(vovworld)-ເຄື່ອງປັ້ນດິນເຜົາ ຈູເດົ້າ ຢູ່ ເມືອງ ນາມແຊກ ແຂວງ ຫາຍເຢືອງ ແມ່ນປະເພດ ເຄື່ອງປັ້ນດິນເຜົາທີ່ມີຊື່ສຽງໃນປະຫວັດສາດ ຫວຽດນາມ ມີມາໃນລະຫວ່າງສັດຕະວັດທີ 13-14 ແລະ ພັດທະນາແຮງທີ່ສຸດໃນລະຫວ່າງສັດຕະວັດທີ 15 – 16 ແຕ່ມາຮອດສັດຕະວັດທີ 17 ເຄື່ອງປັ້ນດິນເຜົາ ຈູເດົ້າ ຖືກສູນເສຍໄປເກືອບທັງໝົດ. ມີໄລຍະເຕັກໂນໂລຊີຜະລິດ ເຄື່ອງປັ້ນດິນເຜົາ, ດິນເຜົາເຄືອບຂອງ ຈູເດົ້າ ໄດ້ກາຍເປັນສິ່ງເລິກລັບສຳລັບວົງການນັກວິທະຍາສາດກໍຄືບັນດາຜູ້ຜະລິດ ເຄື່ອງປັ້ນດິນເຜົາ. ເຖິງຢ່າງໃດກໍຕາມ, ຜ່ານການຄົ້ນຄ້ວາ, ບູຮານຄະດີຢູ່ບ້ານ ຈູເດົ້າ ພ້ອມກັບບັນດາປ່ຽງ ເຄື່ອງປັ້ນດິນເຜົາບູຮານທີ່ຊອກໄດ້ຢູ່ກຳປັ່ນຖືກຈົ່ມນ້ຳຢູ່ ກູລາວຈາມ ແຂວງ ກວ໋າງນາມ ໄດ້ຢືນຢັນຢ່າງແນວແນ່ກ່ຽວກັບຄວາມຈະເລີນຮຸ່ງເຮືອງຂອງ ຈູເດົ້າ, ສິ່ງຍອດຍິ່ງຂອງປະເພດເຄື່ອງປັ້ນດິນເຜົາຫວຽດນາມ. ບົດຂຽນ “ຄຸນຄ່າປະຫວັດສາດຂອງ ເຄື່ອງປັ້ນດິນເຜົາ ຈູເດົ້າ ຜ່ານບັນດາວັດຖຸພັນບູຮານຄະດີ”ຂອງນັກຂ່າວ ດັ້ງແຫ້ງ.
ຫ້ອງວາງສະແດງເຄື່ອງປັ້ນດິນເຜົາຈູເດົ້າ
ພາບ:xaluan.com
|
ໃນບໍລິເວນຂຸມທີ່ຖືກຊອກຄົ້ນດ້ວຍເນື້ອທີ່ເກືອບ 100 ຕາແມັດ ຢູ່ ບ້ານ ຈູເດົ້າ ຕາແສງ ທາຍເຕີນ ເມືອງ ນາມແຊກ ແຂວງ ຫາຍເຢືອງ, ບັນດານັກວິທະຍາສາດ, ນັກຄົ້ນຄ້ວາກ່ຽວກັບ ເຄື່ອງປັ້ນດິນເຜົາ ຊອກໄດ້ປ່ຽງເຄື່ອງປັ້ນດິນເຜົາແຕກຈຳນວນຫນຶ່ງຢູ່ໃຕ້ດິນນັບຮ້ອຍໆປີແລ້ວ.ຮອງສາດສະດາຈານ, ດຣ ບູ່ຍມີງຈີ, ຜູ້ອຳນວຍການສູນຄົ້ນຄ້ວາກ່ຽວກັບເມືອງຫລວງທັງລອງ ໄດ້ແບ່ງປັນວ່າ: 30 ກວ່າປີ ນັບແຕ່ເມື່ອຮ່ອງຮອຍທຳອິດຂອງປະເພດ ເຄື່ອງປັ້ນດິນເຜົາ ຈູເດົ້າໄດ້ຄົ້ນພົບ, ຜ່ານການຊອກຄົ້ນ 6 ຄັ້ງ, ຮອດຄັ້ງທີ 7 ນີ້ແມ່ນມີຄຸນຄ່າຫລາຍສຸດຄື: ກ່ຽວກັບຂອບຂະຫນາດ, ການລົງທຶນ ແລະ ໝາກຜົນບັນລຸໄດ້.
“ພວກຂ້າພະເຈົ້າຊອກເຫັນ ເຄື່ອງປັ້ນດິນເຜົາຄ້າຍຄືກັນກັບ ເຄື່ອງປັ້ນດິນເຜົາ ຊອກໄດ້ຢູ່ພະລາດຊະວັງທັງລອງ. ສິ່ງດັ່ງກ່າວແມ່ນສະແດງໃຫ້ເຫັນສາຍກ່ຽວພັນຂອງ ເຄື່ອງປັ້ນດິນເຜົາ ຈູເດົ້າ ແລະ ພະລາດຊະວັງທັງລອງຢ່າງຈະແຈ້ງທີ່ສຸດ.ຈຸດປະສົງຂອງພວກຂ້າພະເຈົ້າໃນການຄົ້ນຄ້ວາ, ປຽບທຽບຄຸນຄ່າຂອງພະລາດຊະວັງທັງລອງກໍຄືຕີລາຄາບົດບາດຂອງ ເຄື່ອງປັ້ນດິນເຜົາ ຈູເດົ້າໃນປະຫວັດສາດໄດ້ປະສົບຜົນສຳເລັດແລ້ວ. ບໍ່ທັນມີເວລາໃດການຊອກຄົ້ນກ່ຽວກັບບັນດາສູນຜະລິດ ເຄື່ອງປັ້ນດິນເຜົາໄດ້ຮັບໝາກຜົນຄົບຖ້ວນຄືຄັ້ງນີ້, ຈາກເຕົາເຜົາຕະຫລອດຮອດຂັ້ນຕອນການຜະລິດຕ່າງໆ. ບັນດານາຍຊ່າງຜະລິດ ເຄື່ອງປັ້ນດິນເຜົາ ຈູເດົ້າ ມີສີມືຄ່ອງແຄ້ວ, ມີຄວາມເກັ່ງກ້າໃນການຜະລິດ. ສະນັ້ນ ມີເຄື່ອງປັ້ນດິນເຜົາ ຈູເດົ້າບາງຢ່າງອາດຈະທັດທຽມກັບ ເຄື່ອງປັ້ນດິນເຜົາ ຂອງຈີນ.”
ນັບແຕ່ປີ 2003,ໂລກ ມີຄວາມສົນໃຈກ່ຽວກັບຄຸນຄ່າວັດທະນະທຳທີ່ເປັນເອກະລັກສະເພາະຂອງ ເຄື່ອງປັ້ນດິນເຜົາປະເພດນີ້ກວ່າ, ເມື່ອບັນດານັກວິທະຍາສາດຊອກຄົ້ນໄດ້ຜະລິດຕະພັນ ເຄື່ອງປັ້ນດິນເຜົາປະມານ 40.000 ຢ່າງຈາກກຳປັ່ນຈົ່ມນ້ຳຢູ່ ກູລາວຈາມ ແຂວງ ກວ໋າງນາມ. ບັນດານັກວິທະຍາສາດໄດ້ຢັ້ງຢືນຄວາມຈະເລີນຮຸ່ງເຮືອງຂອງ ເຄື່ອງປັ້ນດິນເຜົາ ຈູເດົ້າ ອອກໄປສູ່ຕ່າງປະເທດ, ກາຍເປັນຜະລິດຕະພັນສົ່ງອອກໄປຍັງຫລາຍປະເທດໃນໂລກ. ເຖິງຢ່າງໃດກໍຕາມ, ຍ້ອນບໍ່ທັນມີຮູບແບບຜະລິດຕະພັນຢ່າງພຽງພໍ ສະນັ້ນໃນໄລຍະນັ້ນ ບໍ່ທັນມີນັກວິທະຍາສາດໃດຄິດເຖິງສາຍກ່ຽວພັນລະຫວ່າງຜະລິດຕະພັນໝູ່ບ້ານອາຊີບກັບບັນດາເຄື່ອງຂອງທີ່ຊອກເຫັນໄດ້ຢູ່ພະລາດຊະວັງທັງລອງ. ການຊອກຄົ້ນຄັ້ງນີ້ໄດ້ພົບເຫັນຮາກຖານຜະລິດແຫ່ງຫນຶ່ງດ້ວຍ ເຄື່ອງປັ້ນດິນເຜົານັບຮ້ອຍຢ່າງຄ້າຍຄືກັນກັບບັນດາວັດຖຸພັນທີ່ຊອກໄດ້ຢູ່ພະລາດຊະວັງທັງລອງ. ຮອງສາດສະດາຈານ, ດຣ ໂຮ່ວັນກວານ, ໃຫ້ຮູ້ວ່າ: ກ່ອນນີ້ ບັນດາວັດຖຸພັນບູຮານ ເຄື່ອງປັ້ນດິນເຜົາເຄືອບ ຊອກໄດ້ຢູ່ພະລາດຊະວັງທັງລອງເຄີຍຖືກຫລົງກັບເຄື່ອງປັ້ນດິນເຜົາຂອງຈີນ, ແຕ່ຜ່ານບັນດາວັດຖຸພັນທີ່ຊອກຄົ້ນໄດ້, ບັນດານັກວິທະຍາສາດໄດ້ພິສູດໃຫ້ເຫັນວ່າ ນັ້ນແມ່ນບັນດາຜະລິດຕະພັນຂອງ ເຄື່ອງປັ້ນດິນເຜົາ ຈູເດົ້າ. ສິ່ງດັ່ງກ່າວໄດ້ພິສູດໃຫ້ເຫັນການພົວພັນດ້ານວັດທະນະທຳລະຫວ່າງສອງປະເທດບ້ານໃກ້ເຮືອນຄຽງ ພ້ອມທັງຢືນຢັນນັກສິລະປະການ ເຄື່ອງປັ້ນດິນເຜົາ ຫວຽດນາມ ສາມາດເປັນເຈົ້າໃນການຜະລິດ ເຄື່ອງປັ້ນດິນເຜົາທີ່ເປັນເອກະລັກສະເພາະຂອງຊາດ.
ນັກຄົ້ນຄ້ວາບູຮານຄະດີພວມຊອກຄົ້ນເຄື່ອງປັ້ນດິນເຜົ່າຈູເດົ້າ
ພາບ:giaoduc.net
|
ເຄື່ອງປັ້ນດິນເຜົາເຄືອບ ແມ່ນຈຸດພິເສດສະເພາະຂອງ ເຄື່ອງປັ້ນດິນເຜົາ ຈູເດົ້າ ຍ້ອນເຕັກນິກ, ສີມື ກໍຄືວິທີການຜະລິດຂອງນາຍຊ່າງຢູ່ທີ່ນີ້ແມ່ນເກັ່ງກ້າທີ່ສຸດ. ທ່ານ ຕັງບາຮວ່າງ, ອະດີດຜູ້ອຳນວຍການຫໍພິພິດຕະພັນ ຫາຍເຢືອງ ແບ່ງປັນວ່າ: ຜ່ານ ການຊອກຄົ້ນຄັ້ງຕ່າງໆ ບັນດານັກຄົ້ນຄ້ວາ ບູຮານຄະດີ ຊອກຄົ້ນໄດ້ວັດຖຸພັນ ເຄື່ອງປັ້ນດິນເຄືອບ ເປັນການສະແດງໃຫ້ເຫັນການພັດທະນາຢ່າງແຮງຂອງປະເພດ ເຄື່ອງປັ້ນດິນເຜົາຈູເດົ້າ.
“ການຊອກຄົ້ນຢູ່ ຈູເດົ້າ ແມ່ນລ້ຳຄ່າທີ່ສຸດ. ບັນດາວັດຖຸພັນນີ້ໄດ້ພິສູດໃຫ້ເຫັນບັນດາຜະລິດຕະພັນ ເຄື່ອງປັ້ນດິນເຜົາທີ່ມີຄ່າ ພວມໄດ້ຮັບການວາງສະແດງຢູ່ບັນດາຫໍພິພິດຕະພັນໃນໂລກ ນັ້ນແມ່ນໄດ້ຮັບການຜະລິດຢູ່ຫວຽດນາມ ໂດຍສະເພາະແມ່ນຢູ່ ຈູເດົ້າ.”
ຕາມການຄາດຄະເນ ທົ່ວບໍລິເວນທີ່ໄດ້ຄົ້ນພົບຈະໄດ້ຮັບການສ້າງຕັ້ງເປັນຫໍພິພິດຕະພັນກາງແຈ້ງເພື່ອຮັບໃຊ້ຄວາມຕ້ອງການຊອກຮູ້ກ່ຽວກັບ ເຄື່ອງປັ້ນດິນເຜົາ ຈູເດົ້າ ໃຫ້ແກ່ວົງການນັກວິທະຍາສາດ ແລະ ນັກທ່ອງທ່ຽວຢູ່ພາຍໃນປະເທດ ແລະ ຕ່າງປະເທດ. ທ່ານ ຫວູດີງຕຽນ, ຜູ້ອຳນວຍການຫໍພິພິດຕະພັນ ຫາຍເຢືອງ ໃຫ້ຮູ້ວ່າ:
“ພາຍຫລັງຊອກຄົ້ນ ແລະ ລາຍງານຕໍ່ກະຊວງວັດທະນະທຳ ກິລາ ແລະ ທ່ອງທ່ຽວ, ພວກຂ້າພະເຈົ້າໄດ້ອະນຸລັກຮັກສາຖືກຕ້ອງຕາມຂໍ້ກຳນົດ ດ້ວຍວິທີຖົມດິນ, ຖົມຂີ້ຊາຍ. ເມື່ອມີເງື່ອນໄຂ ພວກຂ້າພະເຈົ້າຈະສ້າງແຜນການກໍ່ສ້າງຫໍພິພິດຕະພັນຢູ່ກັບທີ່ໃນບໍລິເວນຊອກຄົ້ນ.”
ຜ່ານການຊອກຄົ້ນ ເຄື່ອງປັ້ນດິນເຜົາ ຈູເດົ້າ 7 ຄັ້ງ ໄດ້ສະຫນອງບັນດາຂໍ້ມູນທີ່ສຳຄັນກ່ຽວກັບການຜະລິດແລະ ພັດທະນາຂອງ ເຄື່ອງປັ້ນດິນເຜົາ ຈູເດົ້າ ແລະ ຢືນຢັນຄຸນຄ່າສິ່ງຍອດຍິ່ງຂອງປະເພດ ເຄື່ອງປັ້ນດິນເຜົາຫວຽດນາມ. ໝາກຜົນນີ້ ບໍ່ພຽງແຕ່ມີຄວາມໝາຍສຳຄັນໃນການຄົ້ນຄ້ວາກ່ຽວກັບຮ່ອງຮອຍ ເຄື່ອງປັ້ນດິນເຜົາ ຈູເດົ້າ ເທົ່ານັ້ນ ຫາກຍັງສຳລັບວຽກງານຄົ້ນຄ້ວາປຽບທຽບ, ຕີລາຄາຄຸນຄ່າ ແລະ ສ້າງສຳເນົາເອກະສານວິທະຍາສາດກ່ຽວກັບ ເຄື່ອງປັ້ນດິນເຜົາ ໃນສະໄຫມລາດຊະວົງ ເລ ປີ 1428 – 1527 ຂອງເຂດປູຊະນີຍະສະຖານພະລາດຊະວັງທັງລອງອີກດ້ວຍ. ຜ່ານໝາກຜົນແຫ່ງການຄົ້ນຄ້ວາບູຮານຄະດີ, ບັນດານັກວິທະຍາສາດ ຈະມີແຜນການລົງທຶນ, ຄົ້ນຄ້ວາ ເພື່ອເຮັດແຈ້ງຄຸນຄ່າດ້ານປະຫວັດສາດວັດທະນະທຳກ່ຽວກັບໝູ່ບ້ານ ເຄື່ອງປັ້ນດິນເຜົາ ຈູເດົ້າ, ຈາກນັ້ນ ມີຍຸດທະສາດວາງແຜນຜັງ, ອະນຸລັກຮັກສາ ແລະ ເສີມຂະຫຍາຍຄຸນຄ່າຂອງໝູ່ບ້ານຜະລິດເຄື່ອງປັ້ນດິນເຜົາ ພ້ອມທັງຕ້ອງໂຄສະນາເຜີຍແຜ່ຢ່າງກວ້າງຂວາງ ແລະ ເລິກເຊິ່ງ, ຊັດເຈນກ່ຽວກັບ ເຄື່ອງປັ້ນດິນເຜົາ ຈູເດົ້າອີກດ້ວຍ.