ຕອນໜຶ່ງໃນຮູບເງົາເລື່ອງ "ເພື່ອນຮ່ວມຫ້ອງ" ຂອງຜູ້ກຳກັບການສະແດງ ຮູບເງົາຫງວຽນເລຮວ່າງຫວຽດ

    ໂດຍມີຄວາມເຕີບໃຫຍ່ຂຶ້ນຈາກບັນດາຮູບເງົາເລື່ອງສັ້ນທີ່ໄດ້ຮັບລາງວັນສາກົນ, ຜູ້ກຳກັບການສະແດງ ຮູບເງົາຫງວຽນເລຮວ່າງຫວຽດ ເກີດປີ 1991 ຖືວ່າ ການເຂົ້າຮ່ວມບັນດາງານມະຫາກຳຮູບເງົາສາກົນ ໄດ້ນຳມາຊຶ່ງຫຼາຍກາລະໂອກາດກໍ່ຄືການຄົ້ນຫາຕ່າງໆໃຫ້ແກ່ບັນດາຜູ້ຜະລິດຮູບເງົາເອກະລາດ. ຮວ່າງຫວຽດ ເວົ້າວ່າ:

  “ເຂົ້າຮ່ວມງານມະຫາກຳຮູບເງົາ ແມ່ນໂອກາດເພື່ອໃຫ້ຜູ້ຜະລິດຮູບເງົາແນະນຳຮູບເງົາຂອງຕົນໃຫ້ແກ່ຜູ້ຊົມ. ທີ່ງານມະຫາກຳຮູບເງົາ, ພວກເຮົາອາດຈະໄດ້ພົບບັນດາຜູ້ຜະລິດຮູບເງົາທີ່ມີບົດຮຽນປະສົບການ, ບາງຄັ້ງພວກເຮົາຍັງໄດ້ພົບປະແລກປ່ຽນກັບຜູ້ຜະລິດຮູບເງົາທີ່ໝຸ່ມແໜ້ນກວ່າ. ນັ້ນແມ່ນການຄົ້ນຫາເພື່ອໃຫ້ພວກເຮົາເຊື່ອມຕໍ່ກັບຜູ້ຊົມ ຜູ້ມີຄວາມຊົມຊອບຕໍ່ຮູບເງົາທີ່ງານມະຫາກຳນີ້”.

   ງານມະຫາກຳຮູບເງົາແມ່ນບ່ອນເຕົ້າໂຮມບັນດາຜູ້ເຮັດວຽກງານໃນຂະແໜງອຸດສາຫະກຳຮູບເງົາ. ງານມະຫາກຳຮູບເງົາສາມາດເຊື່ອມຕໍ່ບັນດາຜູ້ຜະລິດຮູບເງົາກັບບັນດາຜູ້ຈຳໜ່າຍ ຊ່ວຍໃຫ້ບັນດາຜູ້ຜະລິດຮູບເງົາຮັບຜົນປະໂຫຍດ ແລະ ມີໂອກາດລົງທຶນຄືນໃໝ່               

ນັກກຳກັບການສະແດງເພດຍິງ ຮ່າເລະຢ້ຽມ ກັບຮູບເງົາເອກະສານ “ພວກເດັກໃນທ່າມກາງນ້ຳໝອກກົ້ວ” ໄດ້ຮັບລາງວັນຜູ້ກຳກັບການສະແດງດີເດັ່ນທີ່ສຸດໃນລາຍການຍາດຊີງລາງວັນສາກົນທີ່ສະຫງວນໃຫ້ຮູບເງົາທຳອິດຜູ້ກຳກັບການສະແດງທີ່ງານມະຫາກຳສະແດງຮູບເງົາເອກະສານສາກົນ ອາມສະແຕັດດາມ 2021. ຈາກນັ້ນຮູບເງົາເອກະສານຂອງ ຮ່າເລະຢ້ຽມ ໄດ້ຖືກນຳມາສາຍຢູ່ຫຼາຍປະເທດໃນໂລກ. ຮ່າເລະຢ້ຽມ ເປີດເຜີຍວ່າ:

“ງານມະຫາກຳຮູບເງົາເອກະສານສາກົນ ອາມສະແຕັດດາມ ໄດ້ຊ່ວຍຂ້າພະເຈົ້າຫຼາຍທີ່ສຸດພາຍຫຼັງສາມປີ, ຮູບເງົາໄດ້ຖືກນຳມາສາຍຢູ່ທີ່ງານມະຫາກຳຮູບເງົາ ແລະ ໂຮງຮູບເງົາໃຫຍ່ຫຼາຍກວ່າ 200 ຄັ້ງ ຢູ່ອາເມລິກາ, ຝຣັ່ງ, ໄຕ້ຫວັນ, ປະເທດຈີນ ແລະ ສິງກາໂປ”.

 ຕາມທ່ານ ອານໂຕນີ ເຕແມນນີ ຜູ້ອຳນວຍການງານມະຫາກຳຮູບເງົາອາຊີຢູ່ ໂຣມ ປະເທດ ອີຕາລີ, ໃນ 10 ປີມໍ່ໆມານີ້, ຮູບເງົາ ຫວຽດນາມ ຫຼາຍເລື່ອງໄດ້ມີຄຸນນະພາບດີເນື້ອໃນກໍ່ດູດດື່ມ. ເປັນໜ້າສົນໃຈແມ່ນບັນດາຮູບເງົາພວມມີທ່າອ່ຽງຮ່ວມກັບບັນດາປະເທດອື່ນໃນພາກພື້ນທຳການຜະລິດ. ອາດຈະເວົ້າເຖິງຮູບເງົາເລື່ອງ “ຕົກໃສ່ປີກແມງກະເບື້ອງ” ຂອງຜູ້ກຳກັບການສະແດງ ເຢືອງຢ້ຽວລິງ ສົມທົບກັບນັກຜະລິດຮູບເງົາຊາວ ສິງກາໂປ. ການສົມທົບນີ້ໄດ້ນຳມາຊຶ່ງຜົນສຳເລັດຢ່າງໃຫຍ່ຫຼວງ ໃຫ້ແກ່ຮູບເງົາເລື່ອງນີ້ ເມື່ອໄດ້ຮັບລາງວັນທີ່ງານມະຫາກຳຮູບເງົາ ເວນິດ. ທ່ານ ອານໂຕນີ ເຕແມນນີ ຍັງຖືວ່າ ການຈັດຕັ້ງບັນດາງານມະຫາກຳຮູບເງົາສາກົນຍັງຈະຊ່ວຍໃຫ້ບັນດາຜູ້ຜະລິດຮູບເງົາ ຫວຽດນາມ ພັດທະນາດີຍິ່ງຂຶ້ນອີກ. ທ່ານໃຫ້ຮູ້ວ່າ:

 “ໃນມໍ່ໆມານີ້ ຫວຽດນາມ ໄດ້ມີບັນດາງານມະຫາກຳຮູບເງົາສາກົນ, ນີ້ກໍ່ແມ່ນສິ່ງທີ່ເປັນໜ້າຊື່ນຊົມ. ການກຳເນີດຂຶ້ນຂອງງານມະຫາກຳຮູບເງົາສາກົນນະຄອນໂຮ່ຈີມິນ ຫຼືງານມະຫາກຳຮູບເງົາອາຊີຢູ່ ດ່າໜັງ ກໍ່ແມ່ນບ່ອນພົບປະແລກປ່ຽນໃນຂົງເຂດຮູບເງົາທີ່ນຳມາຊຶ່ງຜົນປະໂຫຍດ”.

ນັກວິຈານຮູບເງົາ ເລຮົ່ງເລິມ ໃຫ້ຮູ້ວ່າ ບັນດາງານມະຫາກຳຮູບເງົາບໍ່ພຽງແຕ່ນຳຜົນປະໂຫຍດມາສູ່ບັນດາຜູ້ຜະລິດຮູບເງົາເທົ່ານັ້ນ ຍັງແມ່ນໂອກາດເພື່ອໃຫ້ມວນຊົນສາມາດເຂົ້າໃຈຫຼາຍກວ່າກ່ຽວກັບຮູບເງົາ ຫວຽດນາມ ກໍ່ຄືຮູບເງົາໂລກ. ທ່ານເວົ້າວ່າ :

   “ການຈັດຕັ້ງບັນດາງານມະຫາກຳຮູບເງົາສາກົນແມ່ນສຳຄັນທີ່ສຸດ ເພາະວ່ານີ້ແມ່ນບ່ອນເພື່ອໃຫ້ບັນດາຜູ້ຜະລິດຮູບເງົາເອກະລາດ, ຜູ້ຜະລິດຮູບເງົາສິລະປະມີໂອກາດພັດທະນາ ຜ່ານນັ້ນກໍ່ຍົກສູງຖານະບົດບາດໃຫ້ແກ່ບັນດາຜູ້ຜະລິດຮູບເງົາ ນີ້ກໍ່ຍັງແມ່ນໂອກາດເພື່ອໃຫ້ຜູ້ຜະລິດຮູບເງົາໜຸ່ມຊອກຫາແຫຼ່ງຄ່າໃຊ້ຈ່າຍໃຫ້ແກ່ບັນດາໂຄງການຜະລິດຮູບເງົາຂອງຕົນ”.