(vovworld)- ກ່ອນນີ້ ເມື່ອໂອກາດບຸນເຕັດວຽນມາ, ມີສິ່ງຫນຶ່ງທີ່ຂາດບໍ່ໄດ້ໃນບັນດາຄອບຄົວ ຫວຽດນາມ ນັ້ນແມ່ນພາບພື້ນເມືອງໃນບຸນເຕັດ. ພາບທີ່ປະດັບປະດາໃນໂອກາດບຸນເຕັດ ແມ່ນມຸ່ງໄປເຖິງມູນເຊື້ອ, ກົກເຄົ້າເຫງົ້າກໍ. ນອກຈາກການແຕ້ມລວດລາຍແລ້ວ, ພາບບຸນເຕັດແຕ່ລະແຜ່ນລ້ວນແຕ່ມີບັນດາຄຳອວຍພອນປີໃຫມ່ ຫລື ບັນດາຄຳພະຫຍາພາວະນາສິ່ງທີ່ດີງາມໃນປີໃຫມ່. ໃນໄລຍະຜ່ານມາ, ຄວາມນິຍົມ ພາບພື້ນເມືອງໃນບຸນເຕັດກໍ່ຖືກສູນຫາຍໄປໃນໄລຍະຫນຶ່ງ. ເຖິງວ່າ ປະຈຸບັນ ເມື່ອຊີວິດໄດ້ຮັບການຍົກສູງຂຶ້ນ, ຄວາມຕ້ອງການຊົມໃຊ້ສິລະປະກໍ່ເພີ່ມຂຶ້ນ, ຄວາມນິຍົມພາບພື້ນເມືອງໃນຊຸມມື້ບຸນເຕັດກໍ່ຄ່ອຍໆກັບຄືນມາ.
ພາບພື້ນເມືອງ ດົງໂຮ່
|
ກ່ອນນີ້, ເມື່ອໄປຊື້ເຄື່ອງຂອງຮັບໃຊ້ບຸນເຕັດ, ຊາວຫວຽດນາມ ບໍ່ລືມຊື້ພາບພື້ນເມືອງເພື່ອປະດັບປະດາໃນເຮືອນ. ບັນດາພາບພື້ນເມືອງນັ້ນ ສ່ວນຫລາຍແມ່ນ ແຕ້ມກ່ຽວກັບຮູບພາບການດຳເນີນຊີວິດໃນຄອບຄົວທີ່ອົບອຸ່ມ, ຫລືທິວທັດທຳມະຊາດສວຍສົດງົດງາມ, ສັດສາວາສິ່ງທີ່ເປັນຕາຮັກ … ເຊິ່ງສະແດງໃຫ້ເຫັນຄວາມມຸ່ງຫວັງກ່ຽວກັບປີໃຫມ່ທີ່ສະຫງົບສຸກ. ແຕ່ ຕາມການເວລາ, ບັນດາປະເພດພາບພື້ນເມືອງຄ່ອຍໆຈາງຫາຍໄປ. ຈິດຕະກອນ ຫງວຽນຮົ່ງເວີນ ຫວນຄືນຄາວຍັງນ້ອຍເຄີຍໄດ້ໄປຊົມພາບພື້ນເມືອງກັບພໍ່ຢູ່ຖະຫນົນ ຮ່າງເລືອກ, ຖະຫນົນ ໝ໋າໄມ ຮ່າໂນ້ຍ. ບັນດາລາສີທີ່ຫນ້າຮັກ, ພາບພື້ນເມືອງດົງໂຮ່, ພາບພື້ນເມືອງຮ່າງຈົງ ຄືດັ່ງຂອງຂວັນລວມໃຫ້ແກ່ທັງຄອບຄົວເມື່ອບຸນເຕັດລະດູບານໃຫມ່ວຽນມາ.
“ເມື່ອພໍ່ພາໄປຊົມພາບພື້ນເມືອງໃນໂອກາດບຸນເຕັດ ບັນຍາກາດແມ່ນຄຶກຄື້ນທີ່ສຸດ. ໃນຄາວນັ້ນ ຢູ່ຖະຫນົນ ຮ່າງເລືອກ, ຢູ່ສອງຟາກທາງມີຊ່າງແກະຄວັດສະຫລັກຮູບພາບ, ນັກແຕ້ມຕົວຫນັງສື, ແຕ້ມພາບພື້ນເມືອງຫລາຍຄົນ, ເປັນຕົ້ນຢູ່ຖະຫນົນຮ່າງເລືອກ.”
ພາບພື້ນເມືອງຊາວຫວຽດນາມ ນິຍົມໃຊ້ໃນໂອກາດບຸນເຕັດ
|
ປຽບເໝືອນດັ່ງວິທີທີ່ເຮັດໃຫ້ຄວາມຊີນເຄີຍນຳໃຊ້ພາບພື້ນເມືອງກັບຄືນມາໃນໂອກາດບຸນເຕັດ, ສອງສາມປີມານີ້ ມີຈິດຕະກອນຫລາຍຄົນໄດ້ເປີດຕະຫລາດແຕ້ມພາບໃນໂອກາດບຸນເຕັດ ດ້ວຍການວາງຂາຍຜະລິດຕະພັນຈິດຕະກຳນັບຮ້ອຍໆແຜ່ນ. ໂດຍເລີ່ມຕົ້ນຈາກການຄັດເລືອກຫົວເລື່ອງໃຫ້ຜະລິດຕະພັນ, ຮຽກຮ້ອງຈິດຕະກອນໃນທົ່ວປະເທດເຂົ້າຮ່ວມ ຕະຫລອດຮອດວິທີປະດັບປະດາ, ວາງສະແດງ, ບໍລິເວນຕະຫລາດພາບພື້ນເມືອງໃນໂອກາດບຸນເຕັດ ກ່ອນອື່ນໝົດແມ່ນບ່ອນເພື່ອໃຫ້ຜູ້ນິຍົມໄດ້ຮັບຊົມພາບແຕ້ມ ຫລັງຈາກນັ້ນແມ່ນບ່ອນຊື້ຂາຍພາບແຕ້ມ. ຈິດຕະກອນ ເຈີນທິທູ, ແມ່ນຫນຶ່ງໃນຈິດຕະກອນ 200 ກວ່າຄົນທີ່ເຂົ້າຮ່ວມງານວາງສະແດງພາບພື້ນເມືອງໄດ້ແບ່ງປັນວ່າ:
“ການຈັດຕັ້ງຕະຫລາດພາບພື້ນເມືອງນີ້ມ່ວນຫລາຍ ແລະ ມີຄວາມອົບອຸ່ນທີ່ສຸດ. ຂ້າພະເຈົ້າເຊື່ອໝັ້ນວ່າ ຕະຫລາດນີ້ຈະນຳມາເຊິ່ງບັນຍາກາດໃຫມ່ໃຫ້ຂະແຫນງຈິດຕະກຳຫວຽດນາມ”
 |
ອາດເວົ້າໄດ້ວ່າ ບໍ່ມີເທົ່າໃດຄົນຄິດເຖິງຕະຫລາດພາບພື້ນເມືອງໃນໂອກາດບຸນເຕັດຄື: ເຕັດ Art ແລະ ເຕັດ Dome ທີ່ຫາກໍ່ດຳເນີນໄປຢູ່ ຮ່າໂນ້ຍ ແມ່ນທິດທາງໃຫມ່ ເພື່ອໃຫ້ບັນດາຈິດຕະກອນໃກ້ຊິດຕິດແທດກັບສາທາລະນະຊົນກວ່າ. ເຂົາເຈົ້າພວມເຮັດໃຫ້ຄວາມຊີນເຄີຍນິຍົມພາບພື້ນເມືອງໃນໂອກາດບຸນເຕັດຂອງຊາວຫວຽດນາມ ໃນເມື່ອກ່ອນກັບຄືນມາ. ແຕ່ວ່າ ພາບແຕ້ມປະຈຸບັນມີຄວາມອຸດົມສົມບູນກວ່າ. ບໍ່ພຽງແຕ່ແມ່ນພາບພື້ນເມືອງເທົ່ານັ້ນ ຫາກຍັງແມ່ນບັນດາຜະລິດຕະພັນຈິດຕະກຳທີ່ເຕັມໄປດ້ວຍສີສັນຂອງຈິດຕະກອນ. ບັນດາຕະຫລາດນັດພາບບຸນເຕັດຍຸກປະຈຸບັນ ກໍ່ປ່ຽນແປງຄວາມນຶກຄິດຂອງທຸກຄົນວ່າ ຄວາມນິຍົມຊື້ພາບບຸນເຕັດບໍ່ພຽງແຕ່ສະຫງວນໃຫ້ແກ່ຜູ້ຮັ່ງມີເທົ່ານັ້ນ. ຕາມທ່ານ ເຈີນຮູຍແອງ, ຜູ້ນິຍົມພາບພື້ນເມືອງໃນໂອກາດບຸນເຕັດ ຢູ່ ຮ່າໂນ້ຍ ແລ້ວ, ຕະຫລາດພາບພື້ນເມືອງໃນໂອກາດບຸນເຕັດຍຸກປະຈຸບັນ ບໍ່ພຽງແຕ່ເປັນການຫວນຄືນເຖິງຄວາມຊົງຈຳໃນເມື່ອກ່ອນດ້ວຍຄວາມຊີນເຄີຍ, ຮີດຄອງປະເພນີອັນດີງາມຂອງຄົນລຸ້ນກ່ອນເທົ່ານັ້ນ ຫາກຍັງເຮັດໃຫ້ຄຸນຄ່າສິລະປະໄດ້ເພີ່ມຂຶ້ນທົບສອງເທົ່າ ດ້ວຍເຂດວັດທະນະທຳທັນສະໄຫມ ເພື່ອໃຫ້ຜູ້ຊົມໄດ້ຊົມບັນດາຜະລິດຕະພັນໃຫມ່ ດ້ວຍວິທີການໃຫມ່.
ຕາມຈິດຕະກອນ ແທ່ງເຈືອງແລ້ວ, ປະຈຸບັນສິ່ງທີ່ພວກເຮົາຄວນເຮັດນັ້ນແມ່ນ ຮັກສາບັນດາຄຸນຄ່າດ້ານຈິດໃຈຫລັກແຫລ່ງຂອງຄວາມຊີນເຄີຍໃນການຊື້ເຄື່ອງຂອງຮັບໃຊ້ບຸນເຕັດ. ບຸນເຕັດບໍ່ພຽງແຕ່ແມ່ນໂອກາດຊື້ເຄື່ອງຂອງທີ່ຈຳເປັນເທົ່ານັ້ນ ຫາກຍັງໄດ້ເຮັດໃຫ້ຄຸນຄ່າດ້ານຈິດໃຈວັດທະນະທຳກັບຄືນມາອີກດ້ວຍ, ໃນນັ້ນ ມີບັນດາຜະລິດຕະພັນຈິດຕະກຳ.
“ຂ້າພະເຈົ້າຍາມໃດກໍຄິດວ່າຄຸນຄ່າທີ່ເປັນມູນເຊື້ອວັດທະນະທຳຂອງຕົນແມ່ນຮັກສາຈິດໃຈຫລັກແຫລ່ງໄດ້ ຫາກບໍ່ແມ່ນຮັກສາຮູບການເຄື່ອນໄຫວຂອງມັນ. ບໍ່ມີຕະຫລາດບ້ານນາເພື່ອຊື້ພາບພື້ນເມືອງ, ພາບດົງໂຮ່, ພາບບ້ານຊີ່ງ. ປະຈຸບັນ ພວກເຮົາຕ້ອງມີຄວາມຮັບຮູ້ແບບທັນສະໄຫມ, ກ້າວຫນ້າກວ່າ. ຮັກສາມູນເຊື້ອວັດທະນະທຳ ແມ່ນຮັກສາດ້ານຈິດໃຈ.”
ຄວາມນິຍົມພາບໃນໂອກາດບຸນເຕັດ ເຖິງວ່າແມ່ນພາບພື້ນເມືອງ ຫລື ພາບທັນສະໄຫມ ກໍລ້ວນແຕ່ສະແດງໃຫ້ເຫັນຄວາມເຄົາລົບຂອງມະນຸດຕໍ່ສິ່ງທີ່ດີງາມພ້ອມກັບຄວາມມຸ້ງຫວັງໃນປີໃຫມ່. ໃນສັງຄົມທັນສະໄຫມ, ບັນດາຈິດຕະກອນຫວຽດນາມ ຍັງຄົງປະດິດສ້າງບັນດາຜະລິດຕະພັນຂອງຕົນດ້ວຍຄວາມໝາຍຟື້ນຟູຂົງເຂດພາບພື້ນເມືອງກັບຄືນມາໃນໂອກາດບຸນເຕັດ. ນີ້ກໍແມ່ນວິທີອີງໃສ່ມູນເຊື້ອເພື່ອກ້າວໄປເຖິງບັນດາຄາດໝາຍ ຍາວນານກວ່າໃຫ້ແກ່ສິລະປະພາບພື້ນເມືອງຫວຽດນາມ ໃນໂອກາດບຸນເຕັດ.