປັນຜູ້ເຮັດ. ຮູບພາບ “ມັງກອນບິນຂຶ້ນສູ່ສະຫວັນ” ແມ່ນເລິ່ມຈາກຮູບພາບມັງກອນໃນສະໄຫມລາດຊະວົງ ລີ ແລະ ການບັນທຶກຂອງປະຫວັດສາດກ່ຽວກັບເຫດການເມື່ອປີ1010. ສ່ວນຮູບພາບ “ແສງອະລຸນທັງລອງ” ເລີ່ມມາຈາກຮູບພາບການປະດັບປະດາໃນຫລັງຄາຂອງສະຖາປັດຕະຍະກຳ ວັງສະໄຫມລາດຊະວົງ ລີ ເພື່ອສະແດງໃຫ້ເຫັນກ່ຽວກັບປະຫວັດຄວາມເປັນມາໃນການກໍ່ສ້າງພະລາດຊະວັງ ທັງລອງ ໃນລະດູໃບໄມ້ຫລົ່ນປີ 1010 ພ້ອມກັບການພັດທະນາຂອງພື້ນຖານວັດທະນະທຳ ດ້າຍຫວຽດ ນັບແຕ່ສະໄຫມລາດຊະວົງ ລີ.
ເຂດວາງສະແດງ “ບັນດາການຄົ້ນຫາເຄື່ອງບູຮານຄະດີໃຕ້ດິນຢູ່ ບໍລິເວນຫໍປະຊຸມສະພາແຫ່ງຊາດ ແມ່ນໝາກຜົນແຫ່ງການເຮັດວຽກມາເປັນເວລາ ເກືອບ 4 ປີ ຂອງບັນດານັກວິທະຍາສາດ ສັງກັດສູນຄົ້ນຄ້ວາພະລາດຊະວັງ, ສະພາມະຫາບັນດິດວິທະຍາສາດສັງຄົມຫວຽດນາມ. ບັນດາຮ່ອງຮອຍ, ເຄື່ອງວັດຖຸພັນໄດ້ຮັບການຮັກສາແບບດັ້ງເດີມ, ສ້າງເປັນບໍລິເວນວາງສະແດງທີ່ມີລັກສະນະວິທະຍາສາດບູຮານຄະດີດ້ວຍລະດັບສາກົນ. ເຂດວາງສະແດງ ໄດ້ຊີ້ໃຫ້ເຫັນການສືບທອດມູນເຊື້ອ, ພາບພົດຂອງສູນກາງອຳນາດດ້ານການເມືອງຂອງປະເທດຊາດພ້ອມກັບປະຫວັດສາດຂອງຊາດ.