ຂັບກາຍເລືອງແມ່ນປະເພດສິລະປະພື້ນເມືອງພິເສດສະເພາະຂອງເຂດ ພາກໃຕ້ ແລະ ໄດ້ດຶງດູດຜູ້ຊົມເປັນຈຳນວນຫຼວງຫຼາຍ. ແຕ່ເພື່ອໃຫ້ຜູ້ຊົມ, ພິເສດແມ່ນຜູ້ຊົມໄວເດັກຮູ້ສຶກປະທັບໃຈຕໍ່ສິລະປະຂັບກາຍເລືອງນັ້ນ, ແມ່ນຮຽກຮ້ອງໃຫ້ບັນດານັກສິລະປີນຕ້ອງປ່ຽນໃໝ່ ວິທີການສະແດງສຳລັບແຕ່ລະຕົວລະຄອນ. ຢູ່ນະຄອນໂຮ່ຈິມິນ, ກວ່າ 1 ປີມານີ້, ກອງສິລະປະຂັບກາຍເລືອງໄວເດັກ ແບກລອງ ສາມາດເຮັດໄດ້ສິ່ງດັ່ງກ່າວ. ເພາະສະນັ້ນ, ລາຍການສະແດງຂັບກາຍເລືອງໃດກໍສາມາດດຶງດູດຜູ້ມາຊົມເປັນຈຳນວນຫຼວງຫຼາຍ.
ນັກສິລະປີນ ແບກລອງ
(ພາບ: vanhoadoisong)
|
ໃນລະຄອນກາຍເລືອງ “ ຄັນຄາກຂຶ້ນຮ້ອງຟ້ອງເທິງສະຫວັນ” ໂດຍກອງສິລະປະຂັບກາຍເລືອງໄວເດັກ ແບກລອງ ຝຶກແອບເພື່ອກະກຽມຮັບໃຊ້ພວກນ້ອງນ້ອຍ. ການຝຶກແອບນີ້ໃນແຕ່ມື້ ແມ່ນແກ່ຍາວປະມານ 3 ຊົ່ວໂມງ ແລະ ເຄີຍຍາດເວລາເພື່ອຝຶກແອບໃນຍາມພັກຜ່ອນຕອນທ່ຽງ. ໃນຫ້ອງໜຶ່ງມີເນື້ອທີ່ປະມານ 25 ຕາແມັດ, ມີນັກສິລະປີນເກືອບ 20 ຄົນພວມເມົາມົວຂັບ ແລະ ຟ້ອນຕາມເນື້ອໃນຂອງລະຄອນກາຍເລືອງ. ເຂົາເຈົ້າສວມບົດຕົວລະຄອນຕ່າງໆທີ່ຄຶກຄື້ນໃນ ບັນດາບົດລະຄອນກາຍເລືອງຖືກສະແດງສະເພາະໃຫ້ ຜູ້ຊົມໄວເດັກໃນນະຄອນ. ນັກສິລະປີນ ແບກລອງ ເປີດເຜີຍວ່າ :
“ ທີ່ໜຶ່ງ, ຂ້າພະເຈົ້າຢາກຖ່າຍທອດ ປະເພດສິລະປະນີ້, ທີ່ສອງ, ຢາກມີຜູ້ຊົມສືບທອດປະເພດສິລະປະຂັບກາຍເລືອງພື້ນເມືອງ. ສຳລັບນັກສິລະປີນ, ກໍຕ້ອງມລຸ່ນຄົນສືບທອດ, ດັ່ງນັ້ນກໍຕ້ອງມີຜູ້ຊົມສືບທອດ, ຖ້າບໍ່ດັ່ງນັ້ນ, ຂັບກາຍເລືອງຈະມີໄພຖືກສູນຫາຍໄປ. ເດັກນ້ອຍປະຈຸບັນ, ສ່ວນຫຼາຍນິຍົມຊົມຮູບເງົາກະຕູນ, ສະແດງຄອນເສີດ, ຮິບຮົບ. ເພາະສະນັ້ນ, ຖ້າບໍ່ໃຫ້ຊົມລະຄອນກາຍເລືອງນັ້ນ, ໃນພາຍພາກໜ້າ, ພວກເດັກຈະບໍ່ຮູ້ຈັກວ່າ ຂັບກາຍເລືອງແມ່ນຫຍັງ ”
ຈຸດພິເສດສະເພາະຂອງກອງສິລະປະຂັບກາຍເລືອງໄວເດັກ ແບກລອງ ກໍແມ່ນສິລະປະລະຄອນກາຍເລືອງພື້ນເມືອງດ້ວຍບັນດາບົດລະຄອນທີ່ເຕັມໄປດ້ວຍລັກສະນະວັດທະນະທຳມະນຸດ, ສຶກສາອົບຮົມພວກເດັກກ່ຽວກັບວິຖີຊີວິດມຸ່ງໄປສູ່ຄວາມສຸດຈະລິດ, ຮັກບ້ານເກີດເມືອງນອນ ປະເທດຊາດ, ມີຄວາມກະທັນຍູຕໍ່ພໍ່ແມ່. ການສະແດງລະຄອນກາຍເລືອງແຕ່ລະລາຍການແມ່ນສານສະບັບໜຶ່ງທີ່ມີຄວາມໝາຍ ໂດຍຜູ້ແຕ່ງບົດລະຄອນທັງເປັນຜູ້ກຳກັບການສະແດງ ແບກລອງຢາກຝາກເຖິງພວກເພື່ອນໜຸ່ມ. ລະອຽດແມ່ນບົດລະຄອນກາຍເລືອງ “ ເດັກຄົນໃຊ້ກອບກູ້ຊີວິດຜູ້ຈ້າງຕົນເອງ ” ຊຶ່ງໄດ້ເວົ້າເຖິງກົດຫຼັກເຫດ ແລະ ຜົນໃນການດຳລົງຊີວິດ. ສ່ວນບົດລະຄອນກາຍເລືອງ “ ມ້າຂາວ ແລະ ຫົວຜັກກາດຍັກ ” ແມ່ນໄດ້ເຊີດຊູອາລົມຈິດຄວາມຮັກແພງໃນຄອບຄົວ. ໃນຂະນະນັ້ນ, ບົດລະຄອນກາຍເລືອງ “ ຄັນຄາກຂຶ້ນຮ້ອງຟ້ອງເທິງສະຫວັນ” ແມ່ນສຶກສາອົບຮົມເດັກຮູ້ຈັກປະຢັດໃນການດຳລົງຊີວິດ ”
ໂດຍເລືອກເອົາຂັບກາຍເລືອງພື້ນເມືອງ ທີ່ໄປຄຽງຄູ່ກັບການປະສານສົມທົບ ປັດໃຈຕະຫຼົກເພື່ອດຶງດູດຜູ້ຊົມນັ້ນ, ບັນດານັກສະແດງໃນກອງຕ້ອງສະຫງວນເວລາຫຼາຍພໍສົມຄວນເພື່ອຝຶກແອບການຟ້ອນ. ຕາມບັນດານັກສິລະປີນໃນກອງແລ້ວ, ເລື່ອງສະແດງທັງຂັບກາຍເລື່ອງທັງຟ້ອນຕາມລະຄອນກາຍເລືອງ ແມ່ນບໍ່ງາຍດາຍແຕ່ຢ່າງໃດ. ແຕ່ນັກສິລະປີນທຸກໆຄົນຕ່າງພະຍາຍາມຈົນສຸດຄວາມສາມາດຂອງຕົນ ເພາະວ່າພຽງແຕ່ຢືນຂັບຊື່ໆ, ເດັກຈະເບື່ອ ແລະ ລືມໄວ.
ນັກສິລະປີນ ຟານທິເຝື້ອງ ເວົ້າວ່າ :
“ ເມື່ອເລີ່ມເຄື່ອນໄຫວອາຊີບນີ້, ທຳອິດເຂົ້າສວມບົດຕົວລະຄອນໃດໜຶ່ງ ກໍຍາກຫຼາຍ, ແຕ່ເຮົາມັກເຮັດໃຫ້ພວກເດັກຍິ້ມຫົວ, ດັ່ງນັ້ນ ຍາມໃດກໍພະຍາຍາມຢ່າງສຸດຂີດເພື່ອສວດບົດຕົວລະຄອນ. ສຳລັບອາຊີບທີ່ຕົນຊົບຊອບນີ້ ເຮົາຕ້ອງເດີນຕາມຈົນຮອດວັນສິ້ນສຸດ, ຖ້າຫາກເວົ້າວ່າອາຊີບນີ້ສາມາດຫາເງິນ ລ້ຽງຕົນເອງໄດ້ , ກໍບໍ່ແມ່ນ”
ສູນຈັດຕັ້ງການສະແດງ ແລະ ຮູບເງົານະຄອນໂຮ່ຈິມິນໄດ້ສ້າງເງື່ອນໄຂເພື່ອໃຫ້ ກອງສິລະປະຂັບກາຍເລືອງໄວເດັກ ແບກລອງ ປະດິດຄິດແຕ່ງດ້ານສິລະປະ, ອັນໄດ້ຊ່ວຍໃຫ້ຜູ້ຊົມໄວເດັກໃນນະຄອນມີຄວາມເຂົ້າໃຈຕື່ມກ່ຽວກັບປະເພດ ສິລະປະພື້ນເມືອງຂອງປູຍ່າຕາຍາຍ. ທ່ານ ຫງວຽນຮິ້ວລວນ ຜູ້ອຳນວຍການສູນຈັດຕັ້ງການສະແດງ ແລະ ຮູບເງົານະຄອນໂຮ່ຈິມິນໄດ້ເປີດເຜີຍວ່າ :
“ ດ້ວຍຄວາມຮັບຜິດຊອບຂອງສູນຈັດຕັ້ງການສະແດງຂອງນະຄອນ, ພວກຂ້າພະເຈົ້າໄດ້ພະຍາຍາມສ້າງຕັ້ງຫຼາຍກອງສິລະປະ ແລະ ຮັບອຸປະກະລະນັກສິລະປະການ, ສິລະປີນຈຳນວນໜຶ່ງທີ່ສຸດຈິດສຸດໃຈກັບປະເພດສິລະປະຂັບກາຍເລືອງນີ້. ຕະຫຼອດປີທີ່ຜ່ານມາ, ພວກຂ້າພະເຈົ້າໄດ້ລົງທຶນຈຳນວນຫຼາຍພໍສົມຄວນເພື່ອຈັດຕັ້ງບັນດາລາຍການ ບໍ່ສະເພາະແຕ່ໂຮງລະຄອນນະຄອນເທົ່ານັ້ນ ຫາກຍັງສະແດງຢູ່ບັນດາເມືອງອ້ອມຂ້າງອີກດ້ວຍ”
ການເຄື່ອນໄຫວທີ່ີມີຜົນປະໂຫຍດນີ້ ໄດ້ ແລະ ພວມດຶງດູດການເຂົ້າຮ່ວມຢ່າງສຸດໃຈຂອງນັກສິລະປີນຢ່າງຫຼວງຫຼາຍ. ຜ່ານການເຄື່ອນໄຫວສະແດງ ໂດຍບໍ່ຄິດຜົນກຳໄລນີ້ ໄດ້ຊ່ວຍໃຫ້ຜູ້ຊົມໄວເດັກໃນນະຄອນມີເງື່ອນໄຂໄດ້ຮັບຊົມ ບັນດາບົດລະຄອນກາຍເລືອງທີ່ມີຄຸນນະພາບ, ເຂັ້ມຂົ້ນໄປດ້ວຍສີສັນວັດທະນະທຳຂອງປະຊາຊົນເຂດພາກໃຕ້ .