ສິລະປະຂັບເດີນກາຕາຍຕືພາກໃຕ້ໄດ້ຮັບການຮັບຮອງຈາກອົງການ UNESCO ວ່າ ແມ່ນມໍລະດົກວັດທະນະທຳບໍ່ມີຮູບຮ່າງຂອງມວນມະນຸດໃນທ້າຍປີ 2013. ນັບແຕ່ຈຸດເວລາທີ່ເປັນຂີດໝາຍສຳຄັນນັ້ນ ມາຮອດປະຈຸບັນ, ນະຄອນໂຮ່ຈິມິນ ໄດ້ຜັນຂະຫຍາຍຫຼາຍການເຄື່ອນໄຫວ ເພື່ອແນໃສ່ປະຕິບັດບັນດາຄຳໝັ້ນສັນຍາໃນການອະນຸລັກຮັກສາ ແລະ ເສີມຂະຫຍາຍສິລະປະຂັບເດີນກາຕາຍຕື.
ສິລະປະຂັບເດີນກາຕາຍຕືພາກໃຕ້ |
ເມື່ອບໍ່ດົນມານີ້, ນາງ ຫງວຍທິເຟືອງຖີ້ ພ້ອມກັບບັນດາສະມາຊິກໃນສະໂມສອນເດີນກາຕາຍຕືເມືອງ ເຕີນຟູ້ ໄດ້ສ້າງຂີດໝາຍໃນງານປະກວດສິລະປະຂັບເດີນກາຕາຍຕືພາກໃຕ້ຊິງລາງວັນດອກບົວຄຳຄັ້ງທີ 2. ບັນດາຜູ້ນິຍົມສິລະປະຂັບເດີນກາຕາຍຕື ບໍ່ຕ້ອງລໍຖ້າຮອດງານປະກວດນີ້ ຈຶ່ງມີໂອກາດສະແດງໃຫ້ເຫັນຄວາມເມົາມົວຂອງຕົນ. ໄລຍະມໍ່ໆມານີ້, ບັນດາຜູ້ນິຍົມສິລະປະຂັບເດີນກາຕາຍຕື, ຍົກຕົວຢ່າງຄື ນາງ ຫງວຍທິເຟືອງຖີ້ ກໍມີເງື່ອນໄຂ ແລະ ໂອກາດເພື່ອສະແດງຂັບຮ້ອງ ແລະ ເສບເຄື່ອງດົນຕີ. ປະຈຸບັນ, ນະຄອນໂຮ່ຈິມິນມີເກືອບ 300 ສະໂມສອນ, ກອງສິລະປະຂັບເດີນກາຕາຍຕື ດ້ວຍຈຳນວນນັກສິລະປິນ, ນັກປະພັນເພງ ແລະ ບັນດານັກຄົ້ນຄ້ວາລວມທັງໝົດ 3000 ກວ່າຄົນເຂົ້າຮ່ວມ. ບໍ່ພຽງແຕ່ມີການເຄື່ອນໄຫວເປັນປະຈຳຢູ່ຕາມສູນວັດທະນະທຳເມືອງເທົ່ານັ້ນ, ບັນດາສະໂມສອນເດີນກາຕາຍຕື, ສະໂມສອນຂັບກາຍເລືອງຍັງມີການຈັດຕັ້ງການເຄື່ອນໄຫວຢູ່ສະຖານທີ່ອື່ນໆອີກຫຼາຍແຫ່ງເຊັ່ນ ຫໍວັດທະນະທຳຊາວໜຸ່ມນະຄອນ, ຫໍວັດທະນະທຳແຮງງານອີກດ້ວຍ, ອັນໄດ້ດຶງດູດການເຂົ້າຮ່ວມຂອງໄວໜຸ່ມເປັນຈຳນວນຫຼວງຫຼາຍ. ນາງ ຫງວຍທິເຟືອງຖີ້ ໃຫ້ຮູ້ວ່າ :
“ ກ່ອນອື່ນໝົດ ແມ່ນຍ້ອນມີຄວາມຮັກອາຊີບ. ພ້ອມກັນນັ້ນ, ເຮົາຢາກອະນຸລັກຮັກສາທຸກສິ່ງທຸກຢ່າງທີ່ລຸ່ນປູ່ລຸ່ນພໍ່ໄດ້ປະໄວ້ໃຫ້. ແຕ່ເພື່ອມີການ ອະນຸລັກຮັກສາເປັນຢ່າງດີນັ້ນ, ແຕ່ລະຄົນກໍຕ້ອງມີການປະກອບເຫື່ອແຮງສ່ວນໃດສ່ວນໜຶ່ງຂອງຕົນ ”
ແຕ່ຄວາມເປັນຫ່ວງເປັນໄຍທີ່ສຸດຂອງບັນດາສະໂມສອນ, ກອງສິລະປະຂັບເດີນກາຕາຍຕື ແມ່ນເງິນໃຊ້ຈາຍສຳລັບການເຄື່ອນໄຫວ. ທ່ານ ເລວັນໂລກ ຮອງຫົວໜ້າສູນວັດທະນະທຳ ນະຄອນໂຮ່ຈິມິນເວົ້າວ່າ : “ ບັນດານັກສິລະປິນຂັບເດີນກາຕາຍຕືທຳການສະແດງບໍ່ເພື່ອຈຸດປະສົງຫາເງີນ. ເຂົາເຈົ້າຂັບຮ້ອງແມ່ນເພື່ອຄວາມຮັກແພງຕໍ່ກັນ, ນັ່ງຫຼິ້ນນຳກັນຕາມແບບຄອບຄົວ. ເປັນອັນວາ່, ເມື່ອເຂົາເຈົ້າບໍ່ສາມາດຫາເງິນລ້ຽງຊີບຈາກອາຊີບນີ້, ກໍພາໄປເຖິງເລື່ອງບັນດານັກສິລະປິນທີ່ດີເດັ່ນບໍ່ຜູກພັນກັບປະເພດ ສິລະປະຂັບເດີນກາຕາຍຕື. ຢາກແກ້ໄຂບັນຫານີ້, ກໍຕ້ອງການມີລະບອບ, ນະໂຍບາຍໜູນຊ່ວຍບັນດານັກສິລະປິນ”
ເຖິງວ່າມີຄວາມທຸກຍາກຂາດເຂີນຕໍ່ຕາມ, ແຕ່ປະຈຸບັນ, ຢູ່ນະຄອນໂຮ່ຈິມິນ ຍັງມີບັນດານັກສິລະປິນໄດ້ສຸດຈິດສຸດໃຈກັບ ສິລະປະຂັບເດີນກາຕາຍຕື. ນັບມື້ນັບມີນັກສິລະປິນຜູ້ອາຍຸສູງ ໄດ້ເປີດຊຸດອົບຮົມດ້ວຍຕົນເອງ ເພື່ອບຳລຸງສ້າງລຸ່ນໜຸ່ມຜູ້ນິຍົມກັບ ສິລະປະຂັບເດີນກາຕາຍຕື, ພ້ອມທັງເປີດບໍລິສັດເພື່ອຊອກຫາເວທີ່ສະແດງໃຫ້ບັນດານັກສິລະປິນ. ຕາມນັກສິລະປິນ ເຈີນດຶກເຍີ້ນ ສັງກັດຄະນະການນຳ ສະໂມສອນເດີນກາຕາຍຕືເມືອງ 1, ນະຄອນໂຮ່ຈິມິນແລ້ວ, ການຖ່າຍທອດກ່ຽວກັບສິລະປະຂັບເດີນກາຕາຍຕືແມ່ນຈຳເປັນເພາະລຸ່ນຄົນສືບທອດ ແມ່ນມີບົດບາດສຳຄັນໃນການ ອະນຸລັກຮັກສາ ແລະ ເສີມຂະຫຍາຍປະເພດສິລະປະນີ້. ນັກສິລະປິນ ເຈີນດຶກເຍີ້ນ ໃຫ້ຮູ້ວ່າ :
“ ປະຈຸບັນ, ບັນດານັກສິລະປິນຄື ພວກຂ້າພະເຈົ້າ ແມ່ນມີອາຍຸສູງແລ້ວ, ດັ່ງນັ້ນ, ພວກຂ້າພະເຈົ້າເອົາໃຈໃສ່ເປັນພິເສດເຖິງລຸ່ນຄົນສືບທອດຂອງປະເພດສິລະປະຂັບເດີນກາຕາຍຕື, ເປັນຕົ້ນແມ່ນໄວໜຸ່ມ ”
ນະຄອນໂຮ່ຈິມິນໄດ້ມີນະໂຍບາຍໜູນຊ່ວຍ ແລະ ຍູ້ແຮງບັນດາການເຄື່ອນໄຫວຕິດແທດຕົວຈິງເພື່ອດຶງດູດຊາວໜຸ່ມເຍົາວະຊົນເຂົ້າຮ່ວມສະໂມສອນເດີນກາຕາຍຕື, ໃນນັ້ນໄດ້ເຮັດສຳເລັດແຜນຮ່າງ “ນຳສິລະປະຂັບເດີນກາຕາຍຕືເຂົ້າໃນໂຮງຮຽນ” . ໃນມໍ່ໆມານີ້, ທາງນະຄອນກໍໄດ້ນຳໜ້າໃນການປະຕິບັດບັ້ນຂົນຂວາຍປະພັນເພງເພື່ອຮັບໃຊ້ເດັກ. ທ່ານ ຫງວຽນວັນມິນ ຮອງຫົວໜ້າພະແນກວັດທະນະທຳ ແລະ ກິລາ ນະຄອນໂຮ່ຈິມິນໃຫ້ຮູ້ວ່າ ໃນໄລຍະທີ່ຈະມາເຖິງ, ທາງນະຄອນຈະຈັດຕັ້ງງານປະກວດຂັບເດີນກາຕາຍຕືທີ່ສະຫງວນສະເພາະເດັກເພື່ອຊອກຫາບັນດານ້ອງນ້ອຍທີ່ມີຄວາມເກັ່ງກ້າສາມາດ. ທ່ານ ຫງວຽນວັນມິນ ກ່າວວ່າ :
“ ບັນຫາສຳຄັນແມ່ນການ ອະນຸລັກຮັກສາ. ແຕ່ຂະບວນວິວັດ ອະນຸລັກຮັກສານັ້ນ, ຕ້ອງເລືອກເອົາລຸ່ນຊາວໜຸ່ມເຍົາວະຊົນເພື່ອເລີ່ມຕົ້ນຜັນຂະຫຍາຍ. ປະຈຸບັນ, ພວກຂ້າພະເຈົ້າໄດ້ມອບໝາຍໃຫ້ສະໂມສອນເດີນກາຕາຍຕືນະຄອນ ກໍຄືມອບໝາຍໃຫ້ເມືອງຕ່າງໆ, ນອກຈາກການແນະນຳກ່ຽວກັບການຂັບຮ້ອງແລ້ວ, ກໍຍັງຖ່າຍທອດກ່ຽວກັບການເສບເຄື່ອງດົນຕີໃຫ້ຊາວໜຸ່ມເຍົາວະຊົນອີກດ້ວຍ”
ໃນທ່າມກາງການດຳລົງຊີວິດທີ່ຟົດຟື້ນຂອງເຂດຕົວເມືອງທີ່ທັນສະໄໝຄືນະຄອນໂຮ່ຈິມິນນັ້ນ, ສຽງຂັບຮ້ອງປະສານກັບສຽງດົນຕີຂອງສິລະປະເດີນກາຕາຍຕື ຍັງຄົງດັງກ້ອງກັງວານຂຶ້ນ. ປະເພດສິລະປະພື້ນເມືອງນີ້ ພວມນັບມື້ນັບຕິດພັນກັບຊີວິດປະຈຳວັນຂອງປະຊາຊົນເຂດພາກໃຕ້ຫຼາຍຂຶ້ນ.