(vovworld)- ມີນັກດົນຕີຜູ້ໜຶ່ງທີ່ມີຊື່ສຽງ ແລະ ບັນດາບົດເພງຂອງທ່ານກໍ່ໄດ້ຮັບການສະແດງຢູ່ທົ່ວທຸກແຫ່ງ, ດ້ວຍບັນດາບົດເພງຍ້ອງຍໍສັນລະເສີນຜູ້ນຳຄື: “ລຸງໂຮ່-ຄວາມຮັກອັນກ້ວາງໃຫ່ຍໄພສານ“, “ດວງພະຈັນບາດິ່ງ“… ບັນດາບົດເພງກ່ຽວກັບນັກຮົບຄື: “ຝາກເຖິງນ້ອງຢູ່ຍານໃຕ້ແມ່ນ້ຳແດງ“, “ດອກໄມ້ສີແດງ“…ຕະຫຼອດຮອດບັນດາບົດເພງກ່ຽວກັບຄວາມຮັກຄື: “ຄວາມຮັກໃນໃຈ“, “ຄວາມມຸ້ງຫວັງ“, “ອຳລາຍາມສາຢັນ“….ບົດເພງທັງໝົດເຫຼົ່ານັ້ນລ້ວນແຕ່ສ້າງຄວາມປະທັບໃຈໃນຊີວິດດົນຕີຍຸກປະຈຸບັນ. ນັ້ນແມ່ນນັກດົນຕີທ້ວນອຽນ, ຜູ້ອາວຸໂສໃນພື້ນຖານດົນຕີປະຕິວັດຫວຽດນາມ.
ນັກດົນຕີທ້ວຽນອຽນ ແລະ ພັນລະຍາ
(ພາບ: http://giaitri.vnexpress.net)
ນັກດົນຕີທ້ວຽນອຽນ ມີຊື່ແທ້ວ່າດ່ວານຫີ້ວກົງ, ເກີດປີ 1935 ຢູ່ແຂວງກວາງນາມ. ທ່ານເຂົ້າຮ່ວມການຕໍ່ຕ້ານນັບແຕ່ປີ 1949, ແລະ ເປັນພະນັກງານກອງສິລະປະກອນເຂດ 5, ຫຼັງຈາກນັ້ນທ່ານໄດ້ໄປຮຽນປະພັນດົນຕີຊັ້ນກາງຢູ່ໂຮງຮຽນດົນຕີຫວຽດນາມ, ປະຈຸບັນແມ່ນສະຖາບັນດົນຕີແຫ່ງຊາດຫວຽດນາມ. ໃນໄລຍະຕໍ່ຕ້ານຕ້ານຈັກກະພັດອາເມລິກາ, ທ່ານໄດ້ຂຽນບັນດາບົດເພງລະດົມກຳລັງໃຈຊາວໜຸ່ມເດີນທາງໄປສູ້ຮົບ. ນັກດົນຕີທ້ວນອຽນ ແມ່ນນັກດົນຕີທີ່ມີຫຼາຍບົດເພງຍ້ອງຍໍປະທານໂຮ່ຈິມິນ ກ່ວາໝູ່ດ້ວຍ 26 ບົດ ຊື່ງໄດ້ເຮັດໃຫ້ຊາວຫວຽດນາມ ຫຼາຍລຸ້ນຄົນມີຄວາມຕື້ນຕັນໃຈທີ່ສຸດ. ໃນນັ້ນບົດເພງ “ລຸງໂຮ່-ຄວາມຮັກອັນກ້ວາງໃຫ່ຍໄພສານ“ ແລະ “ພາກກາງຄິດຮອດລຸງໂຮ່“ ໄດ້ຮັບລາງວັນແຫ່ງລັດປີ 2001. ນັກດົນຕີໂດ້ຮົ່ງກວນ ປະທານສະມາຄົມນັກດົນຕີຫວຽດນາມ ໃຫ້ຮູ້ວ່າ:
“ທ່ານແມ່ນຊາວພາກກາງ, ສະນັ້ນ, ບັນດາທຳນອງເພງ, ຈັງຫວະດົນຕີກໍ່ເຂັ້ມຄົ້ນໄປດ້ວຍທຳນອງເພງພື້ນເມືອງຂອງເຂດພາກ 5. ທ່ານໄດ້ປະດິດແຕ່ງ ບັນດາບົດເພງທີ່ມີຊື່ສຽງທີ່ສຸດ. ໂດຍແມ່ນນັກຮົບຜູ້ 1, ຜູ້ເຮັດວຽກງານສິລະປະອາຊີບຜູ້ 1, ທ່ານໄດ້ຮັບຄວາມເຄົາລົບນັບຖືຈາກຜູ້ຮ່ວມງານ, ກໍ່ຄືຜູ້ນິຍົມດົນຕີທຸກເກນອາຍຸເປັນຈຳນວນຫຼວງຫຼາຍ“.
ຄອບຄົວ ນັກດົນຕີທ້ວນອຽນ
(ພາບ: http://dantri.com.vn)
ເວລາເຮັດວຽກຢູ່ວິທະຍຸກະຈາຍສຽງຫວຽດນາມ (VOV) ໃນຖານະເປັນຫົວໜ້າຄະນະດົນຕີ (ປະຈຸບັນແມ່ນລະບົບດົນຕີ-ຂໍ້ມູນຂ່າວ-ບັງເທິງ-VOV3), ນັກດົນຕີທ້ວຽນອຽນ ມີໂອກາດໄປທັດສະນະສຶກສາຢູ່ຫຼາຍແຫ່ງ, ຂຽນຫຼາຍ, ແລະ ເຫັນປະຈັກຕາ ຊີວິດທຸກດ້ານ. ສິ່ງດັ່ງກ່າວໄດ້ຊ່ວຍໃຫ້ທ່ານປະດິດແຕ່ງບັນດາບົດ ເພງທີ່ດີເດັ່ນຫຼາຍບົດຄື: “ຝາກເຖິງນ້ອງຢູ່ຍານໃຕ້ແມ່ນ້ຳແດງ“, “ຄວາມຮັກໃນໃຈ“, “ຝາກເຖິງພາກກາງ“… ຕາມນັກດົນຕີ ກາດເວີ້ນ, ຜູ້ຮ່ວມງານເປັນເວລາຫຼາຍປີກັບນັກດົນຕີທ້ວນອຽນ ຢູ່ VOV ແລ້ວ, ນັກດົນຕີທ້ວນອຽນ ແມ່ນຜູ້ສຸດຈິດສຸດໃຈຕໍ່ພື້ນຖານດົນຕີຫວຽດນາມ. ນັກດົນຕີ ກາດເວີ້ນ ແບ່ງປັນວ່າ:
“ທ່ານແມ່ນຜູ້ສຸດຈິດສຸດໃຈ, ມີຄວາມເກັ່ງກ້າສາມາດ, ແມ່ນແບບຢ່າງທີ່ດີເດັ່ນຂອງພື້ນຖານດົນຕີປະຕິວັດຫວຽດນາມ. ທັງແມ່ນຜູ້ທີ່ເປີດອົກເປີດໃຈ, ຍາມໃດກໍ່ຍົກສູງລັກສະນະວັດທະນະທຳມະນຸດ. ທ່ານບໍ່ພຽງແຕ່ໄດ້ຮັບຄວາມຮັກແພງຈາກຜູ້ຮ່ວມງານເທົ່ານັ້ນ, ຫາກຍັງຮັບຄວາມເຄົາລົບຈາກຜູ້ຜູ້ຟັງເປັນຈຳນວນຫຼວງຫຼາຍອີກດ້ວຍ “.
ນັກດົນຕີທ້ວຽນອຽນ ຍາມໃດກໍ່ພ້ອມແລ້ວທີ່ຈະສິດສອນແຕ່ລະທຳນອງເພງ ກໍ່ຄືວິທີຂັບຮ້ອງໃຫ້ນັກຮ້ອງແຕ່ລະດົນ. ນັກສິລະປິນປະຊາຊົນ ທູຮ່ຽນ ຍາມໃດກໍ່ຈົດຈຳຄຳສອນຂອງນັກດົນຕີທ້ວຽນອຽນ ແລະ ຍາມໃດກໍ່ຮູ້ສຶກເອກອ້າງທະນົງໃຈຍ້ອນເປັນຜູ້ທຳອິດທີ່ໄດ້ຂັບຮ້ອງຫຼາຍບົດເພງໂດຍນັກດົນຕີທ້ວຽນອຽນປະດິດແຕ່ງ. ນັກສິລະປິນປະຊາຊົນ ທູຮ່ຽນ ເລົ່າຄວາມໃນໃຈສູ່ຟັງວ່າ:
“ບົດເພງຂອງນັກດົນຕີທ້ວຽນອຽນ ໄດ້ສະແດງໃຫ້ເຫັນຈິດວິນຍາຂອງຊາວຫວຽດນາມ. ທ່ານປຽບເໝືອນຜູ້ເປັນພໍ່, ກັບຕັນເຮືອ, ເປັນນັກຮົບ. ຍາມໃດຂ້າພະເຈົ້າກໍ່ເຄົາລົບນັບຖື ແລະ ຮູ້ສຶກໃກ້ຊິດສະໜິດສະໜົມທ່ານທີ່ສຸດ“.
ນັກດົນຕີທ້ວຽນອຽນ ຍັງປະສົບຜົນສຳເລັດທີ່ສຸດດ້ວຍບັນດາບົດດົນຕີປະສານສຽງຄື: ບົດ “ສະໝັກໃຈ“, “ພາກກາງທີ່ແສນຮັກ“… ຄຽງຄູ່ກັນນັ້ນ, ນັກດົນຕີທ້ວຽນອຽນ ຍາມໃດກໍໄດ້ຊອກຮູ້, ປ່ຽນໃໝ່ ແລະ ໃກ້ຊິດຕິດແທດກັບຊີວິດດ້ານດົນຕີ. ໃນຊຸມປີ 80-90 ຂອງສັດຕະວັດກ່ອນ, ເມື່ອດົນຕີສຳລັບລຸ້ນໜຸ່ມດ້ວຍຈິນຕະນາການໃໝ່, ຈັງຫວະໃໝ່ປະກົດຂຶ້ນນັ້ນ, ທ່ານກໍ່ມີບັນດາບົດເພງດີເດັ່ນຄື: “ຄວາມຮັກໃນໃຈ“, “ອຳລາຍາມສາຢັນ“…. ຊື່ງໃນນັ້ນ, ຜູ້ຟັງສາມາດເຫັນໄດ້ການປ່ຽນໃໝ່ຂອງນັກດົນຕີທ້ວນອຽນ ທີ່ເຕັມໄປດ້ວຍພະລັງຊີວິດຂອງໄວໜຸ່ມ ແລະ ຄວາມປະເອີບໃຈ. ນັກຮ້ອງຈ້ອງເຕີນ ແບ່ງປັນວ່າ:
“ນັກດົນຕີທ້ວນອຽນ ແມ່ນໜຶ່ງໃນບັນດານັກດົນຕີອະວຸໂສທີ່ສາມາດປະດິດແຕ່ງດົນຕີຫຼາຍປະເພດສຳເລັດຜົນ. ທ່ານກໍ່ແຕ່ງບົດເພງປະຕິວັດ, ບົດເພງພື້ນເມືອງຫຼາຍບົດ. ໃນໄລຍະມໍ່ໆມານີ້ ທ່ານຍັງຂຽນບົດເພງມ່ວນຫຼາຍບົດ, ທ່ານແມ່ນຜູ້ທີ່ໄດ້ອຸທິດສ່ວນໃຫ້ແກ່ສິລະປະຢ່າງສຸດຈິດສຸດໃຈ, ແລະ ສົມເປັນແບບຢ່າງທີ່ດີເພື່ອໃຫ້ລຸ້ນຫຼັງຮ່ຳຮຽນເອົາ“.
ດ້ວຍການປະກອບສ່ວນຂອງຕົນ, ນັກດົນຕີທ້ວນອຽນ ໄດ້ສ້າງຄວາມປະທັບໃຈຢ່າງເລິກເຊິ່ງໃຫ້ແກ່ຜູ້ນິຍົມດີນຕີຫວຽດນາມ. ມາຮອດຈຸດເວລານີ້, ບັນດາບົດເພງຂອງທ່ານຍັງຄົງມີຄຸນຄ່າເໝືອນເດີມ. ເຖິງວ່າທ່ານໄດ້ເຖິງແກ່ມໍລະນະກຳແລ້ວກໍ່ຕາມ ແຕ່ບັນດາບົດປະພັນດົນຕີອັນລ້ຳຄ່າຂອງທ່ານຍັງຍືນຍົງຄົງຕົວຕະຫຼອດໄປ./.