ແຂກມາຢ້ຽມຊົມວັດຖຸພັນຕ່າງໆທີ່ງານວາງສະແດງ
(ພາບ: baomoi.com)
|
ງານວາງສະແດງຫົວເລື່ອງ “ມໍລະດົກວັດທະນະທຳທະເລຫວຽດນາມ” ຫາກໍຖືກໄຂຂຶ້ນຢູ່ຫໍພິພິທະພັນ ປະຫວັດສາດຫວຽດນາມ ທີ່ຮ່າໂນ້ຍ ແຕ່ວັນທີ 18 ຫາວັນທີ 31/5. ດ້ວຍເອກະສານ, ວັດຖຸພັນທີ່ມີຄຸນຄ່າກວ່າ 300 ຢ່າງ, ງານວາງສະແດງ ແມ່ນພະຍານຫຼັກຖານທີ່ມີຊີວິດຊີວາກ່ຽວກັບການປະກອບສ່ວນສຳຄັນໃນປະຫວັດຄວາມເປັນມາ ແລະ ການເຄື່ອນໄຫວຂອງລະບົບແລກປ່ຽນຄ້າຂາຍທາງທະເລສາກົນຂອງຫວຽດນາມ, ພ້ອມກັນນັ້ນ, ງານວາງສະແດງຍັງເປັນສານ ຢັ້ງຢືນອະທິປະໄຕ ເຂດທະເລ, ໝູ່ເກາະຂອງປະເທດຊາດ. ນັກຂ່າວ ວິ້ງຟອງ ມີ ບົດສ່ອງແສງເຖິງເຫດການນີ້ມາສະເໜີສູ່ທ່ານຟັງ.
ທະເລຕາເວັນອອກຍາມໃດກໍມີບົດບາດເປັນຂົວເຊື່ອມຕໍ່ຄວາມສິວິໄລ, ແມ່ນສູນທາງຜ່ານທີ່ສຳຄັນໃນເສັ້ນທາງທະເລກ່ຽວກັບການແລກປ່ຽນວັດທະນະທຳ ແລະ ການຄ້າສາກົນລະຫວ່າງຝ່າຍຕາເວັນອອກກັບຝ່າຍຕາເວັນຕົກ, ລະຫວ່າງມະຫາສະໝຸດປາຊີຟິກກັບ ມະຫາສະໝຸດອິນເດຍ, ລະຫວ່າງທະວີບອາຊີກັບທະວີບເອີລົບ ແລະ ອາຟະລິກາຕາເວັນອອກ, ອາຟະລິກາເໜືອ, ລະຫວ່າງຫວຽດນາມກັບບັນດາປະເທດໃນພາກພື້ນ ແລະ ໃນໂລກ. ໃນ 2,3 ສະຕະວັດມໍ່ມານີ້, ໄດ້ມີຫຼາຍກິດຈະກຳຄົ້ນຄ້ວາຂອງບັນດານັກຮຽນຮູ້ທັງຢູ່ພາຍໃນ ແລະ ຕ່າງປະເທດກ່ຽວກັບປະຫວັດຄວາມເປັນມາ ແລະ ການເຄື່ອນໄຫວຂອງເສັ້ນທາງທະເລທີ່ສຳຄັນນີ້ເວົ້າລວມ ແລະ ທີ່ຕັ້ງບົດບາດຂອງທະເລຕາເວັນອອກ ກໍຄືບັນດານະຄອນ, ທ່າກຳປັ່ນຫວຽດນາມທີ່ມີຕໍ່ເສັ້ນທາງການຄ້າທາງທະເລນີ້ເວົ້າສະເພາະ; ກ່ຽວກັບສາຍກ່ຽວພັນລະຫວ່າງຫວຽດນາມກັບບັນດາພື້ນຖານວັດທະນະທຳສິວິໄລຢູ່ລຽບຕາມເສັ້ນທາງການຄ້າທາງທະເລນີ້; ກ່ຽວກັບຂະບວນວິວັດແຫ່ງການຊອກຄົ້ນຫາ, ຂຸດຄົ້ນເສດຖະກິດທະເລ ແລະ ປະຕິບັດອະທິປະໄຕເຂດນານທະເລຂອງຊາດຫວຽດນາມ. ຈາກຄວາມຈິງດັ່ງກ່າວ, ຫໍພິພິ ທະພັນປະຫວັດສາດຫວຽດນາມ ໄດ້ວາງສະແດງກ່ຽວກັບມໍລະດົກວັດທະນະທຳທະເລຫວຽດນາມຜ່ານ 3 ພາກສ່ວນຄື: ມໍລະດົກວັດທະນະທຳທະເລຫວຽດນາມແຕ່ສະໄໝປະຖົມບູຮານຫາສະຕະວັດທີ່ 10; ແຕ່ສະຕະວັດທີ່ 11 ຫາສະຕະວັດທີ່ 18; ແຕ່ສະຕະວັດທີ່ 19 ຫາຍຸກທັນສະໄໝ, ແນໃສ່ຮັບໃຊ້ວົງການນັກຮຽນຮູ້, ແຂກທ່ອງທ່ຽວທັງຢູ່ພາຍໃນ ແລະ ຕ່າງປະເທດມາຢ້ຽມຊົມ, ທັດສະນະສຶກສາ. ທ່ານ Nguyen Van Cuong ຜູ້ອຳນວຍການ ຫໍພິພິທະພັນປະຫວັດສາດຫວຽດ ນາມ ໃຫ້ຮູ້ວ່າ :
“ ພວກຂ້າພະເຈົ້າຢາກສົ່ງສານສະບັບໜຶ່ງດ້ວຍການວາງສະແດງເອກະສານວັດຖຸພັນໃນຫໍພິພິທະພັນເຖິງຊາວຫວຽດນາມ, ເພື່ອນມິດສາກົນທຸກໆຄົນກ່ຽວກັບຄວາມຮັກທະເລ, ຄວາມຮັກປະເທດຊາດຫວຽດນາມ, ກ່ຽວກັບອະທິປະໄຕເຂດທະເລ, ໝູ່ເກາະ,ດິນຕໍ່ແຜ່ນຂອງປະເທດຫວຽດນາມເອກະລາດເອກະພາບ. ຜ່ານບັນດາການເຄື່ອນໄຫວທີ່ມີຄວາມໝາຍເຊັ່ນນີ້ ຊຶ່ງກົງກັບໂອກາດວັນຄ້າຍວັນເກີດຂອງລຸງໂຮ່ ແລະ ວັນສ້າງຕັ້ງຫໍພິພິທະພັນ, ພວກຂ້າພະເຈົ້າຢາກໃຫ້ທຸກໆຄົນລ້ວນແຕ່ມີສະຕິ, ການກະທຳລະອຽດຕໍ່ວັນປະຫວັດສາດນີ້ ”
ບັນດາເອກະສານ, ຮູບພາບ, ວັດຖຸພັນທີ່ມີຄຸນຄ່າທີ່ງານວາງສະແດງຫົວເລື່ອງ “ມໍລະດົກວັດທະນະທຳທະເລຫວຽດນາມ” ແມ່ນບັນດາພະຍານຫຼັກຖານພິສູດໃຫ້ ເຫັນວ່າ ປະເທດຫວຽດນາມໄດ້ມີການເຄື່ອນໄຫວທາງທະເລຢ່າງແຂງແຮງ ແລະ ມີການປະກອບສ່ວນສຳຄັນເຂົ້າໃນປະຫວັດຄວາມເປັນມາ ແລະ ການເຄື່ອນໄຫວຂອງລະບົບແລກປ່ຽນຄ້າຂາຍທາງທະເລສາກົນ. ພ້ອມກັນນັ້ນ ກໍຍັງເປັນ ສານສຳຄັນກ່ຽວກັບອະທິປະໄຕຂອງຫວຽດນາມທີ່ມີມາແຕ່ດົນນານ ແລະ ເນືອງນິດລຽນຕິດທີ່ມີຕໍ່ເຂດນານທະເລ ແລະ 2 ໝູ່ເກາະ ຮ່ວາງຊາ ແລະ ເຈືອງຊາ ທີ່ບໍ່ອາດຕັດແຍກອອກຈາກຜືນແຜ່ນດິນຫວຽດນາມ. ໂດຍຜ່ານບັນດາ ເອກະສານ, ວັດຖຸພັນ, ບັນດາຮ່ອງຮອຍສະຖານຢູ່ຫ້າລອງ, ກີງວັນ, ບ້ານອົກ ໃນເກາະ ຫຼີເຊີນນັ້ນ, ໄດ້ສ່ອງແສງເຖິງການແລກປ່ຽນວັດທະນະທຳລະຫວ່າງບັນດາກຸ່ມຊົນຢູ່ດິນຕໍ່ແຜ່ນກັບໝູ່ເກາະ.... ແລະ ທັງສະແດງໃຫ້ເຫັນບັນດາກຸ່ມຊົນຢູ່ນີ້ໄດ້ມີການພົວພັນແລກປ່ຽນກັບບັນດາກຸ່ມຊົນຢູ່ພາກໃຕ້ຈອງຈີນ, ຟີລິບປິນ.... ນອກຈາກນັ້ນ, ງານວາງສະແດງຍັງແນະນຳບັນດາຮູບພາບກ່ຽວກັບບັນດານະຄອນ, ທ່າກຳປັ່ນທີ່ມີການຄ້າຂາຍຢ່າງຟົດຟື້ນຈາດພາກເໜືອລົງຮອດພາກໃຕ້ຫວຽດນາມ ແລະໄດ້ມີການປະກອບສ່ວນສຳຄັນເຂົ້າໃນຂະບວນວິວັດແຫ່ງການເປັນຮູບປະທຳ ແລະ ຂະຫຍາຍຕົວຂອງເສັ້ນທາງການຄ້າທາງທະເລນີ້. ທ່ານ Tran Trong Ha ຜູ້ອຳນວຍການ ຫໍພິພິທະພັນແຂວງ ກວາງນິງໃຫ້ຮູ້ວ່າ ຫໍພິພິທະພັນແຂວງ ກວາງນິງ ໄດ້ນຳວັດຖຸພັນທີ່ມີຄຸນຄ່າ 47 ຊິ້ນມາປະກອບ ສ່ວນໃນການວາງສະແດງ ເພື່ອຊ່ວຍຜູ້ຊົມເຫັນແຈ້ງກ່ຽວກັບຄວາມສຳຄັນຂອງທ່າກຳປັ່ນຮັບໃຊ້ການຄ້າຂອງຫວຽດນາມທີ່ມີຕໍ່ການເດີນທະເລສາກົນເມື່ອກ່ອນນີ້. ທ່ານ Tran Trong Ha ເວົ້າວ່າ :
“ ຜ່ານເອກະສານວັດຖຸພັນ 47 ຊິ້ນໂດຍຖືກແບ່ງເປັນ 2 ຫົວເລື່ອງ, ຫົວເລື່ອງທີ່ 1 ແມ່ນ ໄລຍະ 10 ສະຕະວັດທຳອິດຫຼັງ ຄ.ສ, ຊຶ່ງໃນນັ້ນພົ້ນເດັ່ນແມ່ນການ ສະແດງໃຫ້ເຫັນການພົວພັນແລກປ່ຽນລະຫວ່າງ ແຂວງກວາງນິງ ກັບຈີນໃນສະຕະວັດທີ່ 1 ຫາສະຕະວັດທີ່ 3 ແລະ ຊຸດເຄື່ອງປັ້ນດິນເຜົາທີ່ສະແດງໃຫ້ເຫັນການ ພົວພັນແລກປ່ຽນລະຫວ່າງແຂວງກວາງນິງກັບໂຮ້ຍອ່ານ. ຊຸດເຄື່ອງປັ້ນດິນເຜົາ ແຕ່ ສະຕະວັດທີ່ 12 ຫາ 17 ມີວັດຖຸພັນຫຼາຍຢ່າງຖືກຄົ້ນພົບຢູ່ກວາງນິງ, ແຕ່ເຄື່ອງປັ້ນດິນເຜົາແບບນີ້ ກໍຖືກຄົ້ນພົບເຫັນຢູ່ ໂອສຕາ ນະຄອນ ກາຍໂຣ ປະເທດອີຢິບ ຊຶ່ງໃນປະຈຸບັນຖືກວາງສະແດງຢູ່ຫໍພິພິທະພັນຂອງອັງກີດ ແລະ ຍີປຸ່ນ. ສິ່ງນີ້ເປັນການສະແດງໃຫ້ເຫັນເຖິງການແລກປ່ຽນຄ້າຂາຍຜ່ານທ່າກຳປັ່ນ ເວີນໂດນ ຂອງກວາງນິງ ແລະ ຜະລິດຕະພັນເຄື່ອງປັ້ນດິນເຜົາຂອງຫວຽດນາມ ໄດ້ຖືກສົ່ງໄປຂາຍຢູ່ທຸກແຫ່ງໃນທົ່ວໂລກ ”
ແຜນທີ່ເຂດຕາເວັນອອກໄກໂດຍ Brion de la Tour ແຕ້ມໃນປີ 1774, ໃນນັ້ັ້ັນຢັ້ງຢືນໝູ່ເກາະ ຮ່ວາງຊາ ແມ່ນຂຶ້ນກັບອະທິປະໄຕຂອງຫວຽດນາມ
|
ພິເສດໃນງານວາງສະແດງຄັ້ງນີ້, ໃນພາກວາງສະແດງມໍລະດົກແຕ່ສະຕະວັດທີ່ 19 ຫາຍຸກທັນສະໄໝນັ້ນ ມີເອກະສານວິທະຍາສາດທີ່ສຳຄັນຄື ສຳເນົາແຜນທີ່ປະເທດຫວຽດນາມສະໄໝມິງເມ້ງ, ສຳເນົາແຜນທີ່ປະເທດຫວຽດນາມ ຂອງສັງຄະລາດ Jean- Louis Taberd, ສຳເນົາໜັງສືໃນສະໄໝເຈົ້າຊີວິດມິງມ້າງ ປີ 1838 ກ່ຽວກັບການວັດແທກ, ປັກຫຼັກໝາຍ ແລະ ແຕ້ມແຜນທີ່ໝູ່ເກາະ ຮ່ວາງ ຊາ, ສຳເນົາໜັງສືໃນສະໄໝລາດຊະວົງຫງວຽນກ່ຽວກັບອະທິປະໄຕ 2 ໝູ່ເກາະ ຮວ່າງຊາ ແລະ ເຈືອງຊາ ແລະ ການແລກປ່ຽນຄ້າຂາຍທາງທະເລ. ນອກຈາກນັ້ນ ແມ່ນບັນດາຮູບພາບ, ເອກະສານກ່ຽວກັບອະທິປະໄຕເຂດທະເລໝູ່ເກາະຂອງຫວຽດນາມໄລຍະ 1945-1975. ລຸງ Nguyen Van Huan ຢູ່ແຂວງ ຮ່າຕິ້ງໃຫ້ຮູ້ວ່າ :
“ງານວາງສະແດງ ກໍແມ່ນໂອກາດເພື່ອໃຫ້ພວກເຮົາທົບທວນຄືນມູນເຊື້ອອັນດີງາມຂອງຊາດໃນຂະບວນວິວັດແຫ່ງການຕໍ່ສູ້, ປົກປັກຮັກສາ ເຂດທະເລໝູ່ເກາະກໍຄືການປະດິດຄິດສ້າງຂອງປູຍ່າຕາຍາຍພວກເຮົາໄດ້ຜະລິດອອກວັດຖຸຕ່າງໆຊຶ່ງໄດ້ຮັບການເກັບຮັກສາຈົນຮອດວັນນີ້ເພື່ອສຶກສາອົບຮົມໃຫ້ຊາວຫວຽດ ນາມລຸ່ນຕ່າງໆ ”
ງານວາງສະແດງໄດ້ແນະນຳໃຫ້ຜູ້ຊົມກ່ຽວກັບຮູບພາບບັນດາທ່າກຳປັ່ນ ຂອງຫວຽດນາມໃນປະຫວັດສາດແຫ່ງການສ້າງຕັ້ງກໍຄືການເຄື່ອນໄຫວຂອງ ເສັ້ນທາງແລກປ່ຽນຄ້າຂາຍທາງທະເລສາກົນ, ການພົວພັນແລກປ່ຽນດ້ານວັດທະນະທຳລະຫວ່າງຫວຽດນາມກັບບັນດາພື້ນຖານວັດທະນະທຳສິວິໄລລຽບຕາມ ເສັ້ນທາງການຄ້າທາງທະເລ, ພ້ອມກັນນັ້ນ, ກໍໂຄສະນາ ແນະນຳໃຫ້ມວນຊົນຮັບຊາບກ່ຽວກັບປະຫວັດການຊອກຄົ້ນຫາ, ຂຸດຄົ້ນເສດຖະກິດທະເລ ແລະ ການປະຕິບັດອະທິປະໄຕຂອງຫວຽດນາມຢູ່ທະເລຕາເວັນອອກ.