(vovworld)- ໃນໄລຍະ 40 ປີຜ່ານມາ ນັບແຕ່ເມື່ອປະເທດຊາດໄດ້ຮັບການປົດປ່ອຍຢ່າງສົມບູນ, ນັບມື້ນັບມີຊາວຫວຽດນາມ ເຮັດວຽກ, ດຳລົງຊີວິດ ແລະ ອາໄສຢູ່ຕ່າງປະເທດຫລາຍຄົນ ກັບຄືນເມືອບ້ານເກີດເມືອງນອນ ນຳເອົາຄວາມຫວັງຢາກສ້າງຄວາມຮັ່ງມີໃຫ້ແກ່ປະເທດຊາດ. ຈຳນວນເງິນທີ່ຊາວຫວຽດນາມ ອາໄສຢູ່ຕ່າງປະເທດຝາກເມືອໄດ້ເພີ່ມຂຶ້ນໃນແຕ່ລະປີ, ຈຳນວນວິສາຫະກິດມີເງິນລົງທຶນຂອງຊາວຫວຽດນາມອາໄສຢູ່ຕ່າງປະເທດກໍເພີ່ມຂຶ້ນຫລາຍ. ສິ່ງດັ່ງກ່າວສະແດງໃຫ້ເຫັນອາລົມຈິດຂອງຊາວຫວຽດນາມ ອາໄສຢູ່ຕ່າງປະເທດ ຍາມໃດກໍອວ່າຍຫນ້າເມືອຫາປະເທດຊາດ.
ຊາວຫວຽດນາມ ອາໄສຢູ່ຕ່າງປະເທດກັບຄືນຢ້ຽມຢາມບ້ານເກີດເມືອງນອນ
ພາບ:vietnamnet.vn
|
ເດືອນ 4/2015 ແມ່ນໂອກາດທີ່ ຊາວຫວຽດນາມ ອາໄສຢູ່ຫລາຍປະເທດໃນໂລກ ກັບຄືນເຕົ້າໂຮມກັນຢູ່ບ້ານເກີດເມືອງນອນ, ແບ່ງປັນຄວາມເບິກບ້ານມ່ວນຊື່ນໃນຊຸມມື້ທົ່ວປະເທດສະເຫລີມສະຫລອງວັນໂຮມປະເທດຊາດເປັນເອກະພາບ.
ສຸດຈິດສຸດໃຈແບ່ງປັນກັບວົງຄະນາຍາດ
ພາຍຫລັງປະເທດຊາດໄດ້ຮັບການປົດປ່ອຍຢ່າງສົມບູນ, ທ່ານ David Duong(ເຢືອງ) ພ້ອມກັບຄອບຄົວໄດ້ຍ້າຍໄປອາໄສຢູ່ ອາເມລິກາ, ເລີ່ມທຳມາຫາກິນແລະ ດຳລົງຊີວິດຢູ່ ອາເມລິກາ ດ້ວຍວຽກງານຄ້າຂາຍສິ່ງເສດເຫລືອ ໄລຍະຕົ້ນ, ພາຫະນະທີ່ຄອບຄົວ ທ່ານ David Duong ຮັບໃຊ້ການທຳມາຫາກິນ ແມ່ນລົດກະບະເກົ່າ, ແຕ່ມາຮອດປະຈຸບັນ Califonia Waste Solution ຂອງຄອບຄົວທ່ານ ໄດ້ພັດທະນາກາຍເປັນບໍລິສັດຢືນອັນດັບທີ 37 ໃນຈຳນວນ 100 ບໍລິສັດຊັ້ນນຳກ່ຽວກັບການກຳຈັດສິ່ງເສດເຫລືອຢູ່ ອາເມລິກາ. ໝາກຜົນການດຳເນີນທຸລະກິດໄດ້ຊ່ວຍ ສ້າງອິດທິພົນ ແລະ ຂຶ້ນຊື່ລືນາມໃຫ້ແກ່ວົງຄະນາຍາດຊາວຫວຽດນາມ ອາໄສຢູ່ອາເມລິກາ. ປະຈຸບັນ ບໍລິສັດຂອງ ທ່ານ David Duong ມີສາຂາ ຢູ່ ຟິລິບປີນ, ຈີນ ແລະ ຫວຽດນາມ. ບໍ່ພຽງແຕ່ແມ່ນນັກທຸລະກິດປະສົບຜົນສຳເລັດໃນການດຳເນີນທຸລະກິດເທົ່ານັ້ນ, ທ່ານ David Duong ຍັງມີຊື່ສຽງດ້ວຍບັນດາການເຄື່ອນໄຫວກຸສົນຢູ່ຫວຽດນາມ. ໂດຍແມ່ນຜູ້ທີ່ເຄີຍປະສົບກັບຄວາມຫຍຸ້ງຍາກ, ສະນັ້ນ ຍາມໃດທ່ານ ທ່ານ David Duong ກໍອວ່າຍຫນ້າເມືອຫາກົກເຄົ້າເຫງົ້າກໍ, ເຄົາລົບຈິດໃຈສາມັກຄີ, ອຸ້ມຊຸຊ່ວຍເຫລືອເຊິ່ງກັນ ແລະກັນ ໃນວຽກງານ ແລະ ຊີວິດ. ທ່ານ ທ່ານ David Duong ແບ່ງປັນກ່ຽວກັບການດຳເນີນທຸລະກິດຂອງຕົນຢູ່ ຫວຽດນາມວ່າ:
“ເມື່ອດຳເນີນທຸລະກິດຢູ່ຫວຽດນາມ ບໍລິສັດພວກຂ້າພະເຈົ້າ ຕັດສິນໃຈຫັກລາຍຮັບສ່ວນຫນຶ່ງ ເພື່ອຊ່ວຍເຫລືອວົງຄະນາຍາດຊາວຫວຽດນາມ ພາຍໃນປະເທດ.ເພາະວ່າ ຄວາມຫຍຸ້ງຍາກຂອງສັງຄົມແມ່ນສະພາບລວມ, ຮຽກຮ້ອງແຕ່ລະຄົນຄວນຮ່ວມແຮງຮ່ວມໃຈເພື່ອຍົກສູງຊີວິດການເປັນຢູ່ໃຫ້ແກ່ວົງຄະນາຍາດ ໃຫ້ນັບມື້ນັບດີຂຶ້ນ ແລະ ສັງຄົມນັບມື້ນັບພັດທະນາ.”
ດ້ວຍຄວາມຄິດເພື່ອຜົນປະໂຫຍດຂອງວົງຄະນາຍາດ, ທ່ານ ຫງວຽນວັນກົງ, ຊາວຫວຽດນາມ ອາໄສຢູ່ ຝລັ່ງ ກັບຄືນເມືອປະເທດແຕ່ປີ 1975 ແລະໄດ້ເຂົ້າຮ່ວມການກໍ່ສ້າງ ອາຄານ 20 ຊັ້ນ 7 ແຫ່ງ ຢູ່ນະຄອນ ໂຮ່ຈິມີນຄື: Ham Nghi Tower, Sunwah Tower, Saigon Center…ທ່ານ ຫງວຽນວັນກົງ ໄດ້ອອກກິນເບ້ຍບຳນານກວ່າ 10 ປີແລ້ວ, ທ່ານ ກົງພ້ອມກັບຫນ່ວຍເຕັກນິກ ຊື່ງແມ່ນຊາວຫວຽດນາມ ອາໄສຢູ່ຕ່າງປະເທດ ໂດຍທ່ານເປັນຜູ້ກໍ່ຕັ້ງເອງ ສະຫງວນເວລາສ່ວນຫລາຍເພື່ອລົງບັນດາແຂວງ, ນະຄອນທາງພາກໃຕ້ຫວຽດນາມ ດ້ວຍຄວາມຫວັງຢາກລົບລ້າງບັນດາຂົວຊົ່ວຄາວ, ກໍ່ສ້າງຂົວເບຕົງຖາວອນໃຫ້ແກ່ປະຊາຊົນ. ດ້ວຍຈຳນວນທຶນຈາກການຂົນຂວາຍດ້ວຍຕົນເອງ, ມາຮອດປະຈຸບັນ ຫນ່ວຍເຕັກນິກດັ່ງກ່າວສາມາດກໍ່ສ້າງຂົວເບຕົງເກືອບ 200 ແຫ່ງ ຢູ່ເຂດທົ່ງພຽງແມ່ນ້ຳຂອງພາກໃຕ້, ເຂດທາງທິດຕາເວັນອອກສ່ຽງໃຕ້ຫວຽດນາມ ສຳເລັດ ແລະ ຄາດວ່າ ປີນີ້ ຈະກໍ່ສ້າງຂົວຫລາຍແຫ່ງຕື່ມອີກຢູ່ ພາກເຫນືອຫວຽດນາມ. ທ່ານ ຫງວຽນວັນກົງ ໃຫ້ຮູ້ວ່າ:
“ຂ້າພະເຈົ້າສືບຕໍ່ຊ່ວຍເຫລືອປະຊາຊົນຢູ່ພາຍໃນປະເທດ, ຊ່ວຍໃຫ້ບ້ານເກີດເມືອງນອນຂອງຕົນ. ຂ້າພະເຈົ້າໄດ້ໄປຢ້ຽມຢາມຫລາຍແຫ່ງແລ້ວ ແລະ ເຫັນວ່າ ວຽກງານນີ້ແມ່ນສຳຄັນທີ່ສຸດ ເພື່ອຮັບໃຊ້ປະຊາຊົນ. 75% ຈຳນວນພົນລະເມືອງ ແມ່ນດຳລົງຊີວິດຢູ່ເຂດຊົນນະບົດ ສະນັ້ນ ຕ້ອງຊ່ວຍເຂົາເຈົ້າ, ເຮັດແນວໃດເພື່ອໃຫ້ຊີວິດຂອງເຂົາເຈົ້າດີຂຶ້ນ ແລະ ການໄປມາສະດວກແມ່ນສິ່ງທີ່ເຂົາເຈົ້າຕ້ອງການທີ່ສຸດ.”
ສ້າງນ້ຳໃຈຮັກຊາດ
ພ້ອມກັບອາລົມຈິດອ່ວາຍຫນ້າເມືອຫາປະເທດຊາດ, ຊາວຫວຽດນາມ ອາໄສຢູ່ໄທ ກັບຄືນເມືອປະເທດ ຕາມຄຳຮຽກຮ້ອງຂອງປະທານໂຮ່ຈິມີນ ແຕ່ຊຸມປີ 1960 ມາຮອດປະຈຸບັນ, ໄດ້ປະກອບສ່ວນບໍ່ຫນ້ອຍໃຫ້ແກ່ການພັດທະນາຂອງຫວຽດນາມ. ທ່ານນາງ ຟານທິເຮື່ອງ, ຊາວຫວຽດນາມ ອາໄສຢູ່ ໄທ ກັບຄືນເມືອປະເທດກ່ອນນີ້ 20 ປີ ແລ້ວ ແລະ ປະຈຸບັນ ແມ່ນຜູ້ອຳນວຍການໃຫຍ່ ບໍລິສັດ Van Minh(ວັນມີງ) AB, ຜະລິດ ແລະ ພັດທະນາລະບົບລ້ຽງສິນໃນນ້ຳ. ໂດຍກຳເນີດ ແລະ ເຕີບໃຫຍ່ໃນຄອບຄົວຫນຶ່ງມີ 3 ລຸ້ນຄົນດຳລົງຊີວິດຢູ່ໄທ, ຍາມໃດທ່ານນາງ ຟານທິເຮື່ອງ ກໍສຶກສາໃຫ້ລູກຫລານ ມີອາລົມຈິດ, ຄວາມຮັກແພງ ແລະ ຍາມໃດກໍອ່ວາຍຫນ້າເມືອຫາປະເທດຊາດ. ຄຽງຄູ່ກັບການເຮັດທຸລະກິດ, ທ່ານນາງຍັງຍາດເວລາພົວພັນຕິດຕໍ່ ແລະ ຊ່ວຍເຫລືອຊາວ ຫວຽດນາມ ອາໄສ ຢູ່ ລາວ ແລະ ໄທ ໃນຫລາຍປີຜ່ານມາ, ຕັ້ງຫນ້າເປັນຂົວຕໍ່ເພື່ອໃຫ້ຊາວຫວຽດນາມ ອາໄສຢູ່ຕ່າງປະເທດ ເຂົ້າໃຈກ່ຽວກັບບັນດານະໂຍບາຍຂອງພັກ ແລະ ລັດ ກວ່າ, ຊ່ວຍໃຫ້ເຂົາເຈົ້າອຸ່ນອ່ຽນໃຈກັບເມືອລົງທຶນກໍ່ສ້າງພາຍໃນປະເທດ. ທ່ານນາງ ຟານທິເຮື່ອງ ຍາມໃດກໍຄິດວ່າ ຄົນລຸ້ນຕໍ່ໄປຕ້ອງພະຍາຍາມສຶກສານ້ຳໃຈຮັກຊາດໃຫ້ແກ່ຊາວຫວຽດນາມ ລຸ້ນຫນຸ່ມທີ່ ອາໄສຢູ່ຕ່າງປະເທດ, ຊ່ວຍໃຫ້ເຂົາເຈົ້າເຂົ້າໃຈກ່ຽວກັບວັດທະນະທຳທີ່ເປັນມູນເຊື້ອ ຫວຽດນາມ ທ່ານນາງ ຟານທິເຮື່ອງ ແບ່ງປັນວ່າ:
“ຊາວຫວຽດນາມ ອາໄສຢູ່ໄທ ມີນ້ຳໃຈຮັກຊາດອັນສູງສົ່ງ, ສະແດງໃຫ້ເຫັນຜ່ານການອຸທິດສ່ວນກຳລັງເຫື່ອແຮງ, ຊັບສິນເພື່ອຍາດເອົາເອກະລາດຂອງປະເທດຊາດ. ມາຮອດປະຈຸບັນ ຊາວຫວຽດນາມອາໄສຢູ່ ໄທ ຍາມໃດກໍອ່ວາຍຫນ້າເມືອຫາກົກເຄົ້າເຫງົ້າກໍ, ຢາກອຸທິດສ່ວນ ແລະ ສ້າງສາປະເທດຫວຽດນາມ.”
ປະເທດຊາດໄດ້ຮັບການທ້ອນໂຮມເປັນເອກະພາບຢ່າງສົມບູນມາເປັນເວລາ 40 ປີແລ້ວ, ຜົນສະທ້ອນຈາກສົງຄາມ ໄດ້ເຮັດໃຫ້ຊາວຫວຽດນາມ ບາງຄົນ ມີຄວາມເຂົ້າໃຈບໍ່ຖືກຕ້ອງກ່ຽວກັບອະດີດຕະການ. ວຽກງານສຳລັບຊາວຫວຽດນາມ ອາໄສຢູ່ຕ່າງປະເທດໃນໄລຍະມໍ່ໆມານີ້ ມີບາດກ້າວບຸກທະລຸ ໄດ້ເສີມຂະຫຍາຍກຳລັງແຮງມະຫາສາມັກຄີທົ່ວປວງຊົນທັງຊາດໃນການສ້າງສາປະເທດຊາດ ກໍຄືປົກປັກຮັກສາຜືນແຜ່ນດິນອັນຄົບຖ້ວນ. ເຖິງວ່າ ຫ່າງໄກຈາກບ້ານເກີດເມືອງນອນກໍຕາມ ແຕ່ ຊາວຫວຽດນາມ ອາໄສຢູ່ຕ່າງປະເທດ ຍາມໃດກໍອວ່າຍຫນ້າເມືອຫາປະເທດຊາດ, ມີນ້ຳໃຈຮັກຊາດ, ຮັກສາສີສັນວັດທະນະທຳຂອງຊາດ, ພິເສດ ໃນຊຸມມື້ຂອງເດືອນ 4 ສະເຫລີມສະຫລອງວັນປົດປ່ອຍພາກໃຕ້, ໂຮມປະເທດຊາດເປັນເອກະພາບ.